ബംഗളൂരു: അലഞ്ഞുതിരിയുന്ന തെരുവുനായകള്‍ക്ക് ഭക്ഷണം നല്‍കാന്‍ ബൃഹത് ബംഗളൂരു മഹാനഗരപാലികെ(ബി.ബി.എം.പി). മൃഗങ്ങളുടെ ആരോഗ്യ സംരക്ഷണത്തോടൊപ്പം ആളുകള്‍ക്ക് നേരെയുള്ള ആക്രമണം തടയുക എന്നതും തെരുവുനായ ഭക്ഷണ പദ്ധതിയിലൂടെ നഗര ഭരണം ലക്ഷ്യമിടുന്നു. 100 കേന്ദ്രങ്ങളില്‍ നിന്ന് 5000 ഓളം തെരുവുനായകള്‍ക്ക് ഭക്ഷണം പാകം ചെയ്യാനുള്ള ടെണ്ടര്‍ വിളിക്കാനുള്ള നടപടികളിലാണ് ബി.ബി.എം.പി. ഒരു നായക്ക് ഏകദേശം 22 രൂപയാണ് ഭക്ഷണ ചെലവില്‍ ബി.ബി.എം.പി കണക്കാക്കുന്നത്. 150 ഗ്രാം ചിക്കന്‍, 100 ഗ്രാം ചോറ്, 100 ഗ്രാം പച്ചക്കറി, 10 ഗ്രാം എണ്ണ എന്ന ക്രമത്തിലാണ് ഭക്ഷണം നല്‍കുക. ഭക്ഷണം വിതരണം ചെയ്യാനായി വളണ്ടിയര്‍മാരുടെയും മൃഗസ്‌നേഹികളുടെയും സേവനം ഉപയോഗപ്പെടുത്തും. നായകള്‍ക്ക് ആവശ്യമായ ഭക്ഷണം നല്‍കുന്നതോടെ നഗരവാസികള്‍ക്ക് നേരെയുള്ള ആക്രമണം കുറയുമെന്നാണ് നഗരപാലിക ഉദ്യോഗസ്ഥര്‍ പറയുന്നത്. അതേസമയം, പദ്ധതിയെ പ്രശംസിച്ചും വിമര്‍ശിച്ചും സമൂഹമാധ്യമങ്ങളില്‍ പ്രതികരണങ്ങള്‍ നിറയുകയാണ്. നഗരത്തില്‍ 2.8 ലക്ഷം തെരുവുനായകള്‍ ഉണ്ടെന്നാണ് കണക്ക്.