പറ്റ്‌ന: ബിഹാറിനെ ഞെട്ടിച്ച് വീണ്ടും കൊലപാതകം. ബി.ജെ.പി നേതാവിനെയാണ് കൊലപ്പെടുത്തിയത്. കിസാന്‍ മോര്‍ച്ച നേതാവ് സുരേന്ദ്ര കെവിഡിനെ (52) ബൈക്കിലെത്തിയ സംഘമാണ് വെടിവെച്ചു കൊന്നത്. വെടിയുതിര്‍ത്ത സംഘം രക്ഷപ്പെട്ടു. 

ബിഹാറിലെ പ്രമുഖ വ്യവസായിയും ബി.ജെ.പി നേതാവുമായ ഗോപാല്‍ ഖേംകയുടെ കൊലപാതകം നടന്ന് ഒരാഴ്ചക്കിടെയാണ് രണ്ടാമത്തെ കൊല അരങ്ങേറുന്നത്. പട്‌നയിലെ വീടിന് മുന്നില്‍ വെച്ചാണ് ഖേംന കൊല്ലപ്പെട്ടത്. 

വെടിയേറ്റ ഉടന്‍ തന്നെ കെവിഡിനെ പട്‌ന എയിംസില്‍ എത്തിച്ചിരുന്നു. അവിടെ വെച്ചാണ് അദ്ദേഹം മരണത്തിന് കീഴടങ്ങിയത്. സംഭവത്തില്‍ അന്വേഷണം ആരംഭിച്ചു. വെടിയുതിര്‍ത്തവര്‍ക്കായി തെരച്ചില്‍ നടക്കുകയാണ്. 

ഖേംകയുടെ കൊലപാതകത്തിന് തൊട്ടുപിന്നാലെയുണ്ടായ രണ്ടാമത്തെ സംഭവം പ്രദേശത്ത് ആശങ്ക സൃഷ്ടിച്ചിട്ടുണ്ട്. 
ബിഹാറിലെ ക്രമസമാധാന നിലയെക്കുറിച്ചുള്ള പ്രതിപക്ഷത്തിന്റെ വിമര്‍ശനം നേരിടാന്‍ പാടുപെടുന്ന നിതീഷ് കുമാര്‍ സര്‍ക്കാരിന് തെരഞ്ഞെടുപ്പ് വര്‍ഷത്തില്‍ ബി.ജെ.പി നേതാവിന്റെ കൊലപാതകം മറ്റൊരു വെല്ലുവിളിയായി മാറിയിരിക്കുകയാണ്. 

 'ഇപ്പോള്‍, പട്നയില്‍ ഒരു ബി.ജെ.പി നേതാവിനെ വെടിവച്ചു കൊന്നു! എന്ത് പറയണം, ആരോട്? സത്യം കേള്‍ക്കാനോ തെറ്റുകള്‍ സമ്മതിക്കാനോ എന്‍ഡിഎ സര്‍ക്കാരില്‍ ആരെങ്കിലും തയ്യാറുണ്ടോ?'

പ്രതിപക്ഷ നേതാവ് ആര്‍ജെഡിയുടെ തേജസ്വി യാദവ് എക്സ് പോസ്റ്റില്‍ കുറിച്ചു. 'മുഖ്യമന്ത്രിയുടെ ആരോഗ്യ നിലയെ കുറിച്ച് എല്ലാവര്‍ക്കും അറിയാം, പക്ഷേ രണ്ട് ഉപയോഗശൂന്യരായ ബി.ജെ.പി ഉപമുഖ്യമന്ത്രിമാര്‍ എന്താണ് ചെയ്യുന്നത്?' അദ്ദേഹം ചോദിച്ചു.

ALSO READ: ഇസ്‌റാഈല്‍ സൈന്യത്തെ വിറപ്പിച്ച് ഹമാസ് പോരാളികള്‍; തിരിച്ചടികളില്‍ നിരവധി സൈനികര്‍ക്ക് പരുക്ക്, ടാങ്കുകളും തകര്‍ത്തു

ജൂലൈ ആദ്യ ആഴ്ചയിലാണ് ഗോപാല്‍ ഖേംക വെടിയേറ്റ് കൊല്ലപ്പെടുന്നത്. രാത്രി 11ന് പറ്റ്‌നയിലെ വീടിന് പുറത്തുവെച്ചായിരുന്നു സംഭവം. തലക്കാണ് വെടിയേറ്റത്. ബൈക്കിലെത്തിയ പ്രതി ഗോപാല്‍ വരുന്നതുവരെ കാത്തിരുന്നു വെടിവെച്ച ശേഷം രക്ഷപ്പെടുകയായിരുന്നു. ഗോപാല്‍ സംഭവസ്ഥലത്തുവെച്ചുതന്നെ  മരിച്ചതായാണ് പൊലിസ് പറഞ്ഞത്. ഖേംകയുടെ മകനും ആറ് വര്‍ഷം മുന്‍പ് സമാനരീതിയില്‍ കൊല്ലപ്പെട്ടിരുന്നു. 2018 ഡിസംബറില്‍ ഫാക്ടറിയുടെ ഗേറ്റില്‍ വെച്ചാണ് ഇദ്ദേഹത്തിന്റെ മകന്‍ ഗുഞ്ചന്‍ ഖേംക കൊല്ലപ്പെട്ടത്.

ഖേംക കേസിലെ പ്രതികളിലൊരാള്‍ പിന്നീട് പൊലിസ് ഏറ്റുമുട്ടലില്‍ കൊല്ലപ്പെട്ടിരുന്നു. ചൊവ്വാഴ്ച രാവിലെ പറ്റ്‌നയിലെ മാല്‍സലാമി പ്രദേശത്ത് പൊലിസുമായി നടന്ന ഏറ്റുമുട്ടലിലാണ് വികാസ് എന്ന രാജ വെടിയേറ്റു മരിച്ചത്. ഖേംകയെ കൊലപ്പെടുത്താന്‍ ഉപയോഗിച്ച ആയുധം ഇയാളാണ് നല്‍കിയതെന്നും കേസിലെ മുഖ്യപ്രതിയായ ഉമേഷുമായി ഇയാള്‍ക്ക് ബന്ധമുണ്ടെന്നുമാണ് പൊലിസ് പറയുന്നത്.

10 ലക്ഷം രൂപക്കായാണ് കൊലപാതകം ക്വട്ടേഷന്‍ നല്‍കിയതെന്നും ഇതില്‍ ഒരു ലക്ഷം രൂപ കൈപ്പറ്റിയെന്നുമാണ് ഖേംക കേസില്‍ പിടിയിലായ മുഖ്യപ്രതി പൊലിസിനോട് പറഞ്ഞിട്ടുള്ളത്.

BJP Kisan Morcha leader Surendra Kewat (52) was shot dead by unidentified assailants on a bike in Patna, Bihar.