തിരുവനന്തപുരം: കേരള സർവകലാശാല രജിസ്ട്രാർ കെ.എസ്. അനിൽകുമാറിനെ വൈസ് ചാൻസലർ ഡോ. മോഹൻ കുന്നുമ്മൽ സസ്പെൻഡ് ചെയ്തു. കാവിക്കൊടിയേന്തിയ ഭാരതാംബയുടെ ചിത്രം വെച്ച് സെനറ്റ് ഹാളിൽ നടത്താൻ നിശ്ചയിച്ചിരുന്ന പരിപാടി റദ്ദാക്കിയതുമായി ബന്ധപ്പെട്ടാണ് നടപടി. ഗവർണർ രാജേന്ദ്ര വിശ്വനാഥ് ആർലേക്കർ പങ്കെടുക്കേണ്ടിയിരുന്ന പുസ്തക പ്രകാശന ചടങ്ങിന് അനുമതി നിഷേധിച്ച രജിസ്ട്രാറുടെ നടപടിയാണ് സസ്പെൻഷന് കാരണമായത്. അതേ സമയം  വൈസ് ചാൻസലറിന്റെ നടപടിയ്ക്കെതിരെ ഹൈക്കോടതിയെ സമീപിക്കുമെന്ന് രജിസ്ട്രാർ കെ.എസ്. അനിൽകുമാർ പറ‍ഞ്ഞു. നിയമപരമായാണ് കാര്യങ്ങൾ ചെയ്തതെന്നും നിയമ നടപടിയെ നിയമം കൊണ്ട് തന്നെ നേരിടുമെന്നും രജിസ്ട്രാർ വ്യക്തമാക്കി.

അന്വേഷണത്തിന് ശേഷമാണ് നടപടിയെന്ന് വിസി വ്യക്തമാക്കി. ഗവർണറോട് അനാദരവ് കാണിച്ചുവെന്നാണ് അന്വേഷണ റിപ്പോർട്ടിൽ പരാമർശിക്കുന്നത്. പത്മനാഭ സേവാസമിതി സംഘടിപ്പിച്ച പുസ്തക പ്രകാശന ചടങ്ങിൽ കാവിക്കൊടിയേന്തിയ ഭാരതാംബയുടെ ചിത്രം പ്രദർശിപ്പിച്ചത് വലിയ വിവാദമായിരുന്നു.

സർവകലാശാല അനുമതി റദ്ദാക്കിയിട്ടും പരിപാടി സെനറ്റ് ഹാളിൽ നടത്താൻ ശ്രമിച്ചത് നിയമവിരുദ്ധമാണെന്ന് ചൂണ്ടിക്കാട്ടി രജിസ്ട്രാർ ഡിജിപിക്ക് പരാതി നൽകിയിരുന്നു. ഇതിന് പിന്നാലെയാണ് രജിസ്ട്രാറിനെതിരെ വിസി നടപടിയെടുത്തത്.

Kerala University Registrar K.S. Anil Kumar was suspended by Vice-Chancellor Dr. Mohanan Kunnummal for canceling a book release event attended by Governor Arif Mohammed Khan, due to controversy over a Bharat Mata image with a saffron flag. The registrar’s denial of permission, deemed disrespectful to the Governor, led to the action after an inquiry. Anil Kumar vows to challenge the suspension legally.