മുംബൈ: 75 വയസായാല്‍ പൊതുപ്രവര്‍ത്തകര്‍ സ്വയം വിരമിക്കണമെന്ന ആവശ്യം വീണ്ടുമുയര്‍ത്തി ആര്‍.എസ്.എസ് മേധാവി മോഹന്‍ ഭഗവത്. ആര്‍.എസ്.എസ് ആസ്ഥാനമായ നാഗ്പൂരില്‍ നടന്ന 'ഗുരുപൂര്‍ണിമ' പരിപാടിയിലാണ് മോഹന്‍ ഭഗവത്  തന്റെ നിലപാട് ആവര്‍ത്തിച്ചത്. 75 വയസ്സ് തികയുമ്പോള്‍ എല്ലാം നിര്‍ത്തി സന്തോഷത്തോടെ മറ്റുള്ളവര്‍ക്ക് വഴിയൊരുക്കണം-മോഹന്‍ഭാഗവത് പറഞ്ഞു. നിങ്ങളെ ആരെങ്കിലും 75ാം പിറന്നാള്‍ ആശംസിക്കുന്നുണ്ടെങ്കില്‍ നിങ്ങള്‍ പണി നിര്‍ത്തി മറ്റുള്ളവര്‍ക്കായി ഒഴിഞ്ഞു നല്‍കണമെന്നാണ് ഉദ്ദേശിക്കുന്നതെന്നും ഭഗവത് ചൂണ്ടിക്കാട്ടി. തനിക്ക് 75 വയസ്സ് തികയാന്‍ ദിവസങ്ങള്‍ ബാക്കി നില്‍ക്കേയാണ് ഭഗവതിന്റെ പ്രസ്താവന. 

അതേസമയം, പ്രധാനമന്ത്രി നരേന്ദ്ര മോദിയെ ഉദ്ദേശിച്ചാണ് ഭഗവതിന്റെ പ്രസ്താവനയെന്ന് ചൂണ്ടിക്കാട്ടി പ്രതിപക്ഷം രംഗത്തെത്തി.  സെപ്തംബര്‍ 17 നാണ് മോദിക്ക് 75 വയസാകുന്നത്. സെപ്തംബര്‍ 11 ന് ഭഗവതിനും 75 വയസാകും. മോദി മാറണമെന്നാണ് ആര്‍.എസ്.എസ് ഉദ്ദേശിച്ചതെന്ന് ശിവസേന (യു.ബി.ടി) നേതാവ് സഞ്ജയ് റാവത് പ്രതികരിച്ചു. 

' ഇത് മോദിക്ക് മാത്രമുള്ള സന്ദേശമാണ്. മോദി താഴെയിറങ്ങാന്‍ സമയമായെന്നാണ് ഉദ്ദേശിക്കുന്നത്. ഈ വര്‍ഷം സപ്തംബര്‍ 17ന് മോദിക്ക് 75 വയസ്സ് തികയുകയാണ്. എല്‍ കെ അദ്വാനി, മുരളി മനോഹര്‍ ജോഷി, ജസ്വന്ത് സിംഗ് തുടങ്ങിയ നേതാക്കള്‍ക്ക് 75 വയസ് തികഞ്ഞപ്പോള്‍ മോദി അവരെ വിരമിക്കാന്‍ നിര്‍ബന്ധിച്ചിരുന്നു. ഇപ്പോള്‍ അദ്ദേഹം അതേ നിയമം തനിക്കും ബാധകമാക്കുമോ എന്ന് നോക്കാം'- സഞ്ജയ് പറഞ്ഞു.വെറുതെ പ്രസംഗിക്കുകയല്ല, ചെയ്തുകാണിക്കുകയാണ് വേണ്ടതെന്ന് കോണ്‍ഗ്രസ് നേതാവ് അഭിഷേക് സിംഗ്‌വി പ്രതികരിച്ചു. 

മോദി 75 വയസ്സില്‍ സ്ഥാനമൊഴിയണമെന്ന നിര്‍ദ്ദേശം മുമ്പ് കേന്ദ്ര ആഭ്യന്തര മന്ത്രി അമിത് ഷാ നിരസിച്ചിരുന്നു. എന്നാല്‍ വ്യാഴാഴ്ച മറ്റൊരു പരിപാടിയില്‍ തന്റെ വിശ്രമജീവിതത്തെക്കുറിച്ചുള്ള ആഗ്രഹങ്ങള്‍ ഷാ വെളിപ്പെടുത്തിയിരുന്നു. വിരമിച്ച ശേഷം വേദങ്ങളുടെയും ഉപനിഷത്തുകളുടെയും പഠനത്തിനായി നീക്കിവയ്ക്കാനാണ് ആഗ്രഹിക്കുന്നതെന്നാണ് ഷാ പറഞ്ഞത്. 

എന്നാല്‍ പ്രതിപക്ഷത്തിന്റെ വാദങ്ങള്‍ തള്ളിയം ഭഗവതിന്റെ വാക്കുകള്‍ വിശദീകരിച്ചും ബി.ജെ.പി രംഗത്തെത്തിയിട്ടുണ്ട്. ഭഗവത് ഒരു പൊതുവായ അഭിപ്രായം പറഞ്ഞതാമെന്നും അത് മോദിയെ ലക്ഷ്യമിട്ടല്ലെന്നും അവര്‍ ആരോപണങ്ങളെ പ്രതിരോധിച്ചു. ഭഗവതിന്റെ പ്രസ്താവന ഒരു സ്വകാര്യ പരിപാടിയിലായിരുന്നു. പൊതുപരിപാടിയില്‍ അല്ല- മുതിര്‍ന്ന ബി.ജെ.പി നേതാവ് നിരീക്ഷിച്ചു.  

75 വയസായാല്‍ മോദി സ്ഥാനമൊഴിയണമെന്ന് പറയുന്നത് അപക്വമാണെന്നാണ് മറ്റു ചില ബി.ജെ.പി നേതാക്കളുടെ അഭിപ്രായം. തുടര്‍ച്ചയായ മൂന്ന് തെരഞ്ഞെടുപ്പുകളില്‍ പാര്‍ട്ടിയെ അധികാരത്തിലെത്തിക്കാന്‍ മോദി നേതൃത്വം നല്‍കി. നിരവധി സംസ്ഥാനങ്ങളില്‍ സംഘടനയെ അജയ്യമാക്കി നിര്‍ത്തുന്നതിലും പ്രധാന പങ്കുവഹിച്ചു. ബിഹാര്‍ നിയമസഭാ തെരഞ്ഞെടുപ്പില്‍ പാര്‍ട്ടി വിജയിച്ചാല്‍ അത് മോദിയുടെ തൊപ്പിയിലെ ഒരു പൊന്‍തൂവല്‍കൂടിയാകും. ആരോഗ്യപ്രശ്നങ്ങളൊന്നുംമോദി നേരിടുന്നില്ലെന്നും ഊര്‍ജ്ജ്വലനാണെന്നും ഇവര്‍ ചൂണ്ടിക്കാട്ടുന്നു.

RSS chief Mohan Bhagwat reiterates that public figures should retire at age 75, sparking speculation that the message targets PM Narendra Modi, who turns 75 this September. Opposition leaders question whether Modi will follow the same principle he once applied to others.