കഠിനംകുളം: മൂന്ന് പതിറ്റാണ്ട് ആയിരക്കണക്കിന് വിദ്യാര്‍ഥികള്‍ക്ക് വിദ്യ പകര്‍ന്നു നല്‍കിയ ഗുരുനാഥന്, അധ്യാപക ദിനത്തില്‍ ആദരവ് ഏറ്റുവാങ്ങാനെത്തിയപ്പോള്‍ വിദ്യാലയമുറ്റത്ത് അന്ത്യം. അധ്യാപക ദിനമായ ഇന്നലെ കണിയാപുരം മുസ്ലിം ഹൈസ്‌ക്കൂളില്‍ ഗുരുവന്ദനം പരിപാടിയില്‍ പങ്കെടുക്കവേയാണ് ഈ സ്‌കൂളിലെ പ്രഥമാധ്യാപകനായിരുന്ന കഴക്കൂട്ടം ചന്തവിള കല്ല് വിള വീട്ടില്‍ പങ്കജാക്ഷന്‍ സദസ്സിന് മുന്നില്‍ കുഴഞ്ഞു വീണ് മരിച്ചത്.
വിദ്യാര്‍ഥികളുടെ ആദരവ് ഏറ്റുവാങ്ങിയ പങ്കജാക്ഷന്‍ ജീവിത ശൈലി എന്ന വിഷയത്തില്‍ കുട്ടികളോട് സംസാരിക്കുകയായിരുന്നു. മാറി
മറിഞ്ഞ ആഹാരരീതികളും അനാവശ്യമായ ശീലങ്ങളുമാണ് ക്യാന്‍സര്‍ പോലുള്ള മാരക രോഗങ്ങള്‍ക്ക് കാരണം. ഇതില്‍ നിന്നൊക്കെ മോചനം വേണമെങ്കില്‍ പഴയ കാല ജീവിത രീതി ശീലമാക്കണമെന്നു പറയുന്നതിനിടെയാണ് അദ്ദേഹം കുഴഞ്ഞു വീണത്. പ്രിയപ്പെട്ട അധ്യാപകന്റെ അവസാന വാക്കുകളാണ് കേള്‍ക്കുന്നതെന്ന് സദസ്സിലുണ്ടായിരുന്നവര്‍ ചിന്തിക്കുക പോലും ചെയ്തിരുന്നില്ല. സഹധര്‍മ്മിണിയും ഇതേ സ്‌കൂളില്‍ നിന്നും അധ്യാപികയായി വിരമിച്ച ശാരദാമണി ടീച്ചറും ഒപ്പമുണ്ടായിരുന്നു.
ഇന്നലെ രാവിലെ വീട്ടില്‍ നിന്നും പരിപാടിയില്‍ പങ്കെടുക്കാന്‍ പുറപ്പെടുമ്പോള്‍ എല്ലാ ദിവസത്തേക്കാളും അദ്ദേഹം സന്തോഷവാനായിരുന്നുവെന്നും സ്‌കൂളിലെത്തിയപ്പോള്‍ അതിന്റെ തോത് വര്‍ധിച്ചിരുന്നതായും ടീച്ചര്‍ പറയുന്നു.
33 വര്‍ഷം അധ്യാപകനായിരുന്നപ്പോഴും അതിനു ശേഷവും മാതൃകാപരമായ ജീവിതമായിരുന്നു അദ്ദേഹം നയിച്ചിരുന്നത്. സ്വന്തമായി കാറും ബൈക്കുമുണ്ടായിട്ടും കാല്‍ നടയായും സൈക്കിളിലുമായിരുന്നു സ്‌കൂളില്‍ എത്തിയിരുന്നത്. എഴുപത്തിമൂന്നാമത്തെ വയസിലും നാടിന്റെ സാംസ്‌കാരിക പരിപാടികളില്‍ നിറസാനിധ്യവുമായിരുന്നു.
പ്രിയപ്പെട്ട വിദ്യാലയമുറ്റത്ത് ഒരു അധ്യാപക ദിനത്തില്‍, വിദ്യാര്‍ഥികളോട് സംസാരിക്കുന്നതിനിടയില്‍ വിട പറഞ്ഞത് പ്രിയ അധ്യാപകന്റെ സ്വപ്ന സാക്ഷാത്കാരം കൂടിയായിരിക്കുമെന്നാണ് വിദ്യാര്‍ഥികളുടെ പ്രതീക്ഷ.

ഗുരുനാഥന്മാരെ ആദരിക്കാന്‍
സ്‌കൂള്‍ മുറ്റത്തെ മാവിന്‍ ചുവട്ടില്‍ അവര്‍ ഒത്തുകൂടി
കിളിമാനൂര്‍: ഗുരുനാഥന്മാരെ ആദരിക്കാന്‍ സ്‌കൂള്‍ മുറ്റത്തെ മാവിന്‍ചുവട്ടില്‍ അവര്‍ ഒത്തുകൂടി. പേരൂര്‍ എം. എം .യു. പി സ്‌കൂളിലെ വിദ്യാര്‍ഥികളും പി.ടി.എയും ചേര്‍ന്നാണ് പൂര്‍വകാല അധ്യാപകരെ ആദരിക്കാന്‍ വികാരനിര്‍ഭരമായ ചടങ്ങ് സംഘടിപ്പിച്ചത്.
1962 ല്‍ സ്‌കൂള്‍ തുടങ്ങുമ്പോള്‍ തന്നെയുണ്ടായിരുന്ന മാവിന്‍ ചുവട്ടിലാണ് ഗുരു വന്ദനം ചടങ്ങ് സംഘടിപ്പിച്ചത് .സ്‌കൂള്‍ ആരംഭിക്കുന്ന സമയത്തെ പ്രധാനാധ്യാപകന്‍ കെ.പി.വാസുദേവന്‍ പിള്ള അടക്കം പൂര്‍വ്വ അധ്യാപകരും പൂര്‍വ വിദ്യാര്‍ഥികളും രക്ഷിതാക്കളും നാട്ടുകാരും ചടങ്ങില്‍ പങ്കെടുത്തു. ജനപ്രതിനിധികളായ സന്തോഷ് കുമാര്‍ ,നിസ്സാം പുലിക്കുഴി ,മുന്‍ ജില്ലാ പഞ്ചായത്ത് അംഗം എം .എം. താഹ , പൂര്‍വ്വ വിദ്യാര്‍ഥിയും തഞ്ചാവൂര്‍ ശാസ്ത്ര സര്‍വ്വകലാശാലയിലെ അസി.പ്രൊഫസറുമായ സുധീര്‍ ,പ്രധാനാധ്യാപകന്‍ അജി കുമാര്‍ എന്നിവര്‍ നേതൃത്വം നല്‍കി.