കൊച്ചി: കേന്ദ്രസര്‍ക്കാരിന്റെ തൊഴിലാളി വിരുദ്ധ നടപടികളിലും നയങ്ങളിലും പ്രതിഷേധിച്ച് സംയുക്ത ട്രേഡ് യൂണിയനുകള്‍ പ്രഖ്യാപിച്ച ദേശീയ പണിമുടക്ക് തുടരുന്നു

രാജ്യത്തെ പ്രമുഖ 10 പ്രതിപക്ഷ തൊഴിലാളി യൂണിയനുകളുടെ നേതൃത്വത്തില്‍ ചൊവ്വാഴ്ച അര്‍ദ്ധരാത്രി ആരംഭിച്ച 24 മണിക്കൂര്‍ പണിമുടക്കില്‍ വിവിധ മേഖലകളിലായി 25 കോടിയിലധികം തൊഴിലാളികള്‍ ഭാഗമാകും. ട്രേഡ് യൂണിയനായ ബിഎംഎസ് ദേശീയ പണിമുടക്കിന്റെ ഭാഗമാകില്ല എന്നറിയിച്ചു.

ALSO READ: കെഎസ്ആർടിസി ദേശീയ പണിമുടക്കിൽ ഭാഗമാകില്ലെന്ന മന്ത്രി ഗണേഷ് കുമാറിന്റെ വാദം: പ്രസ്താവന തള്ളി തൊഴിലാളി യൂണിയനുകൾ

ദേശീയ പണിമുടക്കിനോട് രാജ്യം സമ്മിശ്രമായാണ് പ്രതികരിക്കുന്നത്. ദേശീയ പണിമുടക്ക് ആറുമണിക്കൂര്‍ പിന്നിടുമ്പോള്‍ ഹര്‍ത്താലിന്റെ പ്രതീതി ഉണര്‍ത്തുന്നുണ്ടെങ്കിലും മുംബൈ ഉള്‍പ്പെടെയുള്ള മന്‍ നഗരങ്ങള്‍ സാധാരണ നിലയിലാണ്. ബിഎംഎസ് ഉള്‍പ്പെടെ ഏകദേശം 213 യൂണിയനുകള്‍ രാജവ്യാപക പൊതുപണിമുടക്കില്‍ പങ്കെടുക്കില്ലെന്ന് അറിയിച്ചതായി കേന്ദ്ര തൊഴില്‍ മന്ത്രാലയം അറിയിച്ചു.

ഐഎന്‍ടിയുസി, സിഐടിയു,  എഐയുടിയുസി, ടിയുസിസി, എല്‍പിഎഫ്, യുടിയുസി, എഐടിയുസി, സേവ, എഐസിസിടിസി, എച്ച്എംഎസ് എന്നീ  യൂണിയനുകളാണ് ദേശീയപണിമുടക്കിന് നേതൃത്വം നല്‍കുന്നത്. ഗതാഗതം, റെയില്‍വേ, ബാങ്കിംഗ്, ഇന്‍ഷുറന്‍സ്, തപാല്‍, ഖനി, നിര്‍മ്മാണം, ടെലികോം, ഉരുക്ക്, വൈദ്യുതി മേഖലകളിലെ തൊഴിലാളികള്‍ പണിമുടക്കില്‍ പങ്കെടുക്കും എന്നാണ് സംഘടനകള്‍ അറിയിച്ചിരിക്കുന്നത്.

സര്‍ക്കാര്‍ അനുകൂല ഇടതു സംഘടനകള്‍ ഉള്‍പ്പെടെ ദേശീയ പണിമുടക്കിന്റെ ഭാഗമാകുന്നതിനാല്‍ പണിമുടക്ക് കേരളത്തിലും പൂര്‍ണമാകുമെന്നാണ് വിലയിരുത്തപ്പെടുന്നത്. ഇന്ന് അവധിയെടുക്കുന്നതില്‍ നിയന്ത്രണം ഏര്‍പ്പെടുത്തി സംസ്ഥാന സര്‍ക്കാര്‍ ജീവനക്കാര്‍ക്ക് ഡയസ്‌നോണ്‍ പ്രഖ്യാപിച്ചിട്ടുണ്ട്. കാരണങ്ങളില്ലാതെ ഇന്ന് ഹാജരാകാതിരുന്നാല്‍ ശമ്പളം റദ്ദാക്കുമെന്ന് ചീഫ് സെക്രട്ടറി ഉത്തരവില്‍ വ്യക്തമാക്കി. കെഎസ്ആര്‍ടിസിയിലും കെഎസ്ഇബിയിലും ഡയസ്‌നോണ്‍ പ്രഖ്യാപിച്ചിട്ടുണ്ട്. പൊതു പണിമുടക്കിന്റെ പശ്ചാത്തലത്തില്‍ വിവിധ സര്‍വകലാശാലകളില്‍ ഇന്നു നടത്താനിരുന്ന എല്ലാ പരീക്ഷകളും മാറ്റിവെച്ചു. കാലിക്കറ്റ്, കേരള, എംജി, കണ്ണൂര്‍ സര്‍വ്വകലാശാലകളിലെ പരീക്ഷകളാണ് മാറ്റിവെച്ചത്.