കൊച്ചി: കൊച്ചി മെട്രോ റെയിലിന്റെ ആദ്യഘട്ടം ഡിസംബറില്‍ പൂര്‍ത്തിയാവുമെന്ന് ഡി.എം.ആര്‍.സി മുഖ്യഉപദേഷ്ടാവ് ഇ.ശ്രീധരന്‍. മുഖ്യമന്ത്രി നിര്‍ദേശിച്ച സമയപരിധിക്കു മുമ്പ് തന്നെ മെട്രോ റെയില്‍ പൂര്‍ത്തിയാവുമെന്ന് ഇ.ശ്രീധരന്‍ പറഞ്ഞു. ആലുവ മുതല്‍ പാലാരിവട്ടം വരെയുള്ള ഭാഗങ്ങളാണ് ആദ്യഘട്ടത്തില്‍ പൂര്‍ത്തിയാവുക.

മെട്രോ റെയിലുമായി ബന്ധപ്പെട്ട ജോലികള്‍ ഇഴഞ്ഞുനീങ്ങുന്നുവെന്ന ആരോപണമുയര്‍ന്നിരുന്നു. ഇതിനാല്‍ തന്നെ ആരോപണമുയര്‍ന്ന സ്ഥലങ്ങളില്‍ അദ്ദേഹം സന്ദര്‍ശനം നടത്തി. ആലുവ മുതല്‍ പാലാരിവട്ടം വരെയുള്ള ഭാഗങ്ങളിലെ നിര്‍മാണപ്രവര്‍ത്തനങ്ങളില്‍ തൃപ്തനാണെന്നും ശ്രീധരന്‍ പറഞ്ഞു. അതിനാല്‍തന്നെ ഇപ്പോഴത്തെ സാഹചര്യത്തില്‍ മുഖ്യമന്ത്രി പറഞ്ഞ സമയത്തിനുള്ളില്‍ തന്നെ ജോലികള്‍ തീര്‍ക്കാന്‍ കഴിയുമെന്നും അദ്ദേഹം പറഞ്ഞു. 2017 മാര്‍ച്ച് മാസത്തിനുള്ളില്‍ മെട്രോ റെയിലുമായി ബന്ധപ്പെട്ട പ്രവൃത്തികള്‍ പൂര്‍ത്തിയാക്കണമെന്നാണ് മുഖ്യമന്ത്രി പിണറായി വിജയന്റെ നിര്‍ദേശം.