അമൃത്സർ: ഇന്ന് പുലർച്ചെ അമൃത്സറിൽ നിന്ന് ഡൽഹിയിലേക്കുള്ള എയർ ഇന്ത്യ വിമാനത്തിൽ (AI 454) മദ്യപിച്ച യാത്രക്കാരൻ വനിതാ ജീവനക്കാരിയെയും സഹയാത്രികരെയും ഉപദ്രവിച്ച സംഭവം യാത്രക്കാരുടെ സുരക്ഷയെക്കുറിച്ചുള്ള ആശങ്കകൾ വീണ്ടും ഉയർത്തിയിരിക്കുന്നു.

അമൃത്സറിലെ ശ്രീ ഗുരു റാം ദാസ് ജീ അന്താരാഷ്ട്ര വിമാനത്താവളത്തിൽ നിന്ന് വിമാനം കയറുന്നതിന് മുമ്പ് തന്നെ, ഏകദേശം 40 വയസ്സ് പ്രായം തോന്നിക്കുന്ന യാത്രക്കാരൻ ആക്രമണോത്സുകമായി പെരുമാറുന്നതായി ഗ്രൗണ്ട് സ്റ്റാഫ് ശ്രദ്ധിച്ചിരുന്നു. എന്നിരുന്നാലും, അവർ അദ്ദേഹത്തെ വിമാനത്തിൽ കയറാൻ അനുവദിച്ചു. ഭാര്യയോടും കുട്ടിയോടും ഒപ്പം യാത്ര ചെയ്തിരുന്ന ഇയാൾ, യാത്രയ്ക്കിടെ സഹയാത്രികരെ അവഹേളിക്കുകയും മോശമായി പെരുമാറുകയും ചെയ്തു.

വിമാനം ലാൻഡിംഗിന് ഒരുങ്ങുന്നതിനിടെ, സീറ്റ് ബെൽറ്റ് അടയാളങ്ങൾ പ്രകാശിപ്പിച്ചിരിക്കെ, ഈ യാത്രക്കാരൻ സീറ്റിൽ നിന്ന് എഴുന്നേറ്റ് മറ്റൊരു യാത്രക്കാരനുമായി വാക്കേറ്റത്തിൽ ഏർപ്പെട്ടു. തർക്കം രൂക്ഷമായതോടെ, എയർ ഇന്ത്യയിലെ ഒരു വനിതാ ജീവനക്കാരി ഇടപെട്ട് ഇയാളോട് ശാന്തനാകാൻ ആവശ്യപ്പെട്ടെങ്കിലും ഫലമുണ്ടായില്ല. ഇതിനിടെ, ഇയാൾ വനിതാ ജീവനക്കാരിയെ അധിക്ഷേപിക്കുകയും ചെരുപ്പ് ചൂണ്ടി ഭീഷണിപ്പെടുത്തുകയും ചെയ്തതായി ദൃക്സാക്ഷികൾ പറഞ്ഞു. സംഭവം നിയന്ത്രണാതീതമാകാതിരിക്കാൻ, ജീവനക്കാർ ഉപദ്രവിക്കപ്പെട്ട സഹയാത്രികനെ ബിസിനസ് ക്ലാസ് സീറ്റിലേക്ക് മാറ്റി.

ALSO READ: കാരാപ്പുഴ ഡാമിൽ റീൽസ് ചിത്രീകരണത്തിനിടെ ജീപ്പ് മുങ്ങിയ സംഭവം; അഞ്ച് യുവാക്കൾക്കെതിരെ കേസ്, വാഹനത്തിന്റെ ആർ.സി റദ്ദാക്കും

വിമാനം ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ സുരക്ഷിതമായി ലാൻഡ് ചെയ്ത ശേഷം, എയർ ഇന്ത്യ ജീവനക്കാർ ഈ യാത്രക്കാരനെ വിമാനത്തിൽ തടഞ്ഞുനിർത്തി, മറ്റ് യാത്രക്കാർക്ക് ആദ്യം ഇറങ്ങാൻ അനുവദിച്ചു. തുടർന്ന്, പൈലറ്റ്-ഇൻ-കമാൻഡ് സുരക്ഷാ സംഘത്തെ വിവരം അറിയിച്ചു. യാത്രക്കാരനെ വിമാനത്താവള സുരക്ഷാ വിഭാഗത്തിന് കൈമാറി, കൂടുതൽ അന്വേഷണത്തിനായി അധികാരികൾക്ക് സമർപ്പിച്ചു.

അമൃത്സർ-ഡൽഹി AI 454 വിമാനത്തിൽ ഒരു യാത്രക്കാരന്റെ മോശം പെരുമാറ്റം ശ്രദ്ധയിൽപ്പെടുകയും, ലാൻഡിംഗിന് ഒരുങ്ങുന്നതിനിടെ, യാത്രക്കാരൻ മറ്റൊരാളുമായി വാക്കേറ്റത്തിൽ ഏർപ്പെട്ടതും ഞങ്ങളുടെ ജീവനക്കാർ സാഹചര്യം നിയന്ത്രണവിധേയമാക്കാൻ ശ്രമിക്കുകയും, ഉപദ്രവിക്കപ്പെട്ട യാത്രക്കാരനെ ബിസിനസ് ക്ലാസിലേക്ക് മാറ്റി. എല്ലാ യാത്രക്കാരുടെയും ജീവനക്കാരുടെയും സുരക്ഷയ്ക്ക് എയർ ഇന്ത്യ മുൻഗണന നൽകുന്നു. ഈ വിഷയത്തിൽ ബന്ധപ്പെട്ട അധികാരികളുമായി ഞങ്ങൾ പൂർണമായി സഹകരിക്കും."എയർ ഇന്ത്യ വക്താവ് പ്രസ്താവനയിൽ പറഞ്ഞു.