അമ്പത്തി നാലാം ജന്മദിനം ആഘോഷിക്കുകയാണ് യുഎഇ. പിന്നിട്ട ഇന്നലകളിലേക്ക് നോക്കുമ്പോൾ തികച്ചും അഭിമാനത്തോടെ തന്നെ ഈ ദിനത്തെ വരവേൽക്കാൻ ഈ രാജ്യത്തിന് കഴിയും.

ശൂന്യതയിൽ നിന്ന് പൂർണതയിലേക്ക് ഉയർന്നു വന്ന കഥയാവും ഈ നാടിനു പറയാൻ ഉണ്ടാവുക. മീൻ പിടുത്തവും മുത്ത് വാരലും അന്യദേശങ്ങളിൽ പോയി വ്യാപാരം നടത്തലും ജീവിതോപാധിയായി കണ്ടിരുന്നവർ  ഇന്ന് സമ്പന്നതയുടെയും ശാന്തിയുടേയും പൂങ്കാവനത്തിൽ ഉല്ലസിക്കുന്നു

ലോക ഭൂപടത്തിൽ കടുക് മണിയോളം മാത്രം വലിപ്പമുള്ള യു എഇ സമ്പന്നതയിലും സംസ്കാരത്തിലും പുരോഗതിയിലും ഭൂമിയെക്കാൾ വിശാലാമായി കിടക്കുന്നു. രാഷ്ട്ര പിതാവായ ശൈഖ് സായിദിന്റെ ദീർഘവീക്ഷണവും വിശാല മനസ്കതയും പിറകെ വന്നവരുടെ അർപ്പണബോധവും  യുഎഇയെ പുരോഗതിയുടെ അത്യുന്നതങ്ങളിലേക്കെത്തിച്ചിരിക്കുന്നു. ലോക രാജ്യങ്ങൾക്കിടയിൽ തുല്യതയില്ലാത്തൊരു  സമ്പന്ന രാജ്യമായി വളരാൻ  ഈ നാടിനു ഏതാനും വർഷങ്ങളെ വേണ്ടി വന്നുള്ളൂ.

വിദ്യാഭ്യാസ, സാമ്പത്തിക, വാണിജ്യ പുരോഗതിയിൽ യുഎഇ നേടിയെടുത്ത പുരോഗതി എന്നും ലോകത്തിന് മാത്രകയാണ്. കേവലം അഞ്ചു  പതിറ്റാണ്ടു കൊണ്ട് കൈവരിച്ച ഈ നേട്ടം ഭരണ കർത്താക്കളുടെ ലക്ഷ്യ ബോധവും അർപ്പണ മനോഭാവവും കൊണ്ട് നേടിയെടുത്തതാണ്. കൂട്ട ഉത്തരവാദിത്വത്തോടെ ലക്ഷ്യ സാക്ഷാൽകാരത്തിനായി മുന്നിട്ടിറങ്ങിയപ്പോൾ മരുഭൂമിയിൽ സ്വർഗം പടുത്തുയുർത്താൻ അവർക്ക് സാധിച്ചു. ഇന്നലകളിൽ മരുഭൂമി താണ്ടി പല ദേശങ്ങളിൽ പോയവരെ തേടി ലോകം ഇന്ന് ഇങ്ങോട്ടു വരുന്നു

സ്നേഹവും ബഹുമാനവും ആതിഥ്യ മര്യാദയും അറബികളുടെ സംസ്കാരത്തിന്റെ ഭാഗമാണ്. അത് പൂർണാർത്ഥത്തിൽ ഉൾക്കൊണ്ടവരാണ് ഈ നാട്ടുകാർ. ആരെയും ശുദ്ധ മനസ്ഥിതിയോടെ സ്വീകരിക്കാനും വിരുന്നൂട്ടാനും ഈ രാജ്യം ഇരു കയ്യും നീട്ടിയിരിക്കുന്നു. ആരെയും മുഷിപ്പിക്കാതെ വാരിക്കോരി നൽകി നിറപുഞ്ചിരിയോടെ സ്നേഹത്തിന്റെ തലോടൽ നൽകുന്ന രാജ്യം. ഈ മണ്ണിന്റെ സ്നേഹ സ്പർശമേൽക്കാത്ത ഏതു രാജ്യമാണുണ്ടാകുക. ഇമ്പ മാർന്ന സംഗീതം പോലെ മധുര മൂറുന്ന കനി പോലെ എപ്പോഴും ഏവരും ഓർക്കുന്ന രാജ്യമാണിത്.

ഏഴ് എമിറേറ്റ്സുകളെ ഒരുമിച്ചു കൂട്ടി യുഎഇക്കു രൂപം നൽകിയത് ഷെയ്ഖ് സായിദ് എന്ന മഹാനാണ്. പിന്നീട് ഈ രാജ്യത്തിനുണ്ടായ വളർച്ച കണ്ണ് ചിമ്മി തുറക്കുന്ന വേഗത്തിലായിരുന്നു. ഇന്ന് വാണിജ്യ വിനിമയ രംഗത്തെ പ്രധാന കേന്ദ്രമായി മാറിയിരിക്കുന്നു ഈ രാജ്യം.

ലോകത്തു നിരവധി മഹാന്മാരും രാജാക്കന്മാരും കഴിഞ്ഞു പോയിട്ടുണ്ട്. പക്ഷെ അവരിൽ വിരലെണ്ണാവുന്ന വളരെ കുറച്ചു പേരെ മാത്രമേ ലോകം മുഴുവൻ ആദരിക്കുന്നവരായിട്ടുള്ളു. അവരിൽ ഏറ്റവും മുൻപന്തിയിൽ നിൽക്കാൻ ഏറ്റവും യോഗ്യത ഷെയ്ഖ് സായിദിന് തന്നെയായിരിക്കും. മറ്റു പലരുടെയും മഹത്വം അതാതു രാജ്യങ്ങളിൽ ഒതുങ്ങുമ്പോൾ ശൈഖ് സായിദ് ലോകത്തോളം വളർന്നു കിടക്കുന്നു. 

കൈക്കുമ്പിൾ പോലുള്ള ഈ രാജ്യം ലോക സംസ്കാരങ്ങളുടെ സംഗമ ഭൂമിയാണ്. ഇവിടെയില്ലാത്ത ദേശക്കാരോ ഭാഷക്കാരോ ഇല്ല. ലോകം തന്നെ യുഎഇയിലേക്ക് ചുരുങ്ങിയത് പോലെ. ഏതു രാജ്യക്കാരനും മതക്കാരനും അവനവന്റെ സംസ്കാരത്തിനും മതത്തിനനുസരിച്ചു സ്വാതന്ത്ര്യത്തോടെ ജീവിക്കാൻ സാധിക്കുന്നു എന്നത് യുഎഇയെ  വ്യത്യസ്തവും ആകർഷകവുമാക്കുന്നു. ഒരു ഇസ്‌ലാമിക രാജ്യമായിട്ടു പോലും പല മതക്കാരുടെയും വ്യത്യസ്ഥങ്ങളായ നിരവധി ആരാധനാലയങ്ങൾ ഈ മണ്ണിൽ ഉയർന്നു നിൽക്കുന്നത് അതിശയത്തോടാപ്പം ഈ രാജ്യത്തിന്റെ മത സഹിഷ്ണുതയുടെയും സ്നേഹത്തട്ടിന്റെയും നേർ കാഴ്ചകളാണ്.

ഭൂമിയിലുള്ളവരോട് നിങ്ങൾ കരുണ കാണിക്കുക എങ്കിൽ നാഥൻ നിങ്ങളോടും കരുണ കാണിക്കുമെന്ന നബി വചന ത്തിന്റെ സാക്ഷാൽ കാര്യമാണ് ഇവിടെ കാണുന്നത്. ആ വഴിയേ നടന്ന പിതാവിന്റെ കാലടികൾ തന്നെയാണ് പിറകെ വന്നവരും പിന്തുടർന്നത് അങ്ങിനെ ഉത്തമരുടെ പിൻഗാമിയായ അത്യുത്തമന്മാരായി അവർ മാറി പടർന്നു പന്തലിച്ച ആ സ്നേഹ മരത്തിന്റെ തണലിൽ ഇന്ന് ദശലക്ഷങ്ങൾ ആശ്രയം കണ്ടെത്തുന്നു. അന്നം തേടി ഇവിടെയെത്തുന്ന ആരെയും ഈ രാജ്യം നിരാശപ്പെടുത്തുന്നില്ല പക്ഷെ അത് രാജ്യത്തിന്റെ നിയമങ്ങൾക്കും ചട്ടങ്ങൾക്കുമുള്ളിൽ നിന്ന് കൊണ്ടാവണം എന്ന് മാത്രം.

നിർഭയത്വവും സമാധാനവുമുള്ള രാജ്യങ്ങളിൽ ഒന്നാം സ്ഥാനത്തു നിൽക്കുന്ന നാടാണിത്. ഭരണീയരോടും മറ്റും ഭരണ കർത്താക്കൾ സ്നേഹവും സഹായവും അടുപ്പവുമാണ് അതിനു കാരണം ജനങ്ങളുടെ മനസ്സ് തൊട്ടറിയാനും ഞങ്ങളെ പോലെ അവരും സുഖത്തിലും സന്തോഷത്തിലും ജീവിക്കണമെന്നുള്ള കാഴ്ചപ്പാടാണ് യുഎഇ ഭരണ കർത്താക്കൾക്കുള്ളത്. അതാണ് ഈ വസന്തത്തിന്റെ കാരണം. യാഥാർത്യത്തിൽ ഇതാണ് അറബ് വസന്തം. ഇവിടെ കാണുന്നതാണ് മുല്ലപ്പൂ വിപ്ലവം. ഈ വസന്തത്തിൽ വിരിയുന്ന മുല്ലപ്പൂവിന്റെ സുഗന്ധം തേടി ലോകം മുഴുവൻ ഇവിടേക്ക്  ആകർഷിക്കപ്പെടുന്നു. മതി വരുവോളം മധു നുകർന്ന് സന്തോഷത്തോടെ മടങ്ങുന്നു. അത് തേനായി മാറി പതിനായിരങ്ങൾ വീണ്ടും നുകർന്നു. ഈ മധു നുകരാത്തവരായി ലോകത്താരുണ്ടാകും   

ജീവ കാരുണ്യ പ്രവർത്തനത്തിലും  വിദ്യാഭ്യാസ മേഖലയിലും ഇവർ കാണിക്കുന്ന ഉത്സാഹം ഏവർക്കും മാത്രകയാണ്. കേവലം സാമ്പത്തിക പുരോഗതി മാത്രമല്ല യുഎയുടേത് അത് സംസ്കാരത്തിന്റെയും വിദ്യാഭ്യാസത്തിന്റെയും കൂടിയാണ്. വിദ്യാഭ്യാസത്തിലൂടെ മാത്രമേ ഉന്നതമായ സംസ്കാരം ഉണ്ടാവുകയുള്ളൂ എന്നും വിദ്യാഭ്യാസവും സംസ്കാരവും ഉള്ളവർക്ക് മാത്രമേ ലോകത്തെ നയിക്കാൻ കഴിയുകയുള്ളൂ എന്നും ഇവിടത്തെ ഭരണാധികാരികൾ തിരിച്ചറിയുന്നു. അതിൽ അവർ  വിജയം കൈവരിക്കുകയും ചെയ്തു . 

സ്വാർത്ഥതയില്ലാത്ത ഭരണകർത്താക്കൾ പ്രജകൾക്കാവശ്യമായ ജീവിത സൗകര്യം എല്ലാ നിലയിലും ചെയ്തു കൊടുക്കുന്നു. അടിസ്ഥാന സൗകര്യങ്ങളായ ജലം, വൈദ്യുതി എന്നിവ ആവശ്യത്തിന് അനുസരിച്ച് ഒരു തടസവും കൂടാതെ ലഭ്യമാക്കാനും വ്യവസായം കൃഷി പോലുള്ളവയെ പ്രോത്സാഹിപ്പിക്കാനും അവർ ശ്രദ്ധ ചെലുത്തുന്നു. മരുഭൂമിയെ പച്ച തുരുത്താക്കി മാറ്റിയ ഭരണകർത്താക്കൾ നാളയുടെ വെല്ലുവിളിയെ ഇന്നേ നോക്കിക്കാണാനും അതിവേഗമോടുന്ന ലോകത്തിനു ഒരു ചുവടു മുന്നേ ഓടാനും ശ്രമിക്കുന്നു. അത് തന്നെയാണ് അഭിമാനകരമായ ഈ നേട്ടത്തിന് പിന്നിലെ കാരണവും. 

അന്യ ദേശത്ത് നിന്ന് വന്നു ബിസിനസ്സ് സാമ്രാജ്യങ്ങൾ കെട്ടിപ്പടുത്തു വാനംമുട്ടെ വളർന്നവർ ഇവിടെയുണ്ട് . അവരെയൊക്കെ വീണ്ടും വീണ്ടും പ്രോത്സാഹനങ്ങൾ നൽകിയും അവർക്കാവശ്യമായ മുഴുവൻ അടിസ്ഥാന സൗകര്യങ്ങളും ഒരുക്കി കൊടുത്ത് അവരെ കൂടി രാജ്യത്തിന്റെ പുരോഗതിയിൽ ഭഗവാക്കാക്കുന്നതോടൊപ്പം ലക്ഷക്കണക്കിന് ആൾക്കാർക്ക് തൊഴിലവസരം സൃഷ്‌ടിക്കുകയുമാണ് ചെയ്യുന്നത്.

ഇന്ത്യക്കാരുടെ ഇഷ്‌ട തൊഴിലിടമാണ് യുഎഇ. അന്നം തേടിയെത്തുന്ന ലക്ഷങ്ങൾ എന്നും നന്ദിയോടെ മാത്രമേ ഈ നാടിനെ ഓർക്കുകയുള്ളു. ഇന്നലകളിൽ അവരുടെ പിതാക്കരുടെയോ ബന്ധുക്കളുടെയോ കാലടികൾ പതിഞ്ഞ മണ്ണിലൂടെയാണ് അവരും നടക്കുന്നത് എന്നവർ സ്മരിക്കുന്നു. ഒരു പക്ഷെ ഞങ്ങളുടെ മാതാപിതാക്കൾ പാലൂട്ടിയതും അന്നം നൽകിയതും ഈ രാജ്യത്തിന്റെ സമ്പന്നതയിൽ നിന്നായിരിക്കും. അത് കൊണ്ട് തന്നെ ഈ ശരീരത്തിനും ഈ രാജ്യത്തോട് ഒരു കടപ്പാടുണ്ട്. ആയതിനാൽ ഈ നാടിന്റെ ഏതാഘോഷങ്ങളെന്ന പോലെ ഈ ആഘോഷത്തിലും ഞങ്ങൾ പൂർണമായും ആഹ്ലാദിക്കുകയും അഭിമാനിക്കുകയും നന്ദിയോടെ ഒരായിരം സ്നേഹപൂക്കൾ സമ്മാനിക്കുകയും ചെയ്യുന്നു.                     

പ്രത്യാശയുടെയും ഐശ്വര്യത്തിന്റെയും തുരുത്തതാണിവിടം. ഇവിടെ എത്തുന്ന പലരും ഇവിടെ ലഭിക്കുന്നതിനേക്കാൾ കൂടുതൽ വേതനത്തിന് നാട്ടിൽ ജോലി ചെയ്തിട്ടുണ്ടാവും എന്നിട്ടും ഒന്നും മിച്ചംവെക്കാൻ കഴിയാത്തവർ ഇവിടെ ജോലി ചെയ്തു സാമ്രാജ്യം കെട്ടിപ്പടുക്കുന്നത് നാം എത്രയോ കാണുന്നു. ഉറവ വറ്റാത്ത തെളിനീരായി യുഎഇ ഉള്ള കാലത്തോളം  അതിന്നരികിൽ കഴിയുന്നവർക്കെല്ലാം ക്ഷേമവും ഐശ്വര്യവും നിലനിൽക്കും. മലയാളിയുടെ സാമ്പത്തിക അടിത്തറ തന്നെ ഗൾഫാണെന്ന് പറഞ്ഞാൽ തെറ്റാവില്ല. അതിൽ മുൻപന്തിയിലാണ് ഇമാറാത്ത്.

യുഎഇ കൈവരിക്കുന്ന ഏതു നേട്ടങ്ങളെയും ഇവിടെയുള്ള വിദേശികളും അവരുടെ കൂടി അഭിമാനമായി നോക്കി കാണുന്നു. കാരണം സ്വന്തം രാജ്യത്തെ പോലെ തന്നെ യുഎഇയെയും അവർ സ്നേഹിച്ചു തുടങ്ങിയിരിക്കുന്നു.  ആകാശം മുട്ടെ ഉയർന്നു നിൽക്കുന്ന ബുർജ്ഖലീഫ ലോകത്തെ തന്നെ ഏറ്റവും വലിയ കെട്ടിടമാണ്. അത് നമ്മുടെ കൂടി അഭിമാനമാകുന്നത് അത് നിൽക്കുന്ന ഭൂമിയിൽ മാതൃരാജ്യത്തെ പോലെ നാം ജീവിക്കുന്നത് കൊണ്ടാണ്. ബുർജ് ഖലീഫ നമ്മുടെ സ്വന്തം എന്ന പോലെ അതിന്റെ ആകാര വടിവിനെ കുറിച്ചും തലയെടുപ്പിനെ കുറിച്ചും നാം എത്ര പേരോട് വാതോരാതെ സംസാരിച്ചിട്ടുണ്ടാവും. എന്ത് കൊണ്ടാണ് സ്വന്തമെന്നപോലെ നമുക്കതു തോന്നുന്നത്. അത് ഈ മണ്ണിനോടുള്ള വൈകാരികതയും മാനസിക അടുപ്പവും കൊണ്ടാണ്. 

പലതിനെയും വ്യത്യസ്തയോടെ തന്നെ ഒന്നായി കാണാനുള്ള അറബ് സമൂഹത്തിന്റെ നല്ല മനസിനെ നമുക്ക് പുകഴ് ത്താതിരിക്കാൻ കഴിയില്ല. നമ്മുടെ സ്വന്തം രാജ്യത്തു നിന്നു സ്വന്തക്കാർ തന്നെ മണ്ണിൻ മക്കൾ വാദം പറഞ്ഞും മറ്റും ആട്ടിയോടിക്കുമ്പോൾ ദേശവും ഭാഷയും മതവും നോക്കാതെ എല്ലാവരെയും "ഹബീബി" എന്ന് വിളിക്കുന്ന ഇവിടത്തു കാരെ നാം എന്ത് വിളിക്കും. സഹോദരനെന്നോ അതല്ല വാത്സല്യം നൽകുന്ന പിതാവെന്നോ? ഈ നന്മ മരിക്കാത്തിടത്തോളം നാം പട്ടിണിയാവില്ല, തീർച്ച.

ചെരിപ്പേറും കൂക്ക് വിളിയും കരിങ്കൊടിയുമായി സ്വന്തം നേതാക്കളെ പോലും സ്വീകരിക്കുന്ന പലരും ഹൃദയത്തിന്റെ കോണിൽ സ്നേഹത്തിന്റെ ഒരു ഇരിപ്പിടം ഇവിടത്തെ ഭരണാധികാരികൾക്കായി നീക്കി വെച്ചിട്ടുണ്ടാകും, അത് അവർ കാണിക്കുന്ന സ്നേഹത്തിന്റെയും വിശാല മനസ്കതയും കൊണ്ടാണ്. ജനക്ഷേമം വാക്കിലൊതുങ്ങാതെ പ്രവർത്തി പഥത്തിൽ കൊണ്ടുവന്നു ഇവരെ പോലെ നന്മയുടെ വാക്താക്കളാകാൻ മറ്റു ഭരണാധികാരികളും നേതാക്കളും തയാറാവണം.

യുഎഇ നടന്നു തീർത്തത് കഷ്‌ടപ്പാടുകളുടെയും യാതനകളുടെയും ഇന്നലെകൾ ആയിരുന്നു ഇന്നവർക്കഭിമാനിക്കാം. മരുഭൂമിയിൽ ഒട്ടകപ്പുറത്ത് പോയവർ ഇന്ന് ബഹിരാകാശങ്ങളിൽ പോയി ഗവേഷണം നടത്തുന്നു. ഇനിയും ഏറെ ദൂരം നടക്കാൻ ഉണ്ട് പുരോഗതിയുടെ ഗിരിശ്രിംഗങ്ങൾ കീഴടക്കാനും ലോകത്തിന്റെ നായകത്വം ഏറ്റെടുക്കാനും നിങ്ങൾക്ക് കഴിയും. നിങ്ങളുടെ ത്യാഗവും അർപ്പണ ബോധവും ധീരരും കഴിവുറ്റവരുമായ നേതാക്കളും അതിനു വഴിതെളിയിക്കും. ഇനിയും നടന്നു തീർക്കാനുള്ള വഴിദൂരങ്ങളിൽ ഞങ്ങളും നിങ്ങൾക്കൊപ്പമുണ്ട്. അനുഭവിച്ച എല്ലാ സുഖങ്ങളും നന്ദിയോടെ ഓർത്തു കൊണ്ട്. അമ്പത്തിനാലിന്റെ നിറവിൽ ഈ രാജ്യത്തിനും ഭരണ കർത്താക്കൾക്കും ഒപ്പം ഓരോ പൗരനും ഞങ്ങളുടെ ഒരായിരം ദേശിയ ദിനാശംസകൾ.