പാലക്കാട്: കരടിയുടെ ആക്രമണത്തെ തുടർന്ന് നെല്ലിയാമ്പതി പ്രദേശത്ത് പൊതുജനങ്ങൾക്ക് ജാഗ്രതാ നിർദേശം പുറപ്പെടുവിച്ചു. അത്യാവശ്യ കാര്യങ്ങൾക്കല്ലാതെ രാത്രി സമയങ്ങളിൽ പുറത്തിറങ്ങരുതെന്നും, പുറത്തിറങ്ങേണ്ടി വന്നാൽ ടോർച്ച് കൈവശം കരുതണമെന്നും ആരോഗ്യ വകുപ്പ്, വനം വകുപ്പ്, പാടഗിരി ജനമൈത്രി പൊലീസ് എന്നിവർ സംയുക്തമായി നിർദേശിച്ചു.

കൂടാതെ, വരും ദിവസങ്ങളിൽ സ്കൂൾ അസംബ്ലികളിൽ വിദ്യാർഥികൾക്കായി ബോധവൽക്കരണ ക്ലാസുകളും ജാഗ്രതാ നിർദേശങ്ങളും നൽകുമെന്ന് നെല്ലിയാമ്പതി ഹെൽത്ത് ഇൻസ്പെക്ടർ അറിയിച്ചു. പ്രദേശവാസികളോട് അതീവ ജാഗ്രത പാലിക്കാൻ അധികൃതർ ആവശ്യപ്പെട്ടു.

കഴിഞ്ഞ ദിവസം നെല്ലിയാമ്പതിയിൽ കരടിയുടെ ആക്രമണത്തിൽ എസ്റ്റേറ്റ് തൊഴിലാളിക്ക് ഗുരുതര പരുക്കേറ്റിരുന്നു. നെല്ലിയാമ്പതി റാണിമേട് എസ്റ്റേറ്റിൽ ജോലി ചെയ്യുന്ന സുരേന്ദ്ര ബാബു (57) ആണ് ആക്രമണത്തിൽ പരുക്കേറ്റത്. ശരീരത്തിൽ ആഴത്തിലുള്ള മുറിവുകളോടെ ഗുരുതരാവസ്ഥയിൽ നെന്മാറ സാമൂഹികാരോഗ്യ കേന്ദ്രത്തിൽ (സിഎച്ച്സി) പ്രാഥമിക ചികിത്സ നൽകിയ ശേഷം സുരേന്ദ്രനെ തൃശൂർ മെഡിക്കൽ കോളേജ് ആശുപത്രിയിലേക്ക് മാറ്റിയിരുന്നു.