ലയണൽ മെസിയുടെ ബാല്യകാല ക്ലബായ ന്യൂവെൽസ് ഓൾഡ് ബോയ്‌സ് തങ്ങളുടെ ഹോം സ്റ്റേഡിയത്തിലെ ഒരു സ്റ്റാൻഡിന് മെസിയുടെ പേര് നൽകാൻ തീരുമാനിച്ചിരുന്നു. മാർസെലോ ബീൽസയിലെ ഒരു സ്റ്റാൻഡിനാണ് മെസിയുടെ പേര് നൽകുക.

ഇപ്പോൾ ക്ലബ്ബിന്റെ ഈ തീരുമാനത്തെ വിമർശിച്ചുകൊണ്ട് മുന്നോട്ട് വന്നിരിക്കുകയാണ് ന്യൂവെൽസ് ഓൾഡ് ബോയ്‌സിൻ്റെ മുൻ മാനേജർ ജുവാൻ മാനുവൽ ലോപ്പ്. ന്യൂവെൽസ് ഓൾഡ് ബോയ്സിന് വേണ്ടി മെസി എന്താണ് ചെയ്‌തതെനാണ് ലോപ്പ് ചോദിച്ചത്. അർജന്റീനയുടെ റേഡിയോ 2നോട് സംസാരിക്കുകയായിരുന്നു മുൻ പരിശീലകൻ. 

''എന്റെ ചോദ്യം ഇതാണ്...മെസി ന്യൂവെൽസിന് വേണ്ടി എന്താണ് ചെയ്തത്? ഇത് മുഴുവനും മാർക്കറ്റിംഗുകളാണ്. മെസി ലോകത്തിലെ ഏറ്റവും മികച്ച കളിക്കാരനാണ്. എന്നാൽ ഈ തീരുമാനം എല്ലാം മാർക്കറ്റിംഗിന്റെ ഭാഗമാണ്. ന്യൂവെൽസിന്റെ ചരിത്രത്തിൽ ഒരുപാട് കാര്യങ്ങൾ ചെയ്തതും നിരവധി ചാമ്പ്യൻഷിപ്പുകൾ നേടിയതുമായ വളരെ പ്രധാനപ്പെട്ട താരങ്ങളുണ്ട്.  ആ തീരുമാനങ്ങളോട് ഞാൻ യോജിക്കുന്നില്ല'' ജുവാൻ മാനുവൽ ലോപ്പ് പറഞ്ഞു. 

സ്പാനിഷ് ക്ലബായ ബാഴ്സലോണയിലേക്ക് പോവുന്നതിന് മുമ്പായി മെസി ന്യൂവെൽസ് ഓൾഡ് ബോയ്‌സ് അക്കാദമിയുടെ ഭാഗമായിരുന്നു. തന്റെ പതിമൂന്നാം വയസിലാണ് മെസി ബാഴ്‌സലോണയിൽ എത്തിയത്. ബാഴ്സക്കൊപ്പം ഐതിഹാസികമായ ഒരു കരിയറാണ് മെസി പടുത്തുയർത്തിയത്. 2021ലാണ് മെസി ബാഴ്സ വിട്ട് പിഎസ്ജിയിൽ എത്തിയത്.

2023ലാണ് മെസി പിഎസ്ജിയിൽ നിന്നും മയാമിയിൽ എത്തുന്നത്. മെസിയുടെ വരവിനു പിന്നാലെ മേജർ ലീഗ് സോക്കറിന് കൃത്യമായ ഒരു മേൽവിലാസം ഉണ്ടാക്കിയെടുക്കാൻ സാധിച്ചിരുന്നു. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു മയാമി നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്.

Former Newells Old Boys manager Juan Manuel Lope has come forward to criticize the clubs decision to name a stand at their home stadium after Lionel Messi the clubs boyhood club