ന്യൂഡൽഹി: 'ഓപ്പറേഷൻ സിന്ദൂർ', പഹൽഗാം ഭീകരാക്രമണം എന്നിവയുടെ പശ്ചാത്തലത്തിൽ ദേശീയ സുരക്ഷയെ രാഷ്ട്രീയവൽക്കരിക്കുകയും പ്രതിപക്ഷത്തെ ദുർബലപ്പെടുത്തുകയും ചെയ്യുന്നുവെന്ന് ആരോപിച്ച് പ്രധാനമന്ത്രി നരേന്ദ്ര മോദിക്കും ബിജെപിക്കുമെതിരെ രൂക്ഷമായ വിമർശനം ഉന്നയിച്ച് പശ്ചിമ ബംഗാൾ മുഖ്യമന്ത്രി മമത ബാനർജി. പാകിസ്ഥാനെതിരായ ഇന്ത്യൻ സൈന്യത്തിന്റെ നടപടിയെ 'ഓപ്പറേഷൻ സിന്ദൂർ' എന്ന് വിളിച്ച് കേന്ദ്ര സർക്കാർ രാഷ്ട്രീയ ലക്ഷ്യങ്ങൾക്കായി ഉപയോഗിക്കുന്നുവെന്ന് മമത കുറ്റപ്പെടുത്തി. 'ഓപ്പറേഷൻ സിന്ദൂർ' എന്ന പേര് സ്ത്രീകളോടുള്ള അനാദരവാണെന്നും, "എല്ലാ സ്ത്രീകൾക്കും ബഹുമാനമുണ്ട്" എന്നും മമത വ്യക്തമാക്കി.

"മോദിജി പറഞ്ഞത്, പ്രതിപക്ഷം രാജ്യത്തെ പ്രതിനിധീകരിക്കുമ്പോൾ ഞങ്ങൾ ഞെട്ടിപ്പോകുന്നു എന്നാണ്. ഇത് കേട്ടപ്പോൾ വലിയ സങ്കടം തോന്നി. ഒരു മന്ത്രി 'ഓപ്പറേഷൻ ബംഗാൾ' നടത്തുമെന്ന് പറഞ്ഞു." ബിജെപിയെ "ജുംല പാർട്ടി" എന്ന് വിശേഷിപ്പിച്ച മമത, തെറ്റായ വിവരങ്ങൾ പ്രചരിപ്പിച്ച് പ്രതിപക്ഷത്തെ ലക്ഷ്യം വയ്ക്കുകയാണെന്നും, "നിങ്ങൾ നുണകൾ പറയുന്നു, രാജ്യത്തെ കൊള്ളയടിക്കുകയാണ്" എന്നും ആരോപിച്ചു. അലിപുർദുവാറിൽ നടന്ന റാലിയിൽ മോദിയുടെ വിമർശനങ്ങൾക്ക് മറുപടിയായാണ് മമത ആരോപണം.

പശ്ചിമ ബംഗാൾ ടിഎംസി സർക്കാരിനെ "നിർമ്മാം സർക്കാർ" (ക്രൂര സർക്കാർ) എന്ന് പ്രധാനമന്ത്രി മോദി വിമർശിച്ചു. മുർഷിദാബാദിലും മാൾഡയിലും നടന്ന വർഗീയ അക്രമങ്ങൾ ടിഎംസി ഭരണത്തിന്റെ "ക്രൂരതയും നിസ്സംഗതയും" വെളിവാക്കുന്നുവെന്ന് അദ്ദേഹം ആരോപിച്ചു. അധ്യാപക നിയമന അഴിമതി ചൂണ്ടിക്കാട്ടി, ടിഎംസി "ആയിരക്കണക്കിന് അധ്യാപകരുടെയും അവരുടെ കുടുംബങ്ങളുടെയും ഭാവി നശിപ്പിക്കുന്നു" എന്നും മോദി കുറ്റപ്പെടുത്തി. പശ്ചിമ ബംഗാളിനെ ബാധിക്കുന്ന അഞ്ച് പ്രതിസന്ധികൾ അദ്ദേഹം പട്ടികപ്പെടുത്തി: 1) അക്രമവും നിയമരാഹിത്യവും, 2) സ്ത്രീകളുടെ അരക്ഷിതാവസ്ഥ, 3) യുവാക്കളുടെ തൊഴിലില്ലായ്മ, 4) വ്യവസ്ഥയിലുള്ള വിശ്വാസക്കുറവ്, 5) ദരിദ്രരുടെ അവകാശങ്ങൾ കവർന്നെടുക്കുന്ന "സ്വാർത്ഥ രാഷ്ട്രീയം".

മണിപ്പൂർ പ്രശ്നങ്ങൾ, പേപ്പർ ചോർച്ച, തൊഴിലില്ലായ്മ തുടങ്ങിയ വിഷയങ്ങളിൽ കേന്ദ്ര സർക്കാരിന്റെ പരാജയങ്ങൾ ചൂണ്ടിക്കാട്ടി ടിഎംസി അഞ്ച് 'പ്രതിചോദ്യങ്ങൾ' ഉന്നയിച്ചു. "ഞാൻ അവരെ വെല്ലുവിളിക്കുന്നു, ധൈര്യമുണ്ടെങ്കിൽ നാളെ തിരഞ്ഞെടുപ്പിന് തയ്യാറാകൂ. ബംഗാൾ ഈ വെല്ലുവിളി സ്വീകരിക്കാൻ തയ്യാറാണ്," മമത പറഞ്ഞു. ഭീകരവിരുദ്ധ പ്രവർത്തനങ്ങളിൽ ടിഎംസിയുടെ പങ്ക് വ്യക്തമാക്കി, "നേതാവ് അഭിഷേക് ബാനർജി ഭീകരതയ്‌ക്കെതിരെ എല്ലാ ദിവസവും സംസാരിക്കുന്നു" എന്നും അവർ കൂട്ടിച്ചേർത്തു. നീതി ആയോഗ് യോഗം ടിഎംസി ഒഴിവാക്കിയതിനെയും മോദി വിമർശിച്ചു, സംസ്ഥാന സർക്കാർ വികസനത്തേക്കാൾ രാഷ്ട്രീയത്തിനാണ് മുൻഗണന നൽകുന്നതെന്ന് ആരോപിച്ചു.