സ്വര്‍ണ വിലയില്‍ വീണ്ടും ഇടിവ്. ഇന്ന് പവന് 440 രൂപ കുറഞ്ഞു. ഇതോടെ പവന് 71,440 രൂപയായി. ഇന്നലെ പവന് 680 രൂപ കുറഞ്ഞതിന് ശേഷമാണ് ഇന്ന് വീണ്ടും ഇടിവ് രേഖപ്പെടുത്തിയത്. കഴിഞ്ഞ രണ്ടാഴ്ചയ്ക്കിടെ ഗ്രാമിന് 390 രൂപയും പവന് 3120 രൂപയുമാണ് കുറഞ്ഞിരിക്കുന്നത്. ഇന്ന് ഒരു ഗ്രാം സ്വര്‍ണത്തിന്റെ വിലയില്‍ 55 രൂപയുടെ കുറവാണ് രേഖപ്പെടുത്തിയിരിക്കുന്നത്. ഇതോടെ ഒരു ഗ്രാം സ്വര്‍ണത്തിന്റെ വില 8930 രൂപയായി.

ഇസ്‌റാഈലും ഇറാനും തമ്മില്‍ വെടിനിര്‍ത്തലിന് ധാരണയായെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പ്രഖ്യാപനമാണ് ഇപ്പോള്‍ വില കുറയാന്‍ കാരണമെന്ന് വിദഗ്ധര്‍ ചൂണ്ടിക്കാട്ടുന്നു. ഓഹരി വിപണിയിലും മുന്നേറ്റം പ്രകടമാണ്. ക്രൂഡ് ഓയില്‍ വിലയും കുറഞ്ഞിട്ടുണ്ട്. ഡോളര്‍ കരുത്ത് കുറഞ്ഞതോടൊപ്പം ഇന്ത്യന്‍ രൂപ കരുത്ത് വര്‍ധിപ്പിച്ചു.

വെടിനിര്‍ത്തല്‍ നിലവില്‍ വന്നതായി ട്രംപ് പ്രഖ്യാപിച്ചെന്ന് അല്‍ ജസീറ റിപ്പോര്‍ട്ട് ചെയ്യുന്നു. ഇസ്‌റാഈല്‍ തുടക്കമിട്ട യുദ്ധത്തില്‍ പിന്നീട് അവര്‍ക്കൊപ്പം അമേരിക്കയും ചേര്‍ന്നിരുന്നു. എന്നാല്‍ അമേരിക്കയുടെ ഖത്തറിലെ സൈനികത്താവളത്തിന് നേരെ മിസൈല്‍ അയച്ച് ഇറാന്‍ കനത്ത മുന്നറിപ്പാണ് അമേരിക്കക്ക് നല്‍കിയത്. തുടര്‍ന്നാണ് വെടിനിര്‍ത്തല്‍ നിര്‍ദ്ദേശവുമായി പ്രസിഡന്റ് ട്രംപ് രംഗത്തെത്തിയത്.