ന്യൂഡൽഹി: ബിഹാറിലെ പൗരത്വപ്പട്ടികയ്ക്ക് തുല്യമായ വോട്ടർപട്ടിക പുതുക്കലിനെ ചോദ്യം ചെയ്ത് കോൺഗ്രസ് അടക്കമുള്ള എട്ടു പ്രതിപക്ഷപാർട്ടികൾ സംയുക്തമായി സുപ്രിംകോടതിയെ സമീപിച്ചു. കോൺഗ്രസിന്റെ കെ.സി വേണുഗോപാൽ, ശരദ് പവാർ വിഭാഗം നാഷനലിസ്റ്റ് കോൺഗ്രസ് പാർട്ടിയിലെ സുപ്രിയ സുലെ, സി.പി.ഐയിലെ ഡി.രാജ, സമാജ്വാദി പാർട്ടിയിലെ ഹരീന്ദർ മാലിക്, ശിവസേനയിലെ അരവിന്ദ് സാവന്ത്, ജാർഖണ്ഡ് മുക്തി മോർച്ചയിലെ സർഫ്രാസ് അഹമ്മദ്, കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ് ലെനിനിസ്റ്റ്) യുടെ ദീപങ്കർ ഭട്ടാചാര്യ, ഡി.എം.കെ എന്നിവരാണ് ഹരജി നൽകിയിരിക്കുന്നത്.

ALSO READ: ദേശീയ പണിമുടക്ക് തുടരുന്നു: കേരളത്തിലും ഡയസ്‌നോണ്‍; വിവിധ സര്‍വകലാശാലകളിലെ പരീക്ഷകള്‍ മാറ്റിവെച്ചു

തൃണമൂൽ എം.പി മഹുവ മൊയ്ത്ര, ആർ.ജെ.ഡി നേതാവ് മനോജ് ഝാ എന്നിവർ നേരത്തെ സുപ്രിംകോടതിയെ സമീപിച്ചിരുന്നു. അസോസിയേഷൻ ഫോർ ഡെമോക്രാറ്റിക് റിഫോംസ്, പി.യു.സി.എൽ, ആക്ടിവിസ്റ്റ് യോഗേന്ദ്ര യാദവ് എന്നിവരും നേരത്തെ ഹരജികൾ സമർപ്പിച്ചിരുന്നു. ഹരജികൾ നാളെ പരിഗണിക്കും. തെരഞ്ഞെടുപ്പ് കമ്മിഷൻ നടപടി സ്റ്റേ ചെയ്യണമെന്ന് ഹരജിക്കാർ ആവശ്യപ്പെട്ടതിനാൽ അക്കാര്യത്തിൽ കോടതിയിൽ വാദവുമുണ്ടാകും. വിവിധ ഹരജിക്കാർക്കുവേണ്ടി മുതിർന്ന അഭിഭാഷകരായ കപിൽ സിബൽ, ഡോ. അഭിഷേക് മനു സിങ് വി, ഗോപാൽ ശങ്കരനാരായണൻ, ഷാദൻ ഫറാസത്ത് തുടങ്ങിയവരാണ് ഹാജരാകുക.