ദുബൈ: എമിറേറ്റിലെ എല്ലാ സർക്കാർ സ്ഥാപനങ്ങളുടെയും വകുപ്പുകളുടെയും ഈദ് അൽ അദ്ഹ അവധി ദിനങ്ങൾ ദുബൈ ഗവൺമെന്റ് ഹ്യൂമൻ റിസോഴ്‌സ് ഡിപാർട്മെന്റ് (ഡി.ജി.എച്ച്.ആർ) പ്രഖ്യാപിച്ചു. ജൂൺ 5 വ്യാഴം മുതൽ 8 ഞായർ വരെയാണ് അവധി. ജൂൺ 9 തിങ്കളാഴ്ച മുതൽ പ്രവൃത്തി ദിവസമായിരിക്കും.

എന്നാൽ, ഷിഫ്റ്റ് അധിഷ്ഠിത ഷെഡ്യൂളുകളിൽ ജോലി ചെയ്യുന്നവർക്കും, അവശ്യ സേവന മേഖലയിൽ പ്രവർത്തിക്കുന്നവർക്കും ഈ അവധി ബാധകമായിരിക്കില്ല. അതേസമയം, തടസ്സമില്ലാത്ത പൊതു സേവന വിതരണം നിലനിർത്തി ഇവരുടെ ഡ്യൂട്ടി ഷെഡ്യൂൾ ബന്ധപ്പെട്ട അധികൃതർക്ക് തീരുമാനിക്കാവുന്നതാണ്.

യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്‌യാൻ, വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം, അദ്ദേഹത്തിന്റെ സഹോദരങ്ങൾ, യു.എ.ഇ സുപ്രീം കൗൺസിൽ അംഗങ്ങൾ, വിവിധ എമിറേറ്റുകളുടെ ഭരണാധികാരികൾ, സ്വദേശികളും വിദേശികളുമായ ജന സമൂഹങ്ങൾ എന്നിവർക്ക് ഡി.ജി.എച്ച്.ആർ ഈദ് അൽ അദ്ഹ ആശംസ നേർന്നു.

Dubai Government has announced Eid al-Adha holidays for public sector employees