അസാം: അസാമിൽ ഞെട്ടിക്കുന്ന ഒരു സംഭവത്തിൽ, 22 വയസ്സുള്ള യുവതി തന്റെ നവജാത ശിശുവിനെ 50,000 രൂപയ്ക്ക് വിറ്റതായി റിപ്പോർട്ട്. ശിവസാഗർ സിവിൽ ആശുപത്രിയിൽ വെച്ചാണ് യുവതി പ്രസവിച്ചത്. വിവാഹിതയല്ലാത്ത ഈ യുവതിക്ക് കുഞ്ഞിനെ വിൽക്കാൻ സഹായിച്ചത് അവരുടെ അമ്മയാണ്.

സംഭവം അറിഞ്ഞ ശിശുക്ഷേമ സമിതി അംഗങ്ങൾ ആശുപത്രിയിലെത്തിയപ്പോഴേക്കും യുവതിയും അവരുടെ അമ്മയും ചേർന്ന് കുഞ്ഞിനെ വിറ്റുകഴിഞ്ഞിരുന്നുവെന്ന് പൊലീസ് വ്യക്തമാക്കി. അസാമിൽ തന്നെ താമസിക്കുന്ന, കുട്ടികളില്ലാത്ത ഒരു ദമ്പതികളാണ് കുഞ്ഞിനെ പണം നൽകി വാങ്ങിയത്. നിലവിൽ അധികൃതർ കുഞ്ഞിനെ ദമ്പതികളിൽ നിന്ന് ഏറ്റെടുത്ത് സുരക്ഷിതമായ സ്ഥലത്തേക്ക് മാറ്റിയിട്ടുണ്ട്.

കുഞ്ഞിനെ വിൽക്കുന്നതിൽ ഒരു ആശാ വർക്കറും പങ്കാളിയായതായി വിവരമുണ്ട്. പൊലീസ് നിലവിൽ കുഞ്ഞിന്റെ അമ്മ, അമ്മൂമ്മ, കുഞ്ഞിനെ വാങ്ങിയ ദമ്പതികൾ, ആശാ വർക്കർ എന്നിവരടക്കം അഞ്ച് പേരെ അറസ്റ്റ് ചെയ്തിട്ടുണ്ട്. സംഭവത്തെക്കുറിച്ച് കൂടുതൽ അന്വേഷണം നടന്നുവരികയാണ്.

In Assam, a 22-year-old woman sold her newborn for ₹50,000, with help from her mother. The baby was born at Sivasagar Civil Hospital, and the unmarried woman sold the child to a childless couple in Assam. Authorities rescued the baby and arrested five people: the mother, grandmother, the couple, and an involved ASHA worker.