ന്യൂഡൽഹി: ഡൽഹിയിലെ ബാബ ഹരിദാസ് നഗർ മേഖലയിൽ 40,000 രൂപയുടെ വായ്പ തിരിച്ചടവുമായി ബന്ധപ്പെട്ട തർക്കം കൊലപാതകത്തിൽ കലാശിച്ചു. 36 വയസുകാരനെ രണ്ട് സഹോദരന്മാർ ചേർന്ന് മർദിച്ച് കൊലപ്പെടുത്തിയതായി പൊലിസ് പറഞ്ഞു. നജഫ്ഗഢിലെ ദിൻപൂർ ഗ്രാമത്തിൽ താമസിക്കുന്ന രഞ്ജിത് യാദവും സഹോദരൻ രാമു യാദവുമാണ് യുവാവിനെ മർദിച്ച് കൊലപ്പെടുത്തിയ കേസിൽ അറസ്റ്റിലായത്.

ആഗസ്റ്റ് 25-ന് വൈകുന്നേരം ബാബ ഹരിദാസ് നഗർ പൊലിസ് സ്റ്റേഷനിൽ ആക്രമണത്തിൽ ഒരാൾ മരിച്ചതായി പിസിആർ കോൾ ലഭിച്ചതിനെ തുടർന്നാണ് സംഭവം പുറത്തറിഞ്ഞത്. ബീഹാറിലെ സമസ്തിപൂർ സ്വദേശിയും ബാബ ഹരിദാസ് നഗറിലെ താമസക്കാരനുമായ ഗംഗാ റായിയാണ് കൊല്ലപ്പെട്ടത്. രഞ്ജിതും രാമുവും ഏകദേശം രണ്ട് വർഷം മുമ്പ് ഗംഗാ റായിക്ക് 40,000 രൂപ കടം നൽകിയിരുന്നു. എന്നാൽ, നിരവധി തവണ ആവശ്യപ്പെട്ടിട്ടും റായി പണം തിരിച്ചടച്ചില്ലെന്നാണ് പൊലിസ് വ്യക്തമാക്കുന്നത്.

“തിങ്കളാഴ്ച വൈകുന്നേരം, സഹോദരന്മാർ ഗംഗാ റായി  ജോലിചെയ്യുന്ന സ്ഥലത്ത് എത്തി,അവിടെ വച്ച് ഗംഗാ റായിയുമായി തർക്കം ഉണ്ടാവുകയും. അതിനെ തുടർന്ന് രഞ്ജിത് റായിയെ ക്രൂരമായി മർദിച്ചു. മർദനത്തെ  തുടർന്ന് റായി  ബോധരഹിതനായി നിലത്ത് വീഴുകയായിരുന്നു. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ലെന്ന്,” പൊലിസ് ഉദ്യോഗസ്ഥൻ വെളിപ്പെടുത്തി.

സംഭവത്തിന് പിന്നാലെ പൊലിസ് സംഘം പ്രതികളെ അറസ്റ്റ് ചെയ്തു. മൃതദേഹം പോസ്റ്റ്‌മോർട്ടത്തിനായി ജാഫർപൂർ കലാനിലെ റാവു തുല റാം മെമ്മോറിയൽ ആശുപത്രിയിലേക്ക് അയച്ചു. മനഃപൂർവമല്ലാത്ത നരഹത്യയ്ക്ക് കേസ് രജിസ്റ്റർ ചെയ്തതായും കൂടുതൽ അന്വേഷണം നടക്കുന്നതായും പൊലിസ് അറിയിച്ചു.