ജനീവ: ലോകാരോഗ്യ സംഘടനയുടെ (WHO) എക്‌സിക്യൂട്ടീവ് ബോര്‍ഡ് വൈസ് ചെയര്‍മാന്‍ പദവി സഊദി അറേബ്യക്ക്. 
2025 - 2028 കാലയളവിലേക്കാണ് നിയമനം. ജനീവയില്‍ ചേര്‍ന്ന ലോകാരോഗ്യ അസംബ്ലിയുടെ 78ാമത് സെഷന്റെ സമാപന യോഗത്തിലാണ് തിരഞ്ഞെടുപ്പ് നടന്നത്. ആരോഗ്യമന്ത്രി ഫഹദ് അല്‍ജലാജലിന് വേണ്ടി ആരോഗ്യ മന്ത്രാലയത്തിന്റെ അന്താരാഷ്ട്ര സഹകരണ അണ്ടര്‍സെക്രട്ടറി റകാന്‍ ഖാലിദ് ബിന്‍ ദുഹൈഷാണ് സെഷനിലേക്കുള്ള സൗദി അറേബ്യയുടെ പ്രതിനിധി സംഘത്തെ നയിച്ചത്.

വിവിധ അംഗരാജ്യങ്ങളെ പ്രതിനിധീകരിക്കുന്ന 34 അംഗങ്ങള്‍ അടങ്ങുന്ന WHO എക്‌സിക്യൂട്ടീവ് ബോര്‍ഡ് ആണ്, സംഘടനയുടെ ഉന്നതബോഡിയായ ലോകാരോഗ്യ അസംബ്ലിയുടെ പ്രമേയങ്ങളും ശുപാര്‍ശകളും നടപ്പാക്കേണ്ടത്. പ്രാദേശിക, അന്തര്‍ദേശീയ തലങ്ങളില്‍ മുന്‍ഗണനാ ആരോഗ്യ പരിപാടികളും നയങ്ങളും എക്‌സിക്യൂട്ടീവ് ബോര്‍ഡ് മേല്‍നോട്ടം വഹിക്കുന്നു.

ഓസ്‌ട്രേലിയ ആണ് എക്‌സിക്യൂട്ടീവ് ബോര്‍ഡിന്റെ തിരഞ്ഞെടുക്കപ്പെട്ട ചെയര്‍മാന്‍. ആരോഗ്യം, വൈകല്യം, വാര്‍ദ്ധക്യം വകുപ്പിന്റെ സെക്രട്ടറി ബ്ലെയര്‍ കോംലിയാണ് യോഗത്തില്‍ ഓസ്‌ട്രേലിയയെ പ്രതിനിധീകരിച്ചത്. നോര്‍വേ, ടോഗോ, തായ്‌ലന്‍ഡ് എന്നിവ ബോര്‍ഡിന്റെ മറ്റ് മൂന്ന് വൈസ് ചെയര്‍ സ്ഥാനങ്ങളിലേക്കും തിരഞ്ഞെടുക്കപ്പെട്ടു.

Saudi Arabia elected vice-chair of WHO executive board