ദുബൈ: പുതിയ ട്രാഫിക് നിയമം പ്രാബല്യത്തില്‍ വന്നതോടെ കുവൈത്തില്‍ ട്രാഫിക് നിയമലംഘനങ്ങള്‍ 83 ശതമാനം കുറഞ്ഞതായി ആഭ്യന്തര മന്ത്രാലയം അറിയിച്ചു.

സര്‍വിലന്‍സ് ക്യാമറകളില്‍ റെക്കോര്‍ഡ് ചെയ്ത ട്രാഫിക് നിയമ ലംഘനങ്ങള്‍ കഴിഞ്ഞ മേയ് മാസത്തെ അപേക്ഷിച്ച് 83 ശതമാനം കുറവാണ് രേഖപ്പെടുത്തിയിട്ടുള്ളത്. ഈ നിയമം പ്രാബല്യത്തില്‍ വരുന്നതിന് മുമ്പ് ആഴ്ചയില്‍ 60,000 ലംഘനങ്ങള്‍ റെക്കോര്‍ഡ് ചെയ്യപ്പെട്ടിരുന്നെങ്കില്‍, ഇപ്പോള്‍ ഇത് ആഴ്ചയില്‍ 18,000 നിയമലംഘനങ്ങളായി കുറഞ്ഞു.

മന്ത്രാലയത്തിന്റെ കണക്കുകള്‍ പ്രകാരം, 2024 മേയില്‍ 168,208 നിയമലംഘനങ്ങള്‍ റിപ്പോര്‍ട്ട് ചെയ്യപ്പെട്ടിരുന്നു. എന്നാല്‍ 2025 മേയില്‍ ഇത് 28,464 ആയി കുറഞ്ഞു. അമിത വേഗത, ട്രാഫിക് സിഗ്നല്‍ ലംഘനം തുടങ്ങിയ നിയമ ലംഘനങ്ങളില്‍ ഗണ്യമായ കുറവാണ് രേഖപ്പെടുത്തിയിട്ടുള്ളത്.

ഈ നിയമം അപകട മരണങ്ങള്‍ കുറക്കുന്നതിലും വലിയൊരു പങ്ക് വഹിച്ചിട്ടുണ്ട്. 2024 മേയില്‍ 22 പേര്‍ മരിച്ചിരുന്നു, എന്നാല്‍ 2025 മേയില്‍ ഇത് 10 ആയി ചുരുങ്ങി.

ഡ്രൈവിംഗ് സമയത്ത് മൊബൈല്‍ ഫോണ്‍ ഉപയോഗിക്കല്‍, സീറ്റ് ബെല്‍റ്റ് ധരിക്കാതിരിക്കല്‍ തുടങ്ങിയ നിയമ ലംഘനങ്ങളില്‍ 75 ശതമാനം കുറവ് രേഖപ്പെടുത്തിയിട്ടുണ്ട്. 2024ല്‍ 89,153 ലംഘനങ്ങള്‍ റെക്കോര്‍ഡ് ചെയ്യപ്പെട്ടിരുന്നത് 2025ല്‍ 22,574 ആയി കുറഞ്ഞു.

നിയമ ലംഘനങ്ങള്‍ കുറഞ്ഞത് പുതിയ നിയമത്തിന്റെ വിജയമായാണ് മന്ത്രാലയം വിലയിരുത്തുന്നത്. നിയമം കര്‍ശനമായി നടപ്പാക്കിയതും പൊതുബോധവല്‍ക്കരണ പ്രചാരണങ്ങളുമാണ് ഈ മികച്ച മാറ്റത്തിന് കാരണം എന്നാണ് അധികൃതര്‍ വിലയിരുത്തുന്നത്.

Kuwait's Ministry of Interior has reported an 83% decrease in traffic violations following the enforcement of stricter traffic laws. Surveillance data shows a significant drop in offenses like speeding and red-light violations, along with a 55% reduction in road fatalities. The new law imposes heavier fines and penalties, leading to improved road discipline.