കഴക്കൂട്ടം: കേരള പൊലിസ് ടെലികമ്യൂണിക്കേഷൻ വിഭാഗം സർക്കിൾ ഇൻസ്പെക്ടർ കുണ്ടറ കാഞ്ഞിരക്കോട് തെങ്ങുവിള വീട്ടിൽ ജെയ്സൺ അലക്സ് (48) ആത്മഹത്യ ചെയ്തതിനു പിന്നിൽ മേലുദ്യോഗസ്ഥരുടെ സമ്മർദമാണെന്നു കുടുംബം. 6 കോടി രൂപയുടെ ബില്ലിൽ ഒപ്പിടാൻ സമ്മർദമുണ്ടായതായി ജെയ്സന്റെ അമ്മ ജമ്മ അലക്സ് പറഞ്ഞു. ബില്ലിൽ പ്രശ്നങ്ങളുണ്ടെന്നും ഒപ്പിട്ടാൽ കുടുങ്ങുമെന്നും മകൻ പറഞ്ഞിരുന്നതായും അമ്മ ആരോപിച്ചു.

ALSO READ: കൊലക്കേസിൽ ജീവപര്യന്തം ശിക്ഷ അനുഭവിക്കുന്ന തടവുകാരന് വിവാഹത്തിനായി 15 ദിവസത്തെ പരോൾ അനുവദിച്ച് കേരള ഹൈക്കോടതി

ഇന്നലെ രാവിലെയാണ് ജെയ്സണെ അലക്സിനെ പുല്ലാന്നിവിള കടവൻകോട്ടുകോണം ബഥേലിലെ വീട്ടിൽ മരിച്ചനിലയിൽ കണ്ടെത്തിയത്. അധ്യാപികയായ ഭാര്യയും മക്കളും സ്‌കൂളിൽ പോയ സമയത്തായിരുന്നു സംഭവം.

കേന്ദ്രമന്ത്രി അമിത്ഷായുടെ കേരള സന്ദർശനവുമായി ബന്ധപ്പെട്ട് സുരക്ഷയൊരുക്കുന്നതിന്റെ ഭാഗമായി രാവിലെ ആറിന് ഓഫിസിൽ എത്തിയ ജെയ്സൺ ഡ്യൂട്ടിക്കിടെ സഹപ്രവർത്തകരോട് മിണ്ടാതെ ഇറങ്ങിയിരുന്നു. തിരഞ്ഞെത്തിയ സഹപ്രവർത്തകരാണ് വീട്ടിൽ തൂങ്ങിമരിച്ച നിലയിൽ ജെയ്സണെ കണ്ടത്. മൃതദേഹം മെഡിക്കൽ കോളജ് മോർച്ചറിയിലേക്കു മാറ്റി.

ALSO READ: കാനം രാജേന്ദ്രൻ്റെ കുടുംബം സഞ്ചരിച്ച വാഹനം അപകടത്തിൽപ്പെട്ടു: ഭാര്യയ്ക്കും മകനും പരുക്ക്

കുണ്ടറ സ്വദേശിയായ ജെയ്സൺ അലക്സ് മൂന്നു വർഷം മുൻപാണ് പുല്ലാന്നിവിളയ്ക്കു സമീപം കടവൻ കോട്ടുകോണത്ത് വീടുവച്ചത്. റിട്ട. അധ്യാപിക ജമ്മ അലക്സാണ്ടറുടെയും പരേതനായ അലക്സാണ്ടറുടെയും മകനാണ്. ഭാര്യ സോമി ജെയ്സൺ. മക്കൾ: ആൽമി, ആൻസി. അസ്വാഭാവിക മരണത്തിനു കഴക്കൂട്ടം പൊലിസ് കേസ് എടുത്തു.