ഒട്ടുമിക്ക എല്ലാ വീടുകളിലും മൊബൈല്‍ ഫോണ്‍, ലാപ്‌ടോപ്പ്, ഇയര്‍ഫോണ്‍, സ്മാര്‍ട്ട് വാച്ച്, ഇ റീഡര്‍ തുടങ്ങി നിരവധി ഇലക്ട്രിക് ഉപകരണങ്ങള്‍ ഉപയോഗിക്കുന്നവരാണ് മിക്കവരും. ഇവയുടെയൊക്കെ ചാര്‍ജറുകളോ നമ്മുടെ ദൈനംദിന ജീവിതത്തിന്റെ ഭാഗവുമായിരിക്കുന്നു. 

എന്നാല്‍ പല വീടുകളിലും കാണാം ചാര്‍ജറുകള്‍ ഉപയോഗിച്ച ശേഷം സൗകര്യത്തിനായി ഈ ചാര്‍ജറുകള്‍ പ്ലഗ് പോയിന്റില്‍ തന്നെ വയ്ക്കുന്നത്. എന്നാല്‍ ഇത് അമിതമായ വൈദ്യതി ചെലവിനും അപകടങ്ങള്‍ക്കും കാരണമാകുന്നു. സ്വിച്ച് ഓഫ് ചെയ്യാതെ ചാര്‍ജറുകള്‍ പ്ലഗ് പോയിന്റില്‍ വയ്ക്കുമ്പോള്‍ ഉണ്ടാകുന്ന പ്രശ്‌നങ്ങള്‍ എന്തൊക്കെയാണെന്നു നോക്കാം.

ഓരോ ഇലക്ട്രോണിക് ഉപകരണത്തിന്റെയും ചാര്‍ജറുകള്‍ അവയുടെ പ്രവര്‍ത്തനരീതിക്കും ആവശ്യമായ പവറിനും അനുസരിച്ച് വ്യത്യസ്തമായിരിക്കും. ഒരു സാധാരണ ചാര്‍ജര്‍ ആണെങ്കില്‍ ചാര്‍ജ് ചെയ്യുന്നത് വാള്‍ പ്ലഗില്‍ നിന്ന് ലഭിക്കുന്ന എസി(ആള്‍ട്ടര്‍നേറ്റിങ് കറന്റ്) വൈദ്യുതിയെ ഈ ഉപകരണം പ്രവര്‍ത്തിക്കാനും ബാറ്ററി ചാര്‍ജ് ചെയ്യാനും ആവശ്യമുള്ള കുറഞ്ഞ വോള്‍ട്ടേജിലുള്ള ഡിസി (ഡയറക്ട് കറന്റ്) വൈദ്യുതിയാക്കി മാറ്റുകയാണ്. സ്വിച്ച് ഓഫ് ചെയ്യാതെ ഒരു ചാര്‍ജര്‍ പ്ലഗില്‍ കുത്തിയിട്ടിരുന്നാല്‍ അത് വളരെ ചെറിയ അളവിലാണെങ്കിലും വൈദ്യുതി വലിക്കുന്നതായിരിക്കും.

ഇങ്ങനെ സ്വിച്ച് ഓഫ് ചെയ്യാതെ പ്ലഗ് ചെയ്തിട്ടുള്ള ഉപകരണങ്ങള്‍ വൈദ്യുതി ഉപയോഗിക്കുന്നതിനെ വാംപയര്‍ പവര്‍ അല്ലെങ്കില്‍ സ്റ്റാന്‍ഡ്‌ബൈ പവര്‍ എന്നു വിളിക്കുന്നു. ഈ ഊര്‍ജത്തിന്റെ ഒരു ഭാഗം താപമായി പുറന്തള്ളപ്പെടുകയും ചെറിയൊരു ഭാഗം ചാര്‍ജറിലെ നിയന്ത്രിത സര്‍ക്യൂട്ടുകളുടെ പ്രവര്‍ത്തനത്തിനു ഉപയോഗിക്കപ്പെടുകയും ചെയ്യുന്നു. 

ഒറ്റപ്പെട്ട ഒരു മൊബൈല്‍ ചാര്‍ജറോ ലാപ്‌ടോപ് ചാര്‍ജറോ മാത്രം പ്ലഗ് ചെയ്തിരുന്നാല്‍ ഉണ്ടാവുന്ന വൈദ്യുതി നഷ്ടം വളരെ കുറഞ്ഞ അളവിലായിരിക്കും. എന്നാല്‍ ഒരു വീട്ടിലെ ഒട്ടുമിക്ക ചാര്‍ജറുകളും മറ്റു ഇലക്ട്രോണിക് ഉപകരണങ്ങളുമൊക്കെ ഇതുപോലെ പ്ലഗ് ചെയ്തുവച്ചാല്‍ ഉണ്ടാകുന്ന മൊത്തത്തിലുള്ള വൈദ്യുതി നഷ്ടം എത്ര വലുതായിരിക്കും. ചാര്‍ജറുകള്‍ മാത്രമല്ല ടിവിയും മിക്‌സിയും ഫ്രിഡ്ജും തുടങ്ങി എല്ലാത്തിലും ഈ വാംപയര്‍ പവര്‍ പ്രതിഭാസം കാണാന്‍ സാധിക്കും. 

പുതുതായി വിപണിയില്‍ എത്തുന്ന പല ചാര്‍ജറുകളിലും ഊര്‍ജക്ഷമതയുള്ള സ്മാര്‍ട്ട് സംവിധാനങ്ങള്‍ ഉള്‍ക്കൊള്ളിച്ചിരിക്കുന്നുണ്ട്. അതുകൊണ്ട് തന്നെ 'വാംപയര്‍ പവര്‍' മൂലമുണ്ടാകുന്ന വൈദ്യുതി ഉപയോഗം താരതമ്യേന കുറവായിരിക്കും. ചാര്‍ജ് ചെയ്യാനുള്ള ഉപകരണം കണക്ട് ചെയ്തിട്ടില്ലെങ്കിലിവ സ്വയം സ്ലീപ് മോഡിലേക്ക് തന്നെ മാറിപ്പോവും.  

എന്നാലും സ്മാര്‍ട്ട് ചാര്‍ജറുകള്‍ ആണെന്നു കരുതി ദീര്‍ഘനേരം പ്ലഗ് പോയിന്റില്‍ത്തന്നെ വയ്ക്കുന്നത് അവയുടെ ആയുസിനെ പ്രതികൂലമായി തന്നെ ബാധിച്ചേക്കാം. വാംപയര്‍ പവറിലൂടെയാണെങ്കിലും ചാര്‍ജറിലെത്തുന്ന ചെറിയ അളവിലുള്ള വൈദ്യുതി പോലും താപമായി പുറന്തള്ളപ്പെടുമ്പോള്‍ ചാര്‍ജര്‍ ചൂടാകാനുള്ള സാധ്യതയുണ്ട്.

അമിതമായി ചൂടാകുകയോ കേടുപാടുകള്‍ സംഭവിക്കുകയോ ചെയ്യുന്ന ചാര്‍ജറുകള്‍ ഉടന്‍ തന്നെ മാറ്റി വാങ്ങേണ്ടതും സുരക്ഷയുടെ കാര്യത്തില്‍ പ്രധാനമാണ്. ഇത് ഷോര്‍ട്ട് സര്‍ക്യൂട്ട് പോലുള്ള അപകടങ്ങള്‍ ഒഴിവാക്കാനും സഹായിക്കും.

അതുകൊണ്ട് തന്നെ ഉപയോഗം കഴിഞ്ഞാല്‍ ഉടന്‍തന്നെ ചാര്‍ജറുകള്‍ പ്ലഗ് ഓഫ് ചെയ്യാന്‍ ശ്രമിക്കുക. ഇത് നിങ്ങളുടെ വൈദ്യുതി ബില്‍ കുറയ്ക്കാനും സുരക്ഷ ഉറപ്പാക്കാനും സഹായിക്കുന്നതാണ്.