കോഴിക്കോട്: വിലങ്ങാട് ഉരുൾപൊട്ടൽ ദുരന്തബാധിതർക്ക് സർക്കാർ ആവശ്യമായ സഹായം നൽകാത്തതിൽ പ്രതിഷേധിച്ച് കോൺഗ്രസും ബിജെപിയും നാളെ (മെയ് 29) ഹർത്താൽ പ്രഖ്യാപിച്ചു. രാവിലെ ആറ് മണി മുതൽ വൈകിട്ട് ആറ് മണി വരെയാണ് ഹർത്താൽ.

കഴിഞ്ഞ വർഷം വയനാട്ടിലെ ചുരൽമല, മുണ്ടക്കൈ എന്നിവിടങ്ങളിൽ ഉരുൾപൊട്ടൽ ഉണ്ടായ ദിവസം തന്നെ കോഴിക്കോട് വിലങ്ങാട്ടിലും ഒന്നിലധികം തവണ ഉരുൾപൊട്ടലുണ്ടായിരുന്നു. ഈ ദുരന്തത്തിൽ ഒരാൾക്ക് ജീവൻ നഷ്ടപ്പെടുകയും നിരവധി വീടുകൾ തകരുകയും ചെയ്തു. എന്നാൽ, ഒരു വർഷം പിന്നിട്ടിട്ടും ദുരന്തബാധിതർക്ക് സർക്കാർ ആവശ്യമായ സഹായം നൽകിയിട്ടില്ലെന്ന് കോൺഗ്രസും ബിജെപിയും ആരോപിക്കുന്നു.

നിലവിൽ, തുടർച്ചയായ ശക്തമായ മഴയെ തുടർന്ന് വിലങ്ങാട് മഞ്ഞച്ചീളി മേഖലയിൽ ഉരുൾപൊട്ടൽ ഭീതി നിലനിൽക്കുകയാണ്. കഴിഞ്ഞ ദിവസം ഈ പ്രദേശത്ത് നിന്ന് 9 കുടുംബങ്ങളെ, ഏകദേശം 30 പേരെ, വിലങ്ങാട് സെന്റ് ജോർജ് സ്കൂളിലേക്ക് മാറ്റി പാർപ്പിച്ചു. മുൻപ് ഉരുൾപൊട്ടൽ നാശം വിതച്ച മേഖലകളിൽ നിന്നാണ് ഈ കുടുംബങ്ങളെ മാറ്റിയത്. ചില കുടുംബങ്ങൾ സ്വയം മറ്റ് സുരക്ഷിത സ്ഥലങ്ങളിലേക്ക് മാറുകയും ചെയ്തിട്ടുണ്ട്. ദുരന്തബാധിതർക്ക് ആവശ്യമായ സഹായം ലഭിക്കാത്തതിൽ പ്രതിഷേധിച്ച് പ്രദേശവാസികളും ക്യാമ്പുകളിലേക്ക് മാറ്റിയവരും ചേർന്ന് ഇന്ന് വിലങ്ങാട് വില്ലേജ് ഓഫീസ് ഉപരോധിച്ചു. പ്രതിഷേധക്കാർ ഓഫീസിലേക്ക് തള്ളിക്കയറാൻ ശ്രമിച്ചതോടെ പൊലീസുമായി ഉന്തും തള്ളും ഉണ്ടായി. ഇതിന് പിന്നാലെയാണ് കോൺഗ്രസും ബിജെപിയും ഹർത്താലിന് ആഹ്വാനം ചെയ്തത്.

സർക്കാരിന്റെ നിഷേധാത്മക നിലപാടിനെതിരെയാണ് ഹർത്താൽ എന്ന് ഇരു പാർട്ടികളുടെയും നേതാക്കൾ അറിയിച്ചു. "സർക്കാർ കണ്ണ് തുറന്ന് ദുരന്തബാധിതരുടെ ദുരിതം കാണണം. അടിയന്തര സഹായം ഉറപ്പാക്കണം," ഇരു പാർട്ടികളുടെയും നേതാക്കൾ ആവശ്യപ്പെട്ടു.