റിയാദ്: ഉംറ വിസ ലഭിക്കാന്‍ സഊദ് അറേബ്യയിലെ ഏതെങ്കിലും ഹോട്ടല്‍ ബുക്കിങ് നടത്തിയതിന്റെ തെളിവ് നിര്‍ബന്ധമാക്കി. ഡിജിറ്റല്‍ പ്ലാറ്റ്‌ഫോമായ 'നുസുക് മസാര്‍' വഴി ഹോട്ടല്‍ ബില്ലുകള്‍ കണ്‍ഫോം ചെയ്യാതെയും രേഖപ്പെടുത്താതെയും വിദേശ തീര്‍ഥാടകര്‍ക്ക് ഇനി ഉംറ വിസ അനുവദിക്കില്ലെന്ന് സഊദി അറേബ്യ പ്രഖ്യാപിച്ചു. ഹജ്ജ്, ഉംറ മന്ത്രാലയം അതിന്റെ ഔദ്യോഗിക എക്‌സ് അക്കൗണ്ട് വഴിയാണ് പ്രഖ്യാപനം നടത്തിയത്.

പുതിയ നിയമപ്രകാരം കമ്പനികള്‍, സ്ഥാപനങ്ങള്‍, അംഗീകൃത വിദേശ ഏജന്റുമാര്‍ എന്നിവരുള്‍പ്പെടെ എല്ലാ ഉംറ സേവന ദാതാക്കളും ടൂറിസം മന്ത്രാലയം ലൈസന്‍സുള്ള ഹോട്ടലുകളില്‍ മാത്രമേ താമസ സൗകര്യം ബുക്ക് ചെയ്യാവൂ. ഏതെങ്കിലും ഉംറ വിസ നല്‍കുന്നതിന് മുമ്പ് എല്ലാ ഹോട്ടല്‍ ബുക്കിങ് രേഖകളും നുസുക് മസാര്‍ പ്ലാറ്റ്‌ഫോം വഴി സമര്‍പ്പിക്കുകയും അംഗീകരിക്കുകയും വേണം.

താമസ തട്ടിപ്പ് തടയുന്നതിനും അമിത ബുക്കിംഗ് തടയുന്നതിനും താമസ നിലവാരം ഉറപ്പാക്കുന്നതിനുമാണ് ഈ നിയമമെന്ന് അധികൃതര്‍ അറിയിച്ചു. കാലതാമസമോ അപൂര്‍ണ്ണമായ ഡോക്യുമെന്റേഷനോ വിസ തടയപ്പെടാനോ പിഴ ലഭിക്കാനോ കാരണമായേക്കാമെന്ന് ഹജ്ജ് ഉംറ മന്ത്രാലയം മുന്നറിയിപ്പ് നല്‍കി.

പുതിയ മാറ്റത്തിന്റെ ലക്ഷ്യങ്ങള്‍

* തീര്‍ത്ഥാടകര്‍ക്ക് നല്‍കുന്ന സേവനങ്ങളുടെ ഗുണനിലവാരവും കാര്യക്ഷമതയും വര്‍ദ്ധിപ്പിക്കല്‍

* മൊത്തത്തിലുള്ള തീര്‍ത്ഥാടന അനുഭവം മെച്ചപ്പെടുത്തല്‍

* തീര്‍ത്ഥാടകരുടെ അവകാശങ്ങള്‍ സംരക്ഷിക്കലും അനധികൃത രീതികള്‍ തടയലം

അതേസമയം, ഹജ്ജ് സീസണ്‍ സമാപിച്ചതിന് പിന്നാലെ ഈ മാസം പത്തിനാണ് ഉംറ തീര്‍ത്ഥാടനത്തിനുള്ള നടപടികള്‍ക്ക് തുടക്കമായത്. ഹജ് സീസണിനോട് അനുബന്ധിച്ച് നിര്‍ത്തിവെച്ച ഉംറ വിസാ നടപടികളാണ് ഹജ്ജ് തീര്‍ത്ഥാടനം സമാപിച്ചതോടെ പുനരാരംഭിച്ചത്. വിസ നല്‍കുന്നതിനുള്ള പ്രധാന തീയതികള്‍, വിദേശ ഏജന്റുമാരുമായുള്ള കരാറുകള്‍, രാജ്യത്തിന് പുറത്തുനിന്നുള്ള തീര്‍ഥാടകരുടെ പ്രവേശനത്തിനും പുറപ്പെടലിനുമുള്ള സമയപരിധി തുടങ്ങിയ എല്ലാ പ്രസക്ത വിവരങ്ങളും ഉള്‍പ്പെടുത്തിയ കലണ്ടര്‍ മന്ത്രാലയം പുറത്തിറക്കിരുന്നു.

Riyadh: The Kingdom of Saudi Arabia (KSA) has announced that international pilgrims will no longer be granted an Umrah visa without first confirming and documenting their housing contracts through the 'Nusuk Masar' digital platform.