ന്യൂഡല്‍ഹി: നിരോധിത വിദ്യാര്‍ഥി സംഘടനയായ സ്റ്റുഡന്റ്‌സ് ഇസ്ലാമിക് മൂവ്‌മെന്റ് ഓഫ് ഇന്ത്യ (Students Islamic Movement of India (SIMI) യുടെ മുന്‍ ജനറല്‍ സെക്രട്ടറി സാഖ്വിബ് അബ്ദുല്‍ ഹമീദ് നാച്ചന്‍ (57) അന്തരിച്ചു. തലച്ചോറിലുണ്ടായ രക്തസ്രാവംമൂലം ഇന്ന് ഉച്ചയ്ക്ക് ഡല്‍ഹിയിലെ സഫ്ദര്‍ജംഗ് ആശുപത്രിയില്‍വച്ചാണ് മരണമെന്ന് ബന്ധുക്കള്‍ അറിയിച്ചു. 2002ല്‍ അന്നത്തെ കേന്ദ്രസര്‍ക്കാര്‍ സിമിയെ നിരോധിക്കുമ്പോള്‍ സംഘടനയുടെ ദേശീയ ജനറല്‍ സെക്രട്ടറിയായിരുന്നു നാച്ചന്‍. രാജ്യത്തെ വിവിധ തീവ്രവാദ കേസുകളില്‍ ശിക്ഷിക്കപ്പെടുകയും ചെയ്തിട്ടുണ്ട്.

2002, 2003 കാലത്ത് മുംബൈ സെന്‍ട്രല്‍, വൈല്‍ പാര്‍ലെ, മുളുന്ദ് എന്നിവിടങ്ങളില്‍ നടന്ന ബോംബ് സ്‌ഫോടനങ്ങളില്‍ പ്രതിചേര്‍ക്കപ്പെട്ട ഇദ്ദേഹത്തെ 10 വര്‍ഷം തടവിന് ശിക്ഷിക്കപ്പെട്ടിരുന്നു. പിന്നീട് ജയിലിലെ നല്ലനടപ്പു പരിഗണിച്ച് അദ്ദേഹത്തെ 2017 ല്‍ മോചിപ്പിച്ചു. തുടര്‍ന്ന് ഡല്‍ഹിയിലും മഹാരാഷ്ട്രയിലും ഐസിസ് കേസില്‍ പിടിയിലായവരുമായുള്ള ബന്ധത്തിന്റെ പേരില്‍ 2023ല്‍ വീണ്ടും നാച്ചനെ ദേശീയ അന്വേഷണ ഏജന്‍സി (എന്‍ഐഎ) അറസ്റ്റ്‌ചെയ്തു. ഇന്ത്യയിലാകെ സ്‌ഫോടനങ്ങളും ആക്രമണങ്ങളും നടത്താനുള്ള ഐസിസ് പദ്ധതികള്‍ക്ക് നേതൃത്വം നല്‍കുന്നത് സാഖ്വിബ് നാച്ചന്‍ ആണെന്ന് ആരോപിച്ചായിരുന്നു അറസ്റ്റ്. ഈ കേസില്‍ സാഖ്വിബിന്റെ മൂത്തമകന്‍ മകന്‍ ശാമില്‍ നാച്ചനനെയും കേന്ദ്ര ഏജന്‍സി അറസ്റ്റ്‌ചെയ്തിരുന്നു.  ഭാര്യയും മൂന്നുമക്കളും ഉണ്ട്.

 former leader of the banned Students Islamic Movement of India (SIMI), Saquib Abdul Hameed Nachan died at 57