കൊച്ചി: പൊലിസ് സ്റ്റേഷനുകളിലെ റൗഡി പട്ടിക പരസ്യമായി പ്രദർശിപ്പിക്കാനുള്ളതല്ലെന്നും പൊലിസ് ഉദ്യോഗസ്ഥരുടെ അറിവിലേക്ക് വേണ്ടിയുള്ളതാണെന്നും ഹൈക്കോടതി. പരസ്യമായി പട്ടിക പ്രദർശിപ്പിക്കുമ്പോൾ വ്യക്തിയുടെ സ്വകാര്യത ലംഘിക്കപ്പെടുന്നുണ്ട്. പൊലിസ് ഉദ്യോഗസ്ഥർക്ക് മാത്രം പ്രവേശനമുള്ളിടത്ത് വയ്ക്കാനുള്ളതാണ് ഇത്തരം പട്ടികകളെന്നും ജസ്റ്റിസ് പി.വി കുഞ്ഞികൃഷ്ണൻ വ്യക്തമാക്കി.

റൗഡി എന്നും റൗഡിയായി തുടരണമെന്നില്ല. കുറ്റവാളികളെ നേരായ മാർഗത്തിലേക്ക് നയിക്കാൻ സമൂഹത്തിനും കടമയുണ്ട്. റിപ്പർ ജയാനന്ദന് തന്റെ പുസ്തക പ്രകാശനത്തിൽ പങ്കെടുക്കാൻ ഹൈക്കോടതി പരോൾ അനുവദിച്ചത് അയാൾ മാനസാന്തര പാതയിലാണെന്ന് ബോധ്യപ്പെട്ടതിനാലാണ്. രാമായണം രചിച്ച വാത്മീകി സപ്തർഷികളുടെ ഉപദേശം സ്വീകരിക്കുന്നത് വരെ കൊള്ളസംഘാംഗമായിരുന്നുവെന്നാണ് ഐതിഹ്യമെന്നും കോടതി ഓർമിപ്പിച്ചു. 

ഫോർട്ട്കൊച്ചി പൊലിസ് സ്റ്റേഷനിൽ പ്രദർശിപ്പിച്ചിരിക്കുന്ന തന്റെ പേരും ചിത്രവും നീക്കം ചെയ്യണമെന്നാവശ്യപ്പെട്ട് മുൻ കുറ്റവാളി സമർപ്പിച്ച ഹരജിയാണ് കോടതി പരിഗണിച്ചത്. ഹ‌രജിക്കാരന്റെ പേരും ഫോട്ടോയും രണ്ടാഴ്ചയ്ക്കകം സ്റ്റേഷനിലെ നോട്ടിസ് ബോർഡിൽ നിന്ന് നീക്കാൻ കോടതി നിർദേശിച്ചു. 

ALSO READ: എട്ട് ദിവസത്തെ മോദിയുടെ വിദേശസന്ദര്‍ശനത്തിന് ഇന്ന് തുടക്കം

തനിക്കെതിരായ 18 കേസുകളിൽ 16ലും കുറ്റവിമുക്തനാക്കിയെന്നും ഫോർട്ടുകൊച്ചി സ്റ്റേഷനിൽ തനിക്കെതിരേ ഒരു കുറ്റകൃത്യവും രജിസ്റ്റർ ചെയ്തിട്ടില്ലെന്നും ചൂണ്ടിക്കാട്ടിയാണ് ഹരജിക്കാരൻ കോടതിയെ സമീപിച്ചത്. 
എട്ടു വർഷമായി ഒരു കേസിലും പ്രതിയല്ലാത്ത താൻ മോശം കൂട്ടുകെട്ടുകൾ ഉപേക്ഷിച്ച് മാനസാന്തര പാതയിലാണ്. ജോലി ചെയ്ത് വൃദ്ധ മാതാവിനെ പരിപാലിക്കുന്നുണ്ട്. വിവാഹത്തിനുള്ള തയാറെടുപ്പിലാണ്. ഈ സാഹചര്യത്തിൽ സ്റ്റേഷനിലെ റൗഡി ലിസ്റ്റ് തനിക്കും കുടുംബത്തിനും മാനഹാനിയുണ്ടാക്കുന്നതാണെന്നും ഹരജിക്കാരൻ ചൂണ്ടിക്കാട്ടി. 

എന്നാൽ, ഹരജിക്കാരൻ വധശ്രമമടക്കം കേസുകളിൽ പ്രതിയായിരുന്നുവെന്ന് സർക്കാർ അഭിഭാഷകൻ ചൂണ്ടിക്കാട്ടി. ഫോർട്ടുകൊച്ചി സ്റ്റേഷൻ പരിധിയിലാണ് താമസമെന്നതിനാൽ നിരന്തര നിരീക്ഷണത്തിനായാണ് പട്ടിക പ്രദർശിപ്പിച്ചിരിക്കുന്നതെന്നും അദ്ദേഹം വ്യക്തമാക്കി.

എന്നാൽ, ശിക്ഷയേക്കാൾ പരിവർത്തനമാണ് ഇന്ത്യൻ നീതിന്യായ സംവിധാനത്തിന്റെ സവിശേഷതയെന്ന് ചൂണ്ടിക്കാട്ടി കോടതി റൗഡി പട്ടിക പരസ്യമായി പ്രദർശിപ്പിക്കുന്നതിനെതിരേ ഉത്തരവിറക്കുകയായിരുന്നു.

The Kerala High Court has ruled that the rowdy list displayed at police stations is not meant for public display but for the knowledge of police officers. Justice P.V. Kunhikrishnan stated that publicly displaying the list violates an individual's privacy and should be kept in areas accessible only to police personnel.