മലപ്പുറം: കേരളം അതിദാരിദ്ര്യ മുക്ത പ്രഖ്യാപനത്തിനൊരുങ്ങുന്നതിനിടെ സംസ്ഥാനത്ത് സഹകരണ ബാങ്ക് മുതൽ കുടുംബശ്രീ വായ്പവരെ എടുത്ത് കണക്കെണിയിലായ 12,326 കുടുംബങ്ങളെന്ന് സർവേ. സംസ്ഥാന ആസൂത്രണ ബോർഡ് നടത്തിയ സർവേയിലാണ് വായ്പ എടുത്ത് ജീവിതം വഴിമുട്ടിയ കുടുംബങ്ങളെ കണ്ടെത്തിയത്. കടക്കെണിയിലായവരിൽ ഏറെയും സ്ത്രീകളാണ്. അടുത്ത നവംബറിൽ കേരളം അതിദാരിദ്ര്യ മുക്ത സംസ്ഥാനമായി പ്രഖ്യപിക്കാനിരിക്കുകയാണ്. 50 കോടിയാണ് ഇതിനായി ബജറ്റിൽ സർക്കാർ വകയിരുത്തിയത്.

ALSO READ: എസ്എഫ്ഐ സമ്മേളനത്തിന് അവധി നല്‍കിയ സംഭവത്തില്‍ പ്രധാനാധ്യാപകനെ പിന്തുണച്ച്‌ ഡി.ഇ.ഒ റിപ്പോർട്ട്

സംസ്ഥാനത്ത് ആകെ 64,006  അതിദരിദ്ര കുടുംബങ്ങളുള്ളതായാണ് കണ്ടെത്തിയത്. ഇവർക്ക് പാർപ്പിടം, ഭക്ഷണം, മരുന്ന് തുടങ്ങിയ അടിസ്ഥാനാവശ്യങ്ങൾ നൽകി ദാരിദ്ര്യ മുക്തമാക്കുന്നതിനിടെയാണ് ഇവരിൽ 12,326 കുടുംബങ്ങളും കടക്കെണിയിലാണെന്ന് കണ്ടെത്തിയത്.  ഗ്രാമപ്രദേശങ്ങളിൽ നിന്ന് 214ഉം നഗരസഭകളിൽ നിന്നു 61ഉം കോർപറേഷൻ പരിധിയിൽ നിന്ന് 25ഉം കുടുംബങ്ങളടക്കം 300 കുടുംബങ്ങളെ വേർതിരിച്ചെടുത്താണ് ആസൂത്രണബോർഡ് സർവേ  നടത്തിയത്. കടബാധ്യത, ഭക്ഷണം, ആരോഗ്യം, പാർപ്പിടം, ഉപജീവനം തുടങ്ങിയ വിഷയങ്ങൾ സംബന്ധിച്ചാണ് ജില്ലാ പ്ലാനിംങ് ഒഫിസർമാർ മുഖേന സർവേ പൂർത്തിയാക്കിയത്.

സർവേയിൽ ഉൾപ്പെട്ട 300 കുടുംബങ്ങളിൽ 177 പേരും സ്ത്രീകളാണ്. 102 വിവിധ കുടുംബങ്ങളാണ് വായ്പകളെടുത്ത് കടബാധ്യതയിൽ പെട്ടത്. സഹകരണ ബാങ്കുകളിൽ നിന്ന് വായപെടുത്തവരാണ് ഇവരിൽ 32 ശതമാനം പേരും. 26 ശതമാനം പേർ കുടുംബശ്രീ, സ്വയം സഹായ സംഘങ്ങളിൽ നിന്ന് വായ്പ എടുത്തവരാണ്. സ്വകാര്യ പണമിടപാട് സംഘത്തിൽ നിന്ന് വായ്‌പ എടുത്ത 12 ശതമാനം പേരുണ്ട്. അരലക്ഷം മുതൽ രണ്ട് ലക്ഷം വരെയാണ് കൂടുതൽ പേരുടെയും വായ്പ. ഇതിനൊപ്പം പലിശ കൂടിയായതോടെ അടയ്ക്കാൻ കഴിയാത്ത അവസ്ഥയിലാണ്.

ALSO READ: വിവാദങ്ങൾക്കിടെ ഗവര്‍ണര്‍ രാജേന്ദ്ര ആര്‍ലേക്കറെ സന്ദര്‍ശിച്ച് നിയുക്ത ഡിജിപി

13.7 ശതമാനം പേർ ഒന്നിലധികം വായ്പകളെടുത്തവരാണ്. വായ്പ എടുത്തവരിൽ 40 ശതമാനം പേരും വായ്പയുടെ 25 ശതമാനം പോലും തിരിച്ചടച്ചിട്ടില്ല. 19 ശതമാനം പേർ ഒന്നും അടയ്ക്കാത്തവരാണ്. ഇവരിൽ  ആറ് കുടുംബങ്ങൾ ജപ്തി നടപടി നേരിടുന്നവരാണ്.