തൃശ്ശൂര്‍: നാട്ടുകാര്‍ നോക്കിനില്‍ക്കെ ചൊവ്വാഴ്ച ചാലക്കുടി പുഴയില്‍ സമ്പാളൂര്‍ ഞര്‍ലക്കടവ് പാലത്തില്‍ നിന്ന് പുഴയിലേക്ക് ചാടിയ ആളുടെ മൃതദേഹം രണ്ട് ദിവസത്തെ തിരച്ചിലിനൊടുവില്‍ കണ്ടെത്തി. പ്രശസ്ത ചിത്രകാരന്‍ പുത്തന്‍ചിറ പണിക്കശ്ശേരി വീട്ടില്‍ സുഗതന്‍ (53) ആണ് മരിച്ചത്. കഴിഞ്ഞ എട്ടാം തിയതിയാണ് ഇയാള്‍ നാട്ടുകാര്‍ നോക്കി നില്‍ക്കെ പുഴയിലേക്ക് എടുത്തു ചാടിയത്. ഒച്ചവെച്ച് തിരികെ കയറാന്‍ ആളുകള്‍ പറഞ്ഞെങ്കിലും ഇയാള്‍ കൂടുതല്‍ ആഴമുള്ള ഭാഗത്തേക്ക് നീങ്ങി പോവുകയായിരുന്നു എന്ന് നാട്ടുകാര്‍ പറഞ്ഞു.

ചാലക്കുടിയില്‍ നിന്ന് അഗ്‌നിരക്ഷാസേനയെത്തി തിരച്ചില്‍ ആരംഭിച്ചെങ്കിലും കണ്ടെത്താന്‍ കഴിഞ്ഞിരുന്നില്ല. തുടര്‍ന്ന് സ്‌കൂബ സംഘം എത്തി തിരച്ചില്‍ നടത്തുകയായിരുന്നു. എന്നാല്‍ രണ്ട് ദിവസങ്ങളിലും നിരാശ ആയിരുന്നു ഫലം. പിന്നീടാണ് ചാടിയ സ്ഥലത്തു നിന്ന് നൂറ് മീറ്റര്‍ മാറി മൃതദേഹം കണ്ടെത്തിയത്.

ഇന്ന് രാവിലെ ഏഴ് മണിയോടെ നാട്ടുകാരാണ് മൃതദേഹം പൊന്തിക്കിടക്കുന്ന നിലയില്‍ കണ്ടത്. വിവരമറിഞ്ഞ് ചാലക്കുടി അഗ്‌നിരക്ഷാസേന എത്തി മൃതദേഹം കരയ്‌ക്കെത്തിച്ചു. മാള പോലിസ് തുടര്‍നടപടികള്‍ സ്വീകരിച്ചു. പോസ്റ്റുമോര്‍ട്ടം നടപടികള്‍ക്ക് ശേഷം മൃതദേഹം ബന്ധുക്കള്‍ക്ക് വിട്ടു നല്‍കുന്നതാണ്. ചിത്രകലകളുടെ ഒട്ടേറെ പ്രദര്‍ശനങ്ങള്‍ നടത്തിയിരുന്ന ആളാണ് സുഗതന്‍.