അബുദാബി: അവധിക്കാലങ്ങളിൽ അബുദാബി ഇന്ത്യൻ ഇസ്ലാമിക് സെൻറർ വിദ്യാർത്ഥികൾക്കായി സംഘടിപ്പിച്ചുവരുന്ന ദശദിന സമ്മർ ക്യാമ്പിന് പ്രൗഡോജ്ജ്വല തുടക്കമായി. ഇസ്‌ലാമിക് സെൻററിലെ മെയിൻ ഹാളിലും വിവിധ മിനിഹാളുകളിലുമായി നിരവധി വിദ്യാർത്ഥികളും വിദ്യാർത്ഥിനികളും ക്യാമ്പിൻറെ ഭാഗമായി. വൈകുന്നേരം ഒമ്പത് മണിക്ക് നടന്ന ഉത്‌ഘാടന സംഗമം എൽ എൽ എച്‌ ഹോസ്പിറ്റൽ ഡെപ്യുട്ടി ഓപ്പറേഷൻ മാനേജർ ലോന ബ്രണ്ണർ ഉത്‌ഘാടനം ചെയ്തു. ഇൻസൈറ്റ് സമ്മർക്യാമ്പ് മുന്നോട്ടുവെക്കുന്ന ശ്രദ്ധേയമായ തീമുകളെ പ്രശംസിച്ച അദ്ദേഹം പത്തുദിവസം നീണ്ടു  നിൽക്കുന്ന ക്യാമ്പിന് സമ്പൂർണ്ണ വിജയാശംസകൾ നേർന്നു.

വിദേശത്തു ജീവിക്കുന്ന ഇന്ത്യൻ വിദ്യാർത്ഥികൾക്ക് ഉപകരിക്കുന്ന വിധത്തിൽ, യുനിസെഫ് നിർദ്ദേശിച്ചിട്ടുള്ള അടിസ്ഥാന ജീവിത നൈപുണികളെ അടിസ്ഥാനമാക്കിയാണ് ക്യാമ്പ്  സിലബസ് സജ്ജീകരിച്ചിരിക്കുന്നത്. പ്രമുഖ പരിശീല കേന്ദ്രമായ പെൻസ്‌കിൽ ട്രെയിനിങ് അക്കാദമിയുടെ മേൽനോട്ടത്തിലാണ് ക്യാമ്പ്.  പ്രമുഖ പരിശീലകനും ഹൈക്കോടതി അഭിഭാഷകനും മനഃശാസ്ത്ര വിദഗ്ധനുമായ അഡ്വക്കറ്റ് ബിലാൽ മുഹമ്മദാണ് ചീഫ് മെൻറ്റർ.

വ്യാഴാഴ്ച  പ്രവൃത്തി  ദിനമായതിനാൽ ക്യാമ്പിൽ രജിസ്റ്റർ ചെയ്യാൻ തടസം നേരിട്ടവർക്ക് സ്പോട്ട് രജിസ്‌ട്രേഷൻ വെളളിയാഴ്ച രാത്രി എട്ടുമണി വരെ തുടരുമെന്ന് സംഘാടകർ അറിയിച്ചു. അബുദാബി സിറ്റിയുടെ വിവിധ ഭാഗങ്ങൾ, മുസഫ, മുഹമ്മദ് ബിൻ സായിദ് സിറ്റി, ബനിയാസ് എന്നിവിടങ്ങളിൽ നിന്ന് ട്രാൻസ്‌പോർട്ടേഷൻ സൗകര്യവും ലഭ്യമാണ്. കൂടുതൽ വിവരങ്ങൾക്കും രജിസ്‌ട്രേഷനും 026424488/0567990086 എന്നീ നമ്പറുകളിൽ ബന്ധപ്പെടാവുന്നതാണ്

ഇസ്ലാമിക് സെൻറർ വൈസ് പ്രസിഡണ്ട് മുഹമ്മദ് സമീർ സി അധ്യക്ഷ ഭാഷണം നടത്തി. വൈസ്‌ പ്രസിഡണ്ട്‌ സയ്യിദ്‌ അബ്ദുറഹ്മാൻ തങ്ങൾ, അൽ ഖയ്യാം ബേക്കറി മാനേജിംഗ് ഡയറക്ടർ അബൂബക്കർ, ഇസ്‌ലാമിക് സെൻറർ വൈസ് പ്രസിഡണ്ട് അഹ്മദ് കുട്ടി തൃത്താല ആശംസകൾ നേർന്നു. ഇസ്‌ലാമിക് സെൻറർ ജനറൽ സെക്രട്ടറി ഹിദായത്തുള്ള സ്വാഗത ഭാഷണം നടത്തി. എജുക്കേഷൻ സെക്രട്ടറി മുസ്തഫ വാഫി നന്ദി പറഞ്ഞു.