കോഴിക്കോട് ബോഡി ഷെയിമിങ്ങിനെയും (ശാരീരിക പ്രകൃതത്തെ പരിഹസിക്കൽ) റാഗിങ്ങിന്റെ പട്ടികയിൽ ഉൾപ്പെടുത്തി കേരള റാഗിങ് നിരോധന (ഭേദഗതി) ബില്ലിന്റെ കരട് തയാറായി.ഇന്റർനെറ്റിലൂടെയോ വാട്സ്ആപ്പ് ഉൾപ്പെടെയുള്ള ഡിജിറ്റൽ പ്ലാറ്റ്ഫോമിലൂടെയോ നടക്കുന്ന ഏതുതരത്തിലുള്ള ഉപദ്രവവും ശല്യംചെയ്യലും റാഗിങ് നിയമത്തിന്റെ പരിധിയിൽ കൊണ്ടുവരികയും അവയ്ക്ക് കഠിന ശിക്ഷ നിർദേശിക്കുകയും ചെയ്താണ് ബിൽ ഭേദഗതി ചെയ്തത്.

അധ്യാപന വകുപ്പുകൾ, ഉന്നത വിദ്യാഭ്യാസ സ്ഥാപനങ്ങൾ, സ്‌കൂളുകൾ, പൊതുവിദ്യാഭ്യാസ വകുപ്പിന് കീഴിലുള്ള മറ്റ് സ്ഥാപനങ്ങൾ, സംസ്ഥാന സർക്കാരിന് കീഴിലുള്ള സർവകലാശാലകൾ, കൽപിത സർവകലാശാലകൾ, കേന്ദ്ര സർവകലാശാലകൾ അടക്കം

എല്ലാ വിദ്യാഭ്യാസ സ്ഥാപനങ്ങളെയും ഉൾപ്പെടുത്തി പരിധി വിപുലീകരിച്ചു. പാർലമെന്റ് നിയമപ്രകാരം സ്ഥാപിതമായ ദേശീയ പ്രാധാന്യമുള്ള സ്ഥാപനങ്ങൾ, സ്വകാര്യ കോച്ചിങ് - ട്യൂഷൻ സെൻ്ററുകൾ എന്നിവയെയും വിദ്യാഭ്യാസ സ്ഥാപനങ്ങളുടെ നിർവചനത്തിന് കീഴിൽ കൊണ്ടുവന്നിട്ടുണ്ട്.

കളിസ്ഥലങ്ങൾ, കാംപസിനകത്തും പുറത്തും സ്ഥിതിചെയ്യുന്ന കാൻ്റീനുകൾ, ബസ് സ്റ്റാൻഡുകൾ, ഹോംസ്റ്റേകൾ (പി.ജി സംവിധാനം), വിദ്യാർഥി കൾക്ക് പഠനത്തിനായി ലഭ്യമായ പൊതു, സ്വകാര്യ ഗതാഗത സൗകര്യങ്ങൾ എന്നിവയ്ക്ക് പുറമെ എല്ലാ സ്ഥാപനങ്ങളുടെയും അക്കാദമിക്, പാർപ്പിട പരിസരങ്ങളും കരട് നിയമത്തിന്റെ പരിധിയിൽ ഉൾപ്പെടുന്നു.

കോട്ടയം ഗവ. നഴ്സിങ് കോളേജിലെ ക്രൂരമായ റാഗിങ്, പൂക്കോട് വെറ്ററിനറി സർവകലാശാലയിലെ ജെ.എസ് സിദ്ധാർത്ഥൻ്റെ മരണം തുടങ്ങി വിവിധ കേസുകളുടെ പശ്ചാത്തലത്തിൽ ഹൈക്കോടതി ഇടപെടലിനെ തുടർന്നാണ് റാഗിങ് തടയുകയെന്ന ഉദ്ദേശത്തോടെ റാഗിങ് വിരുദ്ധനിയമം കടുപ്പിച്ചത്.

കാംപസിന് പുറത്തുനടക്കുന്ന സമാനസ്വഭാവമുള്ള വിദ്യാർഥിസംഘർഷങ്ങളെ റാഗിങ്ങായി കണക്കാക്കുംവിധം കേരള റാഗിങ് നിരോധന നിയമത്തിൽ ഭേദഗതി വേണമെന്നായിരുന്നു ഹൈക്കോടതി ഉത്തരവ്. നിയമത്തിൽ വിദ്യാഭ്യാസ സ്ഥാപനങ്ങൾക്ക് കൃത്യമായ നിർവചനം വേണമെന്നും ചീഫ് ജസ്റ്റിസ് നിതിൻ ജാംദാർ, ജസ്റ്റിസ് സി. ജയചന്ദ്രൻ എന്നിവരടങ്ങുന്ന പ്രത്യേക ഡിവിഷൻ ബെഞ്ച് നിർദേശിച്ചിരുന്നു.

ബില്ലിന്റെ കരട് കേരള സ്റ്റേറ്റ് ലിഗൽ സർവിസസ് അതോറി റ്റിക്കും യൂനിവേഴ്സിറ്റി ഗ്രാന്റ്സ് കമ്മിഷനും (യു.ജി.സി) നൽകണമെന്ന് ഹൈക്കോടതി അടുത്തിടെ സംസ്ഥാന സർക്കാരിനോട് ആവശ്യപ്പെട്ടിരുന്നു.

റാഗിങ്ങിൻ്റെ പരിധിയിൽ വരുന്ന പ്രധാന പ്രവൃത്തികൾ

ബോഡി ഷെയിമിങ്, ഓൺലൈൻ വഴിയുള്ള ശല്യംചെയ്യൽ, ക്രിമിനൽ ഗൂഢാലോചന, നിയമവിരുദ്ധമായി സംഘംചേരൽ, കലാപം, പൊതുശല്യം, റാഗിങ്ങിനിടെ ചെയ്യുന്ന അശ്ലീലവും ലൈംഗികവുമായ പ്രവർത്തനങ്ങൾ. ശാരീരിക ഉപദ്രവം, മോഷണം, പിടിച്ചുപറി, സത്യസന്ധമല്ലാത്ത സ്വത്ത് ദുരുപയോഗം, വിശ്വാസവഞ്ചന, അതിക്രമം, ഭീഷണിപ്പെടുത്തൽ.

Kerala Prohibition of Ragging (Amendment) Bill, has also brought “any form of ragging committed through the internet or in any digital mode” under the ambit of the criminal act of ragging for which severe punishment has been prescribed.