ചിക്കനും ബീഫുമൊക്കെ ആവശ്യത്തില്‍ കൂടുതല്‍ വാങ്ങി വയ്ക്കുകയും ഫ്രഷ് ആയി ഉണ്ടാക്കാന്‍ സമയം കിട്ടാതെ വരുമ്പോഴോ അല്ലെങ്കില്‍ രണ്ടോ മൂന്നോ ദിവസത്തേക്കോ ഒക്കെ മിക്ക ആളുകളും ചെയ്യുന്ന ഒന്നാണ് ചിക്കനും ബീഫുമൊക്കെ വാങ്ങി നേരെ ഫ്രീസറില്‍ കയറ്റി വയ്ക്കുക എന്നത്. പിന്നീട് ആവശ്യാനുസരണം എടുത്തുപയോഗിക്കുകയും ചെയ്യും. ഇതിനായി രാവിലെ ഫ്രീസറില്‍ നിന്നെടുത്ത് ഐസ് പോകാന്‍ കുറച്ചുസമയം പുറത്തെടുത്ത് വയ്ക്കുകയും ചെയ്യും. എന്നാല്‍ ഈ രീതി ചിലപ്പോള്‍ പണി തരുമെന്നാണ് ആരോഗ്യവിദഗ്ധര്‍ നല്‍കുന്ന മുന്നറിയിപ്പ്.

ഫ്രീസറില്‍ വച്ചാലും കുറച്ചു ദിവസത്തേക്ക് ഈ പറഞ്ഞ മാംസങ്ങള്‍ കേടുകൂടാതെ സൂക്ഷിക്കാവുന്നതാണ്. എന്നാല്‍ ഇത് നിങ്ങള്‍ പുറത്തെടുത്ത് വയ്ക്കുന്ന സമയത്താണ് സൂക്ഷിക്കേണ്ടത്. ഇങ്ങനെ പുറത്തെടുത്തുവച്ച മാംസത്തില്‍ നിന്ന് ഐസ് കളയുമ്പോള്‍ മാരകമായ പല ബാക്ടീരിയകളും വളരാനും നിരവധി ആരോഗ്യ പ്രശ്‌നങ്ങളുണ്ടാകുമെന്നും ലോകാരോഗ്യ സംഘടനയും യുഎസ് ഫുഡ് ആന്റ് ഡ്രഗ് അഡ്മിനിസ്‌ട്രേഷനും പറയുന്നു.

ഇറച്ചി സാധാരണ താപനിലയില്‍ ഐസ് കളയാനായി വയ്ക്കുമ്പോള്‍ അതിന്റെ പുറംഭാഗത്തിന് നിന്ന് ഐസ് നീങ്ങിപ്പോവുകയും ആ ഭാഗം ചൂടാകാനും അതിന്റെ ഉള്ള് തണുത്ത് തന്നെയിരിക്കുകയും ചെയ്യുന്നു. ഏകദേശം 4.4 ഡിഗ്രി സെല്‍ഷ്യസിന് മുകളിലേക്ക് താപനില എത്തിക്കഴിഞ്ഞാല്‍, ആ ഭക്ഷണം പിന്നെ രണ്ട് മണിക്കൂറില്‍ കൂടുതല്‍ വയ്ക്കുകയാണെങ്കില്‍, ബാക്ടീരിയകള്‍ വളരെ വേഗത്തില്‍ വളരാന്‍ സാധ്യതയും കൂടുതലാണ്. ഇത് വിഷാംശം പുറപ്പെടുവിക്കുകയും ശരീരത്തിലെത്തിയാല്‍ പ്രതിരോധശേഷി കുറയ്ക്കുകയും ഭക്ഷ്യവിഷബാധയിലേക്കെത്തിക്കുകയും ചെയ്യുന്നു.

അതിനാല്‍, വേവിക്കാത്ത ഇറച്ചി ഉള്‍പ്പെടെയുള്ള, പെട്ടെന്ന് കേടുവരുന്ന ഭക്ഷണങ്ങള്‍ രണ്ട് മണിക്കൂറില്‍ കൂടുതല്‍ സാധാരണ താപനിലയില്‍ സൂക്ഷിക്കരുതെന്ന് യുനൈറ്റഡ് സ്റ്റേറ്റ്‌സ് ഡിപ്പാര്‍ട്ട്‌മെന്റ് ഓഫ് അഗ്രിക്കള്‍ച്ചര്‍ കര്‍ശനമായി നിര്‍ദേശിക്കുന്നുണ്ട്. കാരണം സാല്‍മൊണല്ല, ഇകോളി, ലിസ്റ്റീരിയ മോണോസൈറ്റോജെന്‍സ് തുടങ്ങിയ അപകടകാരികളായ ബാക്ടീരിയകള്‍ക്ക് വെറും 20 മിനിറ്റിനുള്ളില്‍ തന്നെ ഇരട്ടിയാകാന്‍ കഴിയുന്നതാണ്.

 ഐസ് കളയുന്നത് 

ഫ്രീസറില്‍ നിന്ന് ഇറച്ചി എടുത്ത് ഫ്രിഡ്ജിന്റെ താഴെത്തട്ടില്‍ ഒരു പാത്രത്തില്‍ വയ്ക്കുക. ഇറച്ചിയുടെ വലുപ്പമനുസരിച്ച് കുറച്ച് മണിക്കൂറുകള്‍ മുതല്‍ ഒരു ദിവസം വരെ ഇങ്ങനെ ഐസ് കളയാന്‍ സമയമെടുത്തെന്നു വരും. ഈ രീതിയില്‍ ഐസ് കളയുമ്പോള്‍ ഇറച്ചി എപ്പോഴും സുരക്ഷിതമായ താപനിലയില്‍ (4.4°Cന് താഴെ) ആയിരിക്കും. ഇത് സുരക്ഷിതമാണ്.

ALSO READ: മുഖത്ത് ഐസ് വയ്ക്കുന്നത് സുരക്ഷിതമോ..?  ഉപയോഗിക്കും മുമ്പ് ഇക്കാര്യങ്ങള്‍ കൂടെ അറിഞ്ഞിരിക്കൂ

ഇറച്ചി ഒരു ബാഗിലോ കവറിലോ ആക്കി തണുത്ത വെള്ളത്തില്‍ താഴ്ത്തി വയ്ക്കുക. ഓരോ 30 മിനിറ്റിലും വെള്ളം മാറ്റിക്കൊണ്ടിരിക്കണം. ചെറിയ കഷണം ഇറച്ചിയാണെങ്കില്‍ ഒന്നോ രണ്ടോ മണിക്കൂറിനുള്ളില്‍ ഐസ് പോയിക്കിട്ടും.

മിക്ക മൈക്രോവേവ് ഓവനുകളിലും ഡിഫ്രോസ്റ്റ് എന്നൊരു സംവിധാനം ഉണ്ടാകും. ഇത് ഉപയോഗിച്ചും വേഗത്തില്‍ ഐസ് കളയാം.