തിരുവനന്തപുരം: സർക്കാർ ആശുപത്രികളിലെയും മെഡിക്കൽ കോളജുകളിലെയും ശോചനീയാവസ്ഥ തുറന്നുപറഞ്ഞ ഡോ. ഹാരിസ് ചിറയ്ക്കലിനെ ഭീഷണിപ്പെടുത്തുന്നതിനെതിരെ പ്രതിപക്ഷ നേതാവ് വി.ഡി. സതീശൻ. തിരുവനന്തപുരം മെഡിക്കൽ കോളജിൽ ശസ്ത്രക്രിയാ ഉപകരണങ്ങളുടെ ക്ഷാമം ചൂണ്ടിക്കാട്ടിയ ഡോ. ഹാരിസിനെതിരെ സിപിഎം നേതൃത്വവും മുഖ്യമന്ത്രിയും രംഗത്തെത്തിയതിനെ വിമർശിച്ച സതീശൻ, സത്യം പറഞ്ഞതിന് ഒരാളെ ഭയപ്പെടുത്തുന്നത് ശരിയല്ലെന്ന് അഭിപ്രായപ്പെട്ടു.

"ഇടതുപക്ഷ സഹയാത്രികനായ ഒരു ഡോക്ടർക്ക് പോലും ആശുപത്രികളിലെ യഥാർത്ഥ അവസ്ഥ തുറന്നുപറയേണ്ടി വരുന്നു. ഡോ. ഹാരിസിനെ ആദ്യം വിരട്ടി, പിന്നീട് സാന്ത്വനിപ്പിക്കാൻ ശ്രമിച്ചു. ഇപ്പോഴും ഭീഷണിയുടെ സ്വരമാണ്. ഇത് ശരിയല്ല," സതീശൻ പറഞ്ഞു. തിരുവനന്തപുരം മെഡിക്കൽ കോളജിലെ അവസ്ഥ മാത്രമല്ല, കേരളത്തിലെ എല്ലാ മെഡിക്കൽ കോളജുകളിലും സർക്കാർ ആശുപത്രികളിലും ഇതിലും ഗുരുതരമായ പ്രതിസന്ധിയാണ് നിലനിൽക്കുന്നതെന്ന് അദ്ദേഹം ചൂണ്ടിക്കാട്ടി.

മരുന്നിനും ഉപകരണങ്ങൾക്കും ക്ഷാമം

ആലപ്പുഴ, കോഴിക്കോട് മെഡിക്കൽ കോളജുകളിലെ അവസ്ഥ തിരുവനന്തപുരത്തെക്കാൾ ദയനീയമാണെന്ന് സതീശൻ വ്യക്തമാക്കി. കഴിഞ്ഞ വർഷം മരുന്ന് വാങ്ങാൻ 936 കോടി രൂപ ആവശ്യമായിരുന്നെങ്കിലും 356 കോടി മാത്രമാണ് ആദ്യം അനുവദിച്ചത്. പിന്നീട് 150 കോടി കൂടി നൽകിയെങ്കിലും 428 കോടി രൂപയുടെ കുടിശ്ശിക ബാക്കിയാണ്. ഈ വർഷം 1015 കോടി രൂപ മരുന്നിനായി വേണ്ടപ്പോൾ 356 കോടി മാത്രമാണ് നീക്കിവച്ചത്. ഇതോടെ, മരുന്ന് വിതരണക്കാർ മരുന്നോ ശസ്ത്രക്രിയാ ഉപകരണമോ നൽകാത്ത അവസ്ഥയാണ്. "ശസ്ത്രക്രിയ കഴിഞ്ഞ് തുന്നാൻ സൂചിയും നൂലും പോലും രോഗികൾ വാങ്ങേണ്ട ഗതികേടിലാണ്. ആരോഗ്യ കേരളം വെന്റിലേറ്ററിലാണ്," സതീശൻ കുറ്റപ്പെടുത്തി.

ALSO READ: ഭാരതാംബ ചിത്രവിവാദത്തിൽ ഗവർണറുടെ പരിപാടി റദ്ദാക്കിയതിന് നടപടി: കേരള സർവകലാശാല രജിസ്ട്രാർക്ക് സസ്പെൻഷൻ; നടപടിയെ നിയമം കൊണ്ട് തന്നെ നേരിടുമെന്ന് രജിസ്ട്രാർ

പകർച്ചവ്യാധികൾ വ്യാപിക്കുന്നു

സംസ്ഥാനത്ത് പകർച്ചവ്യാധികൾ വ്യാപകമായി പടരുമ്പോഴും ആരോഗ്യ വകുപ്പ് ഫലപ്രദമായ നടപടികൾ സ്വീകരിക്കുന്നില്ലെന്ന് സതീശൻ ആരോപിച്ചു. "ആരോഗ്യ വകുപ്പിന്റെ ശ്രദ്ധ പി.ആർ. വർക്കിൽ മാത്രമാണ്. 15 വർഷം മുമ്പത്തെ കണക്കുകൾ പറഞ്ഞ് രക്ഷപ്പെടാനാണ് ശ്രമം. ഇപ്പോൾ സർക്കാർ ആശുപത്രികളിലെ രോഗികളുടെ എണ്ണം വൻതോതിൽ വർധിച്ചിരിക്കുന്നു. സ്വകാര്യ ആശുപത്രികളിലെ ഭീമമായ ചെലവ് താങ്ങാനാകാതെ പാവപ്പെട്ടവരും മധ്യവർഗവും സർക്കാർ ആശുപത്രികളെ ആശ്രയിക്കുന്നു. എന്നാൽ, അവിടെ സൗകര്യങ്ങൾ വർധിപ്പിക്കാൻ സർക്കാർ തയാറാകുന്നില്ല," അദ്ദേഹം പറഞ്ഞു.

ഡോ. ഹാരിസിന്റെ പ്രതികരണം

തന്റെ വെളിപ്പെടുത്തൽ "പ്രൊഫഷണൽ സൂയിസൈഡ്" ആണെന്ന് ഡോ. ഹാരിസ് ചിറയ്ക്കൽ പ്രതികരിച്ചു. "എല്ലാ വഴികളും അടഞ്ഞപ്പോൾ മാത്രമാണ് തുറന്നുപറഞ്ഞത്. സർക്കാരിനെയോ ആരോഗ്യമന്ത്രിയെയോ കുറ്റപ്പെടുത്തിയിട്ടില്ല, ബ്യൂറോക്രസിയുടെ മെല്ലെപ്പോക്കിനെയാണ് വിമർശിച്ചത്," അദ്ദേഹം വ്യക്തമാക്കി. പ്രശ്നങ്ങൾ ശ്രദ്ധയിൽപ്പെടുത്തിയതിനാൽ ചില ഉപകരണങ്ങൾ എത്തിയെങ്കിലും ക്ഷാമം തുടരുകയാണെന്നും അദ്ദേഹം ചൂണ്ടിക്കാട്ടി. "ഒറ്റരാത്രി കൊണ്ട് ഹൈദരാബാദിൽ നിന്ന് ഉപകരണങ്ങൾ എത്തിച്ചത് എങ്ങനെ? പ്രശ്നമുണ്ടാക്കിയാൽ മാത്രമേ പരിഹാരമുള്ളൂ എന്നാണോ?" ഡോ. ഹാരിസ് ചോദിച്ചു.

ALSO READ: ആത്മഹത്യയെന്ന് വരുത്തി തീർക്കാൻ ശ്രമം; വിശദമായ ചോദ്യം ചെയ്യലിൽ മകളെ കൊന്നത് താനെന്ന് അച്ഛൻ

സിപിഎമ്മിന്റെ പ്രതികരണം

ആരോഗ്യമേഖലയെ അപകീർത്തിപ്പെടുത്താൻ പ്രതിപക്ഷം ശ്രമിക്കുകയാണെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. "കേരളത്തിന്റെ ആരോഗ്യമേഖല ലോകോത്തര നിലവാരത്തിലാണ്. ചെറിയ പ്രശ്നങ്ങൾ ശ്രദ്ധയിൽപ്പെട്ടാൽ ഉടൻ പരിഹരിക്കും. എന്നാൽ, ഇത്തരം വിഷയങ്ങൾ പർവതീകരിക്കുകയാണ് പ്രതിപക്ഷവും മാധ്യമങ്ങളും," അദ്ദേഹം പറഞ്ഞു. ഡോ. ഹാരിസിന്റെ വെളിപ്പെടുത്തൽ പ്രതിപക്ഷത്തിന് ആയുധം നൽകിയെന്നും അദ്ദേഹം കുറ്റപ്പെടുത്തി.

മന്ത്രിയുടെ വിമർശനം

ഡോ. ഹാരിസിന്റെ നടപടി അദ്ദേഹത്തിന്റെ സ്ഥാനത്തിന് യോജിച്ചതല്ലെന്ന് മന്ത്രി സജി ചെറിയാൻ വിമർശിച്ചു. "ചിലപ്പോൾ പഞ്ഞിയോ മരുന്നോ കുറവുണ്ടാകാം. എന്നാൽ, അതിന്റെ പേര് പറഞ്ഞ് ആരോഗ്യമന്ത്രി രാജിവയ്ക്കണമെന്ന് കോൺഗ്രസ് ആവശ്യപ്പെടുന്നത് ശരിയല്ല," അദ്ദേഹം പറഞ്ഞു.