മലപ്പുറം: മലപ്പുറം കൊടിഞ്ഞി ഫൈസല്‍ കൊലക്കേസിന്റെ വിചാരണ നടപടികള്‍ ആരംഭിച്ചു. തിരൂര്‍ സബ്ജില്ലാ കോടതിയിലാണ് വിചാരണ നടപടികള്‍ നടക്കുന്നത്.  ആര്‍.എസ്.എസ്, വി.എച്ച്.പി പ്രവര്‍ത്തകരായ 16 പേരാണ് കേസിലെ പ്രതികള്‍.

2016 നവംബര്‍ 19നാണ് കൊടിഞ്ഞി ഫാറൂഖ് നഗറില്‍ വച്ച് ഫൈസല്‍ കൊല്ലപ്പെടുന്നത്. മതം മാറിയതിന്റെ പേരില്‍ ഫൈസലിനെ കൊലപ്പെടുത്തി എന്നാണ് പൊലിസ് കുറ്റപത്രം. ഫൈസലിന്റെ ബന്ധു ഉള്‍പ്പെടെ പ്രതികളിലുണ്ട്. അറസ്റ്റിലായിരുന്ന ഇവര്‍ പിന്നീട് ജാമ്യത്തിലിറങ്ങിയിരുന്നു.

ALSO READ: ഗസ്സ വെടിനിര്‍ത്തല്‍ ചര്‍ച്ച സജീവം: കരാര്‍ ഇസ്‌റാഈല്‍ അംഗീകരിച്ചെന്ന് ട്രംപ്, നെതന്യാഹു വൈറ്റ്ഹൗസിലേക്ക്; ഈജിപ്ത് - ഖത്തര്‍ മധ്യസ്ഥര്‍ ഹമാസ് നേതാക്കളെ കാണും

പുല്ലാണി വിനോദ് (39), കോട്ടയില്‍ ജയപ്രകാശ് (50), പുല്ലാണി സജീഷ് (32), പുളിക്കല്‍ ഷാജി (39), പുളിക്കല്‍ ഹരിദാസന്‍ (30), ചാനത്ത് സുനി (39), കളത്തില്‍ പ്രദീപ് (32), തയ്യില്‍ ലിജീഷ് (27) എന്നിവര്‍ പ്രതികളില്‍ പെടുന്നു.  കുണ്ടില്‍ ബിബിന്‍ (24) എന്നയാള്‍ 2017ല്‍ ബിബിന്‍ വെട്ടേറ്റു മരിച്ചിരുന്നു. മലപ്പുറം ഡി.വൈ.എസ്.പി ആയിരുന്ന പി.എം പ്രദീപിന്റെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിച്ചത്.

കൊലപാതകം നടന്ന് ഒന്‍പത് വര്‍ഷത്തിന് ശേഷമാണ് വിചാരണ നടപടികള്‍ ആരംഭിക്കുന്നത്.  ആദ്യം നിയമിച്ച പബ്ലിക് പ്രോസിക്യൂട്ടര്‍ അഡ്വ. ശ്രീധരന്‍ പിന്മാറിയതും തുടര്‍ന്ന് പുതിയ പബ്ലിക് പ്രോസിക്യൂട്ടറെ നിയമിക്കുന്നതിലെ കാല താമസവുമാണ് വിചാരണ നടപടികള്‍ വൈകാന്‍ കാരണമായത്.

കേസില്‍ സ്പെഷ്യല്‍ പബ്ലിക്ക് പ്രോസിക്യൂട്ടറായി അഡ്വ. കുമാരന്‍കുട്ടിയെ നിയമിക്കണമെന്ന് ആവശ്യപ്പെട്ട് ഫൈസലിന്റെ ഭാര്യ ഹൈക്കോടതിയെ സമീപിച്ചിരുന്നു. എന്നാല്‍ 2024 സെപ്റ്റംബറില്‍ അഡ്വ. പി ജി മാത്യുവിനെ സ്പെഷ്യല്‍ പബ്ലിക്ക് പ്രോസിക്യൂട്ടറായി നിയമിച്ചു. പക്ഷേ, അദ്ദേഹം രാജിവച്ചു. തുടര്‍ന്ന്  ഫസ്‌ന ഹൈക്കോടതിയില്‍ നല്‍കിയ ഹരജിക്ക് പിന്നാലെ അഡ്വ. കെ. കുമാരന്‍ കുട്ടിയെ പബ്ലിക് പ്രോസിക്യൂട്ടര്‍ ആയി നിയമിക്കാന്‍ ഹൈക്കോടതി സര്‍ക്കാറിന് നിര്‍ദേശം നല്‍കി. 2020 ജനുവരിയില്‍ മഞ്ചേരി ജില്ലാ കോടതിയില്‍ നിന്ന് കേസ് തിരൂര്‍ സബ്ജില്ലാ കോടതിയിലേക്ക് മാറ്റി. 200ലധികം സാക്ഷികളുള്ള കേസിലെ ഒന്നാം സാക്ഷിയുടെ പ്രഥമ വിസ്താരം പൂര്‍ത്തിയായി. വിചാരണ നടപടികള്‍ ഉടന്‍ പൂര്‍ത്തിയാക്കി പ്രതികള്‍ക്ക് ശിക്ഷ വാങ്ങി നല്‍കാനാകും എന്ന പ്രതീക്ഷയിലാണ് ഫൈസലിന്റെ കുടുംബവും ആക്ഷന്‍ കമ്മിറ്റിയും.

ALSO READ: 300 വര്‍ഷം പഴക്കമുള്ള ദര്‍ഗ തകര്‍ത്തു; ഗുജറാത്ത് മുനിസിപ്പാലിറ്റിക്ക് ഹൈക്കോടതി നോട്ടീസ്; ധൃതിപിടിച്ച് ദര്‍ഗ പൊളിച്ചതില്‍ കോടതിയുടെ വിമര്‍ശനം

The trial in the 2016 Kodinhi Faisal murder case has commenced at the Tirur Sub-District Court, nearly nine years after the incident. Sixteen accused, including RSS and VHP members, face charges for the murder allegedly committed over religious conversion. Faisal’s family hopes for a swift conclusion.