ദുബൈ: സൈബര്‍ കുറ്റവാളികള്‍ കൂടുതല്‍ സങ്കീര്‍ണമായ തന്ത്രങ്ങള്‍ ഉപയോഗിച്ച് തട്ടിപ്പിനെതിരെ മുന്നറിയിപ്പുമായി യുഎഇയിലെ സൈബര്‍ വിദഗ്ധര്‍. രാജ്യത്ത് മക്അഫി സെക്യൂരിറ്റി, പേപാല്‍ തുടങ്ങിയ പ്രശസ്ത കമ്പനികളുടെ പേര് ദുരുപയോഗം ചെയ്തുള്ള വ്യാജ ഇമെയിലുകള്‍ വഴിയുള്ള തട്ടിപ്പുകള്‍ വര്‍ധിച്ചുവരികയാണ്.

ALSO READ: 'വേനല്‍ച്ചൂട് ഉയരുന്നു, കുട്ടികളെ വാഹനത്തില്‍ ഒറ്റയ്ക്കാക്കരുത്'; മുന്നറിയിപ്പുമായി ഫുജൈറ പൊലിസ്

തട്ടിപ്പിന്റെ വ്യാപ്തി

കഴിഞ്ഞ വര്‍ഷം ദുബൈ പൊലിസ് 406 ഫോണ്‍ തട്ടിപ്പ് കേസുകളിലായി 494 പേരെയാണ് അറസ്റ്റ് ചെയ്തത്. ഫോണ്‍ കോളുകള്‍, ഇമെയിലുകള്‍, എസ്എംഎസ്, സോഷ്യല്‍ മീഡിയ ലിങ്കുകള്‍ എന്നിവ വഴി ഇരകളെ വഞ്ചിച്ചാണ് ഇത്തരത്തിലുള്ള തട്ടിപ്പുകള്‍ നടക്കുന്നത്. ഷാര്‍ജ പൊലിസ് സൈബര്‍ കുറ്റകൃത്യങ്ങള്‍ നിരീക്ഷിക്കുന്നതിന് ശക്തമായ നടപടികള്‍ സ്വീകരിച്ചിട്ടുണ്ട്. അടുത്തിടെ 173 ബാങ്ക് അക്കൗണ്ടുകളില്‍ നിന്ന് 3 മില്യണ്‍ ദിര്‍ഹം തട്ടിയെടുത്ത രണ്ട് പേരെ ഷാര്‍ജ പൊലിസ് പിടികൂടിയിരുന്നു.

സര്‍ക്കാര്‍ ജീവനക്കാരിയായ മാസിന്‍ ഒരു തട്ടിപ്പില്‍ നിന്ന് കഷ്ടിച്ചാണ് രക്ഷപ്പെട്ടത്. മക്അഫി സെക്യൂരിറ്റിയില്‍ നിന്നെന്ന വ്യാജേന ലഭിച്ച ഇമെയിലില്‍ ആന്റിവൈറസ് സബ്‌സ്‌ക്രിപ്ഷന്‍ പുതുക്കിയതായി അവകാശപ്പെട്ടിരുന്നു. നിര്‍ദ്ദേശപ്രകാരം വിളിച്ചപ്പോള്‍, റിമോട്ട് ആക്‌സസ് കോഡ് നല്‍കാന്‍ ആവശ്യപ്പെട്ടു. എന്നാല്‍, കോഡ് ഡാറ്റ മോഷണത്തിന് കാരണമാകുമെന്ന മുന്നറിയിപ്പ് കണ്ട് ഇവര്‍ പിന്മാറുകയായിരുന്നു. ഉടന്‍തന്നെ പൊലിസില്‍ റിപ്പോര്‍ട്ട് ചെയ്യുകയും ചെയ്തു.

ALSO READ: ദുബൈയിലെ ഈ പ്രദേശങ്ങളില്‍ ഇ-ബൈക്കുകളും ഇ-സ്‌കൂട്ടറുകളും നിരോധിച്ചു; യുവാക്കളുടെ സ്വാതന്ത്ര്യത്തിനു നേരെയുള്ള കടന്നുകയറ്റമെന്ന് താമസക്കാര്‍

എന്നാല്‍, സ്വകാര്യ ജീവനക്കാരനായ അഹമ്മദ് ആദമിന് തട്ടിപ്പുകാരനില്‍ നിന്ന് രക്ഷപ്പെടാനായില്ല. പേപാല്‍ ഇമെയില്‍ വഴി 335.99 ഡോളറിന്റെ വ്യാജ ഇടപാടിനെക്കുറിച്ച് മുന്നറിയിപ്പ് ലഭിച്ച അദ്ദേഹം, നിര്‍ദ്ദേശിച്ച നമ്പറില്‍ വിളിച്ച് ക്രെഡിറ്റ് കാര്‍ഡ് വിവരങ്ങള്‍ പങ്കുവെച്ചു. വളരെപ്പെട്ടെന്നാണ് അദ്ദേഹത്തിന്റെ അക്കൗണ്ടില്‍ നിന്ന് 3,666 ദിര്‍ഹം നഷ്ടപ്പെട്ടത്. 

മുന്നറിയിപ്പും ജാഗ്രതയും

'പ്രശസ്ത കമ്പനികള്‍ ഒരിക്കലും റിമോട്ട് ആക്‌സസോ വ്യക്തിഗത ഇമെയിലുകളില്‍ നിന്നുള്ള ഇന്‍വോയ്‌സുകളോ ആവശ്യപ്പെടില്ല,' ആന്റി ഇക്കണോമിക് ക്രൈംസ് ഡിപ്പാര്‍ട്ട്‌മെന്റ് ഡയറക്ടര്‍ കേണല്‍ ഡോ. ഖാലിദ് അരീഫ് അല്‍ ഷെയ്ഖ് വ്യക്തമാക്കി.

തട്ടിപ്പ് റിപ്പോര്‍ട്ട് ചെയ്യാനുള്ള മാര്‍ഗങ്ങള്‍

• ആഭ്യന്തര മന്ത്രാലയം (MoI): MoI ആപ്പ് വഴി ഇക്രൈംസ് പോര്‍ട്ടലില്‍ റിപ്പോര്‍ട്ട് ചെയ്യാം.
• ദുബൈ പൊലിസ്: www.ecrime.ae വഴിയോ അല്‍ അമീന്‍ സേവനത്തില്‍ 8004888 (യുഎഇ) അല്ലെങ്കില്‍ +9718004888 (വിദേശം) എന്ന നമ്പറില്‍ വിളിച്ചോ റിപ്പോര്‍ട്ട് ചെയ്യാം.
• അബൂദബി പൊലിസ്: അമാന്‍ സേവനം  8002626 (വിളി) അല്ലെങ്കില്‍ 8002828 (എസ്എംഎസ്).
• ഷാര്‍ജ പൊലിസ്: നജീദ് സേവനം  800151 (വിളി) അല്ലെങ്കില്‍ 7999 (എസ്എംഎസ്).
• ഫെഡറല്‍ പബ്ലിക് പ്രോസിക്യൂഷന്‍: 'മൈ സേഫ് സൊസൈറ്റി' ആപ്പ് വഴി.

UAE authorities issue a public warning as cyber fraud cases surge, urging residents to stay alert against phishing scams and fake email threats.