നിലവിലെ യൂറോപ്യൻ ചാമ്പ്യന്മാരായ പാരീസ് സെയ്ന്റ് ജെർമെയ്നെ എതിരില്ലാത്ത മൂന്ന് ഗോളുകൾക്ക് കീഴടക്കി ചെൽസി 2025 ഫിഫ ക്ലബ്ബ വേൾഡ് കപ്പ് ചാമ്പ്യന്മാരായിരിക്കുകയാണ്. ചെൽസിയുടെ രണ്ടാം ഫിഫ ക്ലബ്ബ് ലോകകപ്പ് കിരീടമാണിത്. ഇതിനുമുമ്പ് 2021ലാണ് ചെൽസി ക്ലബ്ബ് ലോകകപ്പ് നേടിയത്. 

നിലവിൽ ഫുട്ബോളിലെ എല്ലാ മേജർ കിരീടങ്ങളും സ്വന്തമാക്കിയ ടീം ചെൽസി മാത്രമാണ്. ഫിഫ ക്ലബ് വേൾഡ് കപ്പിന് പുറമെ ഇംഗ്ലീഷ് പ്രീമിയർ ലീഗ്, യുവേഫ ചാമ്പ്യൻസ് ലീഗ്, യുവേഫ യൂറോപ്പ ലീഗ്, ഇഎഫ്എൽ കപ്പ്, യുവേഫ കോൺഫറൻസ് ലീഗ്, എഫ്എ കപ്പ് എന്നീ കിരീടങ്ങളാണ് ചെൽസി സ്വന്തമാക്കിയിട്ടുള്ളത്. 

ALSO READ: പിഎസ്ജിയെ വീഴ്ത്തി ലോക ചാമ്പ്യന്മാരായി ചെൽസി; കിരീട നേട്ടത്തിനൊപ്പം പിറന്നത് പുതിയ ചരിത്രം

മത്സരത്തിൽ കോൾ പാൽമറിന്റെ ഇരട്ട ഗോൾ മികവിലാണ് ചെൽസി ജയിച്ചു കയറിയത്. ആദ്യപകുതിയിൽ തന്നെ ചെൽസി പിഎസ്ജിയുടെ പോസ്റ്റിലേക്ക് മൂന്ന് ഗോളുകൾ അടിച്ചു കൂട്ടിയിരുന്നു. മത്സരത്തിൽ 22, 30 എന്നീ മിനിറ്റുകളിൽ ആയിരുന്നു ഇംഗ്ലണ്ട് താരത്തിന്റെ ഗോളുകൾ പിറന്നത്. ജാവോ പെഡ്രൊയാണ് മൂന്നാമത്തെ ഗോൾ നേടിയത്. 

മെറ്റ്ലൈഫ് സ്റ്റേഡിയത്തിൽ നടന്ന മത്സരത്തിൽ 4-3-3 എന്ന ഫോർമേഷനിൽ ആണ് പിഎസ്ജി കളത്തിലിറങ്ങിയത്. മറുഭാഗത്ത് 4-2-3-1 എന്ന ശൈലിയായിരുന്നു ചെൽസി പിന്തുടർന്നത്. മത്സരത്തിന്റെ അവസാന നിമിഷങ്ങളിൽ പിഎസ്ജി താരം ജോവോ നെവസ് ചുവപ്പ് കാർഡ് കണ്ട് പുറത്തു പോയതും പാരീസിന് തിരിച്ചടിയായി.

മത്സരത്തിൽ ബോൾ പൊസഷന്റെ കാര്യത്തിൽ ചെൽസി മുന്നിട്ടുനിന്നെങ്കിലും ഷോട്ടുകളുടെ എണ്ണത്തിൽ പിഎസ്ജി ആയിരുന്നു ചെൽസിയെക്കാൾ മുന്നിൽ എത്തിയത്. 67 ശതമാനം ബോൾ പൊസഷൻ സ്വന്തമാക്കിയ ചെൽസി എട്ട് ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ ആറ് ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് 10 ഷോട്ടുകളിൽ നിന്നും അഞ്ചു ഷോട്ടുകളും പിഎസ്ജി ചെൽസിയുടെ പോസ്റ്റിലേക്ക് എത്തിച്ചു. 

Chelsea Become the first team to won all major trophies in football history