2026 ഫിഫ ലോകകപ്പിലെ ക്രിസ്റ്റ്യാനോ റൊണാൾഡോയുടെ പ്രകടനങ്ങൾ എങ്ങനെയായിരിക്കുമെന്ന് പറയുകയാണ് മുൻ ചെൽസി താരം വില്യം ഗാലസ്. ലോകകപ്പിൽ പോർച്ചുഗലിനൊപ്പം റൊണാൾഡോക്ക് ആദ്യ ഇലവനിൽ അവസരം ലഭിക്കില്ലെന്നും ലോകകപ്പെന്ന സ്വപ്നം റൊണാൾഡോക്ക് സാക്ഷാത്ക്കരിക്കാൻ സാധിക്കില്ലെന്നുമാണ് മുൻ ചെൽസി താരം അഭിപ്രായപ്പെട്ടത്. 

''അടുത്ത ലോകകപ്പിൽ ക്രിസ്റ്റ്യാനോ റൊണാൾഡോ ലോകകപ്പിൽ പങ്കെടുക്കും. ഇത് വളരെ വൈകാരികമായിരിക്കും. ലോകകപ്പിൽ അദ്ദേഹത്തിന് ആദ്യ ഇലവനിൽ കളിക്കാൻ കഴിയില്ല. അദ്ദേഹത്തിന് ബെഞ്ചിൽ നിന്നും പകരക്കാരനായി ഇറങ്ങാം. പോർച്ചുഗൽ ശക്തമായ ടീമായാണ് എനിക്ക് തോന്നുന്നത്. പക്ഷെ റൊണാൾഡോയ്ക്ക് ലോകകപ്പെന്ന തന്റെ സ്വപ്നം സാക്ഷാത്കരിക്കാൻ ബുദ്ധിമുട്ടായിരിക്കും. ഇത് കണ്ണീരിൽ അവസാനിക്കാൻ സാധ്യതയുണ്ട്'' വില്യം ഗാലസ് പ്രൈം കാസിനോക്ക് നൽകിയ അഭിമുഖത്തിൽ പറഞ്ഞു. 

അടുത്ത വർഷം നടക്കുന്ന ഫിഫ ലോകകപ്പിലും റൊണാൾഡോ കളിക്കുമെന്നാണ് പ്രതീക്ഷിക്കുന്നത്. ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

അതേസമയം അടുത്തിടെ അവസാനിച്ച യുവേഫ നേഷൻസ് ലീഗ് കിരീടം പോർച്ചുഗൽ സ്വന്തമാക്കിയിരുന്നു. ഫൈനലിൽ സ്‌പെയിനെ പെനൽറ്റി ഷൂട്ടൗട്ടിൽ 5-3 ന് വീഴ്ത്തിയാണ് പോർച്ചുഗൽ കിരീടം സ്വന്തമാക്കിയത്. വിജയം. നിശ്ചിത സമയത്തും അധിക സമയത്തും 2-2 എന്ന സ്‌കോറിൽ സമനിലയിൽ പിരിഞ്ഞ മത്സരത്തിൽ, പെനൽറ്റി ഷൂട്ടൗട്ടിലൂടെയാണ് പോർച്ചുഗൽ വിജയികളായത്. പോർച്ചുഗലിന്റെ രണ്ടാം യുവേഫ നേഷൻസ് ലീഗ് കിരീട നേട്ടമായിരുന്നു ഇത്. 2019ലാണ് ഇതിനു മുമ്പ് പോർച്ചുഗൽ ആദ്യമായി ഈ ടൂർണമെന്റ് വിജയിച്ചത്. 

മത്സരത്തിൽ പോർച്ചുഗൽ സമനില ഗോൾ നേടിയത് റൊണാൾഡോയിലൂടെയായിരുന്നു. ഈ ഗോളോടെ മറ്റൊരു റെക്കോർഡും റൊണാൾഡോ തന്റെ പേരിൽ എഴുതി ചേർത്തിരുന്നു. യുവേഫ നേഷൻസ് ലീഗിന്റെ ഫൈനലിൽ ഗോൾ നേടുന്ന ഏറ്റവും പ്രായം കൂടിയ താരമായാണ് റൊണാൾഡോ മാറിയിരുന്നത്. 

Former Chelsea player William Gallas has predicted Cristiano Ronaldo performances at the 2026 FIFA World Cup