മലപ്പുറം: കരുവാരക്കുണ്ടിൽ കടുവ കൂട്ടിൽ കുടുങ്ങി. വനംവകുപ്പ് സ്ഥാപിച്ച കൂട്ടിലാണ് കടുവ കുടുങ്ങിയതായി ഇന്ന് രാവിലെ കണ്ടത്. കഴിഞ്ഞ രണ്ടു മാസമായി നാട്ടുകാരെ ഭീതിയുടെ മുൾമുനയിൽ നിർത്തിയ നരഭോജി കടുവയാണ് കുടുങ്ങിയത് എന്നാണ് വിവരം. കാളികാവിൽ ടാപ്പിംഗ് തൊഴിലാളി ഗഫൂറിനെ കൊന്ന നരഭോജി കടുവയാണ് കൂട്ടിലായത് എന്നാണ് കണക്കാക്കുന്നത്. വനംവകുപ്പ് അധികൃതർ സ്ഥലത്തെത്തി ഇക്കാര്യം സ്ഥിരീകരിക്കും.

വനം വകുപ്പ് കരുവാരകുണ്ട് സുൽത്താന എസ്റ്റേറ്റിൽ സ്ഥാപിച്ച കൂട്ടിലാണ് കടുവ കുടുങ്ങിയത്. പ്രദേശത്തുകൂടി നടന്നുപോയ തൊഴിലാളികളാണ് കൂട്ടിലായ നിലയിൽ കടുവയെ ആദ്യം കണ്ടത്. പിന്നാലെ, വനംവകുപ്പ് അധികൃതരെ വിവരമറിയിച്ചു. ഉദ്യോഗസ്ഥർ വൈകാതെ വേണ്ട നടപടികൾ സ്വീകരിക്കും. വനം വകുപ്പ് രണ്ട് ടീമുകളായിട്ടായിരുന്നു കടുവയ്ക്കായുള്ള തിരച്ചിൽ നടത്തിയിരുന്നത്.

ALSO READ: വാർത്ത ഏജൻസി റോയിട്ടേഴ്‌സിന്റെ ഇന്ത്യയിലെ ഔദ്യോഗിക എക്‌സ് അക്കൗണ്ട് മരവിപ്പിച്ചു

കടുവയുടെയും പുലിയുടെയും സാന്നിധ്യം കൂടുതലായ കരുവാരകുണ്ട് മേഖലയിൽ ഏകദേശം 50 ഓളം നിരീക്ഷണ ക്യാമറകളും സ്ഥാപിച്ചിരുന്നു. മേഖലയിലെ റബ്ബർ തോട്ടങ്ങൾ കേന്ദ്രീകരിച്ച് ആയിരുന്നു ഇവ സ്ഥാപിച്ചത്. ക്യാമറയിൽ കടുവയുടെ ചിത്രങ്ങൾ പതിഞ്ഞിരുന്നുവെങ്കിലും കടുവയെ പിടികൂടാൻ സാധിച്ചിരുന്നില്ല. 

മെയ് 15നാണ് റബ്ബർ ടാപ്പിംഗ് തൊഴിലാളിയായ ഗഫൂറിനെ കടുവ ആക്രമിച്ച് കൊലപ്പെടുത്തിയത്. ടാപ്പിംഗ് നടത്തുന്നതിനിയുടെ തൊഴിലാളികളായ രണ്ടുപേർക്കു നേരെ കടുവ പാഞ്ഞടുക്കുകയായിരുന്നു. കൂടെയുണ്ടായിരുന്ന ആൾ ഓടി രക്ഷപ്പെട്ടെങ്കിലും ഗഫൂറിന് രക്ഷപ്പെടാൻ സാധിച്ചിരുന്നില്ല.

A tiger suspected to be a man-eater that had terrorized the residents of Karuvarakundu for the past two months has finally been trapped in a cage set up by the Forest Department. The tiger was found inside the cage early this morning.