മൂവാറ്റുപുഴ: വിദ്യാഭ്യാസ ജില്ലാ ദേശീയ അധ്യാപക ദിനാഘോഷം തര്‍ബിയത്ത് ട്രസ്റ്റ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ നഗരസഭാ ചെയര്‍പേഴ്‌സണ്‍ ഉഷ ശശീധരന്‍ ഉദ്ഘാടനം ചെയ്തു. വിദ്യാഭ്യാസ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ പ്രമീള ഗിരീഷ് കുമാര്‍ അധ്യക്ഷത വഹിച്ചു. ദേശീയ അവാര്‍ഡ് ജേതാക്കളായ മുന്‍അധ്യാപകരായ പി.എസ് കരുണാകരന്‍ നായര്‍, എം രാമചന്ദ്രന്‍നായര്‍ എന്നിവരെ നഗരസഭാ കൗണ്‍സിലര്‍ പി.വൈ നൂറുദ്ദീന്‍ ആദരിച്ചു. പ്രൊഫസര്‍.എം.പി മത്തായി അധ്യാപക ദിന സന്ദേശം നല്‍കി.
ഗവണ്‍മെന്റ് ഈസ്റ്റ് ഹൈസ്‌കൂളില്‍ നടന്ന അധ്യാപകദിനാഘോഷം നഗരസഭാ പ്രതിപക്ഷനേതാവ് കെ.എ അബ്ദുല്‍സലാം ഉദ്ഘാടനം ചെയ്തു. ഹെഡ്മാസ്റ്റര്‍ കെ തിലകന്‍ അധ്യക്ഷതവഹിച്ചു. ദേശീയ അധ്യാപക പുരസ്‌കാര ജേതാക്കളായ ഭാസ്‌കരന്‍ സാറിനെയും അബ്ദുല്‍ മനാഫ് സാറിനെയും ബീയാമ്മ ബീവി ടീച്ചറെയും മികച്ച പ്രഭാഷകനും വേദവിവര്‍ത്തകനുമായ അരവിന്ദന്‍ സാറിനെയും ചടങ്ങില്‍ ആദരിച്ചു.
സൗത്ത് മാറാടി ഗവണ്‍മെന്റ് യു.പി.സ്‌കൂളില്‍ നടന്ന അധ്യാപക ദിനാഘോഷം മാറാടി പഞ്ചായത്ത് പ്രസിഡന്റ് ലത ശിവന്‍ ഉദ്ഘാടനം ചെയ്തു. സ്‌കൂള്‍ ലീഡര്‍ വൈഷ്ണവ് ബിനു അധ്യക്ഷത വഹിച്ചു. സ്‌കൂളിലെ പൂര്‍വ്വ അധ്യാപകരായ എല്‍.വസുമതി അമ്മ, ലീലാമ ജോസഫ് എന്നിവരെ ആദരിച്ചു.
മുവാറ്റുപുഴ എസ്.എന്‍.ഡി.പി ഹൈസ്‌കൂളില്‍ നടന്ന അധ്യാപക ദിനാഘോഷം നഗരസഭാ ചെയര്‍പേഴ്‌സണ്‍ ഉഷ ശശീധരന്‍ ഉദ്ഘാടനം ചെയ്തു. മാനേജര്‍ വി.കെ നാരായണന്‍ അധ്യക്ഷത വഹിച്ചു.
മുവാറ്റുപുഴ എം.ഐ.ഇ.ടി ഹൈസ്‌കൂളില്‍ നടന്ന അധ്യാപകദിനാഘോഷം നഗരസഭാ ക്ഷേമകാര്യ സ്റ്റാന്റിങ് കമ്മിറ്റി ചെയര്‍മാന്‍ എം.എ സഹീര്‍ ഉദ്ഘാടനം ചെയ്തു. കെ.വൈ സാദിക്ക് അധ്യക്ഷത വഹിച്ചു. മുന്‍അധ്യാപകരായ കെ.എ.കെ മീരാന്‍, പി.ടി വര്‍ക്കി, ബീവി ടീച്ചര്‍ എന്നിവരെ ആദരിച്ചു.
പെരുമ്പാവൂര്‍: അദ്ധ്യാപക ദിനത്തോടനുബന്ധിച്ച് പെരുമ്പാവൂര്‍ ബോയ്‌സ് ഹയര്‍ സെന്‍ഡണ്ടറി സ്‌കൂളില്‍ നടന്ന അധ്യാപകദിനാഘോഷം എല്‍ദോസ് കുന്നപ്പിള്ളി എം.എ.എ ഉദ്ഘാടനം ചെയ്തു. മുനിസിപ്പല്‍ ചെയര്‍പ്പേഴ്‌സണ്‍ സതി ജയകൃഷ്ണന്‍ അധ്യക്ഷത വഹിച്ച ചടങ്ങില്‍ മുന്‍ മുനിസിപ്പല്‍ ചെയര്‍മാന്‍മാരായ കെ.എം.എ സലാം, എന്‍.സി മോഹനന്‍ തുടങ്ങിയവര്‍ മുഖ്യാധിതികളായിരുന്നു.
തണ്ടേക്കാട് ജമാഅത് എച്ച്.എസ്.എസിലെ അധ്യാപക ദിനാഘോഷത്തില്‍ പ്രധാന അധ്യാപകന്‍ വി.പി അബൂബക്കര്‍ അധ്യാപകദിന സന്ദേശം നല്‍കി. സ്റ്റാഫ് സെക്രട്ടറി സജീന.കെ.അലിയാര്‍, എസ്.ആര്‍.ജി കണ്‍വീനര്‍ കെ.എ നൗഷാദ്, ഇ.എം നജീബ്, മുഹമ്മദ് അലി ഫൈസല്‍ എന്നിവര്‍ സംസാരിച്ചു. ക്ലാസ്സ് ടീച്ചര്‍മാരെ ആദരിക്കല്‍, വിദ്യാര്‍ഥികള്‍ അധ്യാപകരായ മോഡല്‍ ക്ലാസ് എന്നിവയും നടന്നു.
പെരുമ്പാവൂര്‍ താലൂക്ക് ആശുപത്രിയുടെ നേതൃത്വത്തില്‍ അധ്യാപക ദിനത്തോടനുബന്ധിച്ച് പെരുമ്പാവൂര്‍ ബോയ്‌സ് എച്ച്.എസ്.എസില്‍ സംഘടിപ്പിച്ച പഴമയിലേക്കൊരു മടക്കയാത്ര എന്ന പരിപാടി ശ്രദ്ധേയമായി. ജീവിതശൈലി രോഗങ്ങളും പുകയില നിയന്ത്രണവും എന്ന വിഷയത്തെ ആസ്പദമാക്കി സംഘടിപ്പിച്ച പരിപാടി മുനിസിപ്പല്‍ ചെയര്‍പേഴ്‌സണ്‍ സതി ജയകൃഷ്ണന്‍ ഉദ്ഘാടനം ചെയ്തു.
പോഷകമൂല്യമുള്ള പ്രഭാതഭക്ഷണം എന്ന വിഷയത്തെ സംബന്ധിച്ചുള്ള മത്സരം ഏറെ വ്യത്യസ്ഥത പുലര്‍ത്തി. ഭക്ഷണം പാകം ചെയ്ത് കൊണ്ടുവന്ന വിദ്യാര്‍ഥികളില്‍ മൂന്ന് പേര്‍ സമ്മാനാര്‍ഹരായി. ആശുപത്രി സൂപ്രണ്ട് ഡോ.സി സുമ സമ്മാനദാനം നിര്‍വഹിച്ചു. വാര്‍ഡ് കൗണ്‍സിലര്‍ ഉഷ ദിവാകരന്‍ അധ്യക്ഷത വഹിച്ചു.