അടുക്കളയില്‍ ഏറ്റവും അധികം ഉപയോഗിക്കുന്ന പാത്രങ്ങളിലൊന്നാണ് നോണ്‍സ്റ്റിക് പാത്രങ്ങള്‍. ചായ ഉണ്ടാക്കാനും കറിവയ്ക്കാനും തുടങ്ങി എല്ലാത്തിനും നോണ്‍സ്റ്റിക് പാത്രങ്ങള്‍ തന്നെയാണ് ഉപയോഗിക്കുക. ഇത് നമ്മെ ഉപയോഗിക്കാന്‍ പ്രേരിപ്പിക്കുന്നതിനുള്ള കാരണങ്ങളും നമുക്കറിയാം. പാചകം ചെയ്യുമ്പോള്‍ പാത്രത്തില്‍ ഒട്ടിപ്പിടിക്കുകയില്ല, കറകള്‍ ഉണ്ടാവുകയില്ല, എണ്ണ ഉപയോഗിക്കാതെ പാചകം ചെയ്യാന്‍ കഴിയും എന്നതൊക്കെ തന്നെയാണ് ഇതിന്റെ മികച്ച ഓപ്ഷന്‍. എന്നാല്‍ ഈ നോണ്‍സ്റ്റിക് പാത്രങ്ങള്‍ ഉപയോഗിക്കുമ്പോള്‍ ശ്രദ്ധിക്കേണ്ട ചില കാര്യങ്ങളുണ്ട്. 

പാകം ചെയ്യുമ്പോള്‍ എണ്ണയില്ലെങ്കില്‍ പോലും രുചിക്കോ ഗുണത്തിനോ മാറ്റങ്ങളൊന്നും വരുകയില്ല എന്നതും നോണ്‍സ്റ്റിക് പാത്രത്തിന്റെ പ്രത്യേകതയാണ്. കൊളസ്‌ട്രോള്‍ നിയന്ത്രിക്കുന്നവര്‍ക്കൊക്കെ നോണ്‍സ്റ്റിക് പാനുകളില്‍ പാകം ചെയ്തു കഴിക്കുന്നത് നല്ലതു തന്നെയാണ്. ആരോഗ്യകരമായ ഭക്ഷണങ്ങള്‍ ഉണ്ടാക്കാന്‍ നോണ്‍സ്റ്റിക് പാത്രങ്ങള്‍ മികച്ചതാണെങ്കിലും ഇവ ദീര്‍ഘകാലം ഈടു നില്‍ക്കുകയില്ല. കാരണം ഇതിനു മുകളിലുള്ള ടെഫ്‌ലോണ്‍ പോലുള്ള സിന്തറ്റിക് കോട്ടിങ് നിരന്തരമായി ഉപയോഗിക്കുമ്പോള്‍ കേടുവരാന്‍ സാധ്യത ഏറെയാണ്. 

മെറ്റല്‍ സ്പൂണുകളൊന്നും ഉപയോഗിച്ച് നോണ്‍സ്റ്റിക് പാനില്‍ പാചകം ചെയ്യാന്‍ പാടില്ല. ഇത്  കോട്ടിങിന് കേടുപാടുകള്‍ സംഭവിക്കാന്‍ കാരണമാകുന്നു. അതുപോലെ നോണ്‍സ്റ്റിക് പാനിന് അമിതമായ ചൂടും താങ്ങാന്‍ പറ്റില്ല. ഇങ്ങനെ ചൂടുകൂടുമ്പോള്‍ പാനിന്റെ കോട്ടിങിന് കേടുപാടുകള്‍ വരുകയും വിഷപ്പുക പുറപ്പെടുവിക്കുകയും ചെയ്യുന്നു. 

ചെമ്പ,് സ്റ്റെയിന്‍ലെസ് സ്റ്റീല്‍, കാര്‍ബണ്‍ സ്റ്റീല്‍, കാസ്റ്റ് അയേണ്‍ തുടങ്ങിയ ലോഹങ്ങളുപയോഗിച്ചുണ്ടാക്കുന്ന പരമ്പരാഗത അടുക്കളപാത്രങ്ങളേക്കാള്‍ ആയുസ് കുറവാണ് നോണ്‍സ്റ്റിക് പാത്രങ്ങള്‍ക്ക്. കാരണം നോണ്‍സ്റ്റിക് പാത്രങ്ങളധികവും ടെഫ്‌ലോണ്‍ എന്ന രാസവസ്തു കൊണ്ടാണ് പൊതിഞിരിക്കുന്നത്. 

ഗുരുതരമായ രോഗങ്ങള്‍ക്കു കാരണമാവുന്ന പെര്‍ഫ്‌ളൂറോക്റ്റാനോയിക് ആസിഡ് (പിഎഫ്ഒഎ) എന്ന രാസവസ്തുവും ഇതിലുണ്ട്. 
ചില പാത്രങ്ങളില്‍ സെറാമിക് കോട്ടിങും കാണാം. ഇത് പതിവായി ഉപയോഗിക്കുമ്പോള്‍ കോട്ടിങുകള്‍ ഇളകിപ്പോവുകയും ആരോഗ്യത്തെ മോശമായി രീതിയില്‍ ബാധിക്കുകയും ചെയ്യും. 

ഉപയോഗം നിര്‍ത്തേണ്ടത്

അമിത ചൂടില്‍ നോണ്‍സ്റ്റിക് പാത്രങ്ങളൊന്നും ഉപയോഗിക്കാന്‍ പാടില്ല. കുറേ നേരം ഇങ്ങനെ വയ്ക്കുമ്പോള്‍ കോട്ടിങ് ഇളകിപ്പോവുകയും അതുപോലെ കഴുകുമ്പോഴും പാത്രം പഴകുമ്പോഴും പോറലുകളും വരാവുന്നതാണ്. ഇങ്ങനെ പോറല്‍ വീണ പാത്രങ്ങള്‍ ഉപയോഗിക്കുന്നത് നിര്‍ത്തണം. അതുപോലെ ഉപയോഗിച്ചു കൊണ്ടിരിക്കുന്ന പാത്രത്തിന്റെ നിറത്തിനോ മറ്റോ മാറ്റം വന്നാല്‍ പിന്നീട് അതുപയോഗിക്കാന്‍ പാടില്ല. അതുപോലെ ദോശയൊക്കെ ഉണ്ടാക്കുമ്പോള്‍ പാത്രത്തില്‍ പറ്റിപ്പിടിക്കുന്നുണ്ടെങ്കിലും പെട്ടെന്നു തന്നെ ഒഴിവാക്കേണ്ടതാണ്.