തിരുവനന്തപുരം: സ്‌കൂളുകളിലെ ഉച്ചഭക്ഷണ മെനു ശാസ്ത്രീയമായി പരിഷ്‌കരിച്ച സാഹചര്യത്തില്‍ രുചികരമായി ഭക്ഷണം തയാറാക്കാന്‍ തൊഴിലാളികള്‍ക്ക് പരിശീലനം.

എല്ലാ അധ്യയന വര്‍ഷാരംഭത്തിലും പാചക തൊഴിലാളികള്‍ക്ക് ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ട് മുഖാന്തരം പൊതുവിദ്യാഭ്യാസ വകുപ്പ് പരിശീലനം നല്‍കിവരുന്നുണ്ട്. ഇത്തവണയും ഇത്തരത്തില്‍ ആറ് ജില്ലകളില്‍ പരിശീലനം നടന്നിരുന്നു. കൂടുതല്‍ മികച്ച രീതിയില്‍ പരിശീലനം സംഘടിപ്പിക്കുന്നതിന് ഇത്തവണ കെ.ടി.ഡി.സിയുടെ സഹകരണത്തോടെ എട്ട് ജില്ലകളില്‍ 30 മാസ്റ്റര്‍ ട്രെയിനര്‍മാര്‍ക്ക് വീതം പരിശീലനം നല്‍കാനാണ് വകുപ്പ് ലക്ഷ്യമിടുന്നത്. തുടര്‍ന്ന് ഈ മാസ്റ്റര്‍ ട്രെയിനര്‍മാര്‍ മറ്റു തൊഴിലാളികള്‍ക്ക് പരിശീലനം നല്‍കും.

ALSO READ: വീണ്ടും നിപ മരണം; മരിച്ച പാലക്കാട് സ്വദേശിക്ക് രോഗബാധ സ്ഥിരീകരിച്ചു

സമ്പുഷ്ഠീകരിച്ച അരിയും ചെറുധാന്യവും ഉപയോഗിച്ച് വിവിധയിനം വിഭവങ്ങള്‍ തയാറാക്കുന്നതിനുള്ള പ്രായോഗിക പരിശീലനമാണ് തൊഴിലാളികള്‍ക്ക് നൽകുക. കൂടാതെ പ്രാദേശികമായി ലഭിക്കുന്ന പച്ചക്കറികള്‍ ഉപയോഗിച്ച് രുചികരമായ കറികള്‍ തയാറാക്കുന്നതും പരിശീലനത്തില്‍ ഉള്‍പ്പെടുത്തിയിട്ടുണ്ട്. പുതിയ സംരംഭം സ്‌കൂളുകളിലെ ഉച്ചഭക്ഷണ പരിപാടി കൂടുതല്‍ കാര്യക്ഷമവും പോഷകസമൃദ്ധവുമാക്കാന്‍ സഹായിക്കുമെന്നാണ് വിലയിരുത്തൽ.

തിരുവനന്തപുരം മസ്‌കറ്റ് ഹോട്ടലില്‍ കെ.ടി.ഡി.സിയുടെ സഹകരണത്തോടെ പി.എം പോഷണ്‍ പൊതുവിദ്യാഭ്യാസവകുപ്പ് സ്‌കൂള്‍ ഉച്ചഭക്ഷണ പദ്ധതിയുടെ ഭാഗമായി സംഘടിപ്പിച്ച സ്‌കൂള്‍ പാചക തൊഴിലാളി മാസ്റ്റര്‍ ട്രെയിനര്‍മാര്‍ക്കുള്ള പരിശീലന പരിപാടിയുടെ സംസ്ഥാനതല ഉദ്ഘാടനം വിദ്യാഭ്യാസ മന്ത്രി വി. ശിവന്‍കുട്ടി നിർവഹിച്ചു. പാചകതൊഴിലാളികളുടെ സുരക്ഷ കണക്കിലെടുത്ത് ഈ വര്‍ഷം മുതല്‍ ഫയര്‍ ആന്റ് റെസ്‌ക്യു വകുപ്പിന്റെ നേതൃത്വത്തില്‍ സുരക്ഷാ പരിശീലനം കൂടി ഈ പരിപാടിയില്‍ ഉള്‍പ്പെടുത്തിയതായും മന്ത്രി പറഞ്ഞു.

ALSO READ: പ്രത്യേക മഴ മുന്നറിയിപ്പ്; ഇന്ന് രാത്രി ഈ ജില്ലകളില്‍ ഓറഞ്ച് അലര്‍ട്ട്; കനത്ത മഴക്ക് സാധ്യത

ഉദ്ഘാടന യോഗത്തിൽ പൊതുവിദ്യാഭ്യാസ അഡീഷനല്‍ ഡയറക്ടര്‍ സി.എ സന്തോഷ് അധ്യക്ഷനായി. വിദ്യാഭ്യാസ ഉപഡയറക്ടര്‍ ആര്‍. ബിന്ദു, ഉച്ചഭക്ഷണ വിഭാഗം സീനിയര്‍ അഡ്മിനിസ്‌ട്രേറ്റീവ് അസിസ്റ്റന്റ് പി.കെ മനോജ് എന്നിവര്‍ സംസാരിച്ചു.