മലപ്പുറം: പ്ലസ് വൺ ഏകജാലകം ആദ്യ അലോട്ട്‌മെന്റിൽ മലബാർ ജില്ലകളിൽ പുറത്തായത് 1.29 ലക്ഷം വിദ്യാർഥികൾ. പാലക്കാട് മുതൽ കാസർകോട് വരെ ആറു ജില്ലകളിൽ ഈ വർഷം 2,55,979 അപേക്ഷകളാണുണ്ടായിരുന്നത്.  ഇതിൽ 1,26,273 പേർക്കാണ് അവസരം ലഭിച്ചത്.1,29,706 വിദ്യാർഥികൾ പുറത്തായി. ഇനി അവശേഷിക്കുന്നത് 61,202 സീറ്റുകൾ മാത്രമാണ്. 

ആദ്യ അലോട്ട്‌മെന്റിൽ തന്നെ ജനറൽ, മുസ്‌ലിം സംവരണ സീറ്റുകൾ 99 ശതമാനവും നിറഞ്ഞു. ജനറൽ വിഭാഗത്തിൽ 80,449 സീറ്റിലേക്കാണ് അലോട്ട്‌മെന്റ് നടത്തിയത്. ഇതിൽ പാലക്കാട് ജില്ലയിൽ 17 സീറ്റുകളാണ് ആകെ ഒഴിഞ്ഞു കിടക്കുന്നത്. മലബാറിലെ മറ്റു ജില്ലകളിൽ സീറ്റ് പൂർണമായി. മുസ്‌ലിം സംവരണത്തിൽ 8634 സീറ്റിൽ 8626 സീറ്റിലും അലോട്ട്‌മെന്റ് നടത്തി. പാലക്കാട് ജില്ലയിൽ ആറ് സീറ്റ് മാത്രമാണ് ഇനി ബാക്കിയുള്ളത്. സംവരണ സീറ്റുകളിൽ മുസ്‌ലിം വിഭാഗം ഒഴിച്ച് മറ്റുള്ളവയിലെല്ലാം മിക്ക ജില്ലകളിലും സീറ്റുകൾ ഒഴിഞ്ഞുകിടക്കുകയാണ്.

ഈഴവ, തിയ്യ വിഭാഗത്തിൽ മലബാറിലെ  8956 സീറ്റിൽ  204 സീറ്റുകൾ ഒഴിഞ്ഞു കിടക്കുകയാണ്. ആഗ്ലോ ഇന്ത്യൻ വിഭാഗത്തിന് സംവരണം ചെയ്ത 3630 സീറ്റിൽ  560 എണ്ണത്തിലാണ് അലോട്ട്‌മെന്റ് നടന്നത്. 3070 സീറ്റും ഒഴിഞ്ഞു കിടക്കുകയാണ്. ക്രിസ്ത്യൻ ഒ.ബി.സിയിൽ 1091 സീറ്റിൽ 1044 സീറ്റും, ഹിന്ദു ഒ.ബി.സിയിൽ 3330 സീറ്റിൽ 738 സീറ്റും ഒഴിഞ്ഞു കിടക്കുന്നു.

പട്ടികജാതി വിഭാഗത്തിലെ  24,030 സീറ്റിൽ 12,816 സീറ്റുകളാണ് ഉൾപ്പെട്ടത്. 11,214 എണ്ണം ഒഴിവുണ്ട്. പട്ടികവർഗ വിഭാഗത്തിന് അനുവദിച്ച 15751 സീറ്റിൽ 2613 എണ്ണത്തിലാണ് ഒന്നാം അലോട്ട്‌മെന്റ് നടന്നത്. 13138 സീറ്റുകൾ ബാക്കിയുണ്ട്. ശാരീരക വെല്ലുവിളികൾ നേരിടുന്നവരുടെ വിഭാഗത്തിൽ ഉൾപ്പെട്ടവർക്ക് സംവരണം ചെയ്ത 3325 സീറ്റിൽ 1703 എണ്ണമാണ് ആദ്യ അലോട്ട്‌മെന്റിൽ ഉൾപ്പെട്ടത്. 1622 എണ്ണം ബാക്കിയുണ്ട്.

കാഴ്ചശക്തി കുറഞ്ഞവരുടെ വിഭാഗത്തിൽ 671 സീറ്റിൽ 79 എണ്ണമാണ് അലോട്ട്‌മെന്റ് നടത്തിയത്. 592 സീറ്റും ഒഴിഞ്ഞു കിടക്കുകയാണ്.  ഭാഷാ ന്യൂനപക്ഷ വിഭാഗത്തിൽ കാസർകോട്, പാലക്കാട് ജില്ലകളിൽ മാത്രമാണ് സീറ്റുള്ളത്. ഇതിലെ 215  സീറ്റിൽ പാലക്കാട്ട് ഒരെണ്ണമാണ് ഇനി  ഒഴിവുള്ളത്. ധീവര വിഭാഗത്തിനുള്ള 2239  സീറ്റിൽ 1698 എണ്ണം ഒഴിഞ്ഞു കിടക്കുകയാണ്. വിശ്വകർമ വിഭാഗത്തിൽ 2239 സീറ്റിൽ 2183 എണ്ണവും ആദ്യ അലോട്ട്‌മെന്റിൽ ഉൾപ്പെട്ടു. 56 എണ്ണമാണ് ശേഷിക്കുന്നത്. കുശവ വിഭാഗത്തിന് 1391 സീറ്റിൽ 526 സീറ്റിൽ അലോട്ട്‌മെന്റായി. 865 എണ്ണം ബാക്കിയുണ്ട്. 

സാമ്പത്തികമായി പിന്നാക്കം നിൽക്കുന്ന വിഭാഗത്തിൽപ്പെട്ടവർക്കുള്ള 12,264 സീറ്റുകളിൽ 3776 സീറ്റുകൾ അലോട്ട്‌മെന്റിൽ ഉൾപ്പെട്ടു. 8488 സീറ്റുകൾ ശേഷിക്കുന്നുണ്ട്. കുടുമ്പി വിഭാഗത്തിലെ 1391 സീറ്റിൽ 15 എണ്ണമാണ് അലോട്ട്‌മെന്റിൽ ഉൾപ്പെട്ടത്. 1376 സീറ്റുകളും ഒഴിവാണ്. സ്‌പോർട്‌സ് ക്വാട്ടയിൽ 4753 അപേക്ഷകരാണുള്ളത്. 4117 സീറ്റുകളാണ് ആകെയുള്ളത്. ഇതിൽ 3453  സീറ്റുകളാണ് ആദ്യ അലോട്ട്‌മെന്റിൽ ഉൾപ്പെട്ടത്. 664 സീറ്റ് ഒഴിഞ്ഞു കിടക്കുകയാണ്. സംവരണ സീറ്റുകളിൽ അപേക്ഷകരില്ലാത്ത പക്ഷം ഇവ മുഴുവനും ജനറലിലേക്ക് മാറ്റും.