തിരുവനന്തപുരം: പാല്‍വില കൂട്ടാനുള്ള നീക്കവുമായി മില്‍മ. ലിറ്ററിന് മൂന്ന് മൂതല്‍ നാലരൂപ വരെ വര്‍ധിപ്പിക്കാനാണ് സാധ്യത. ഇന്ന് നടക്കുന്ന മില്‍മ ബോര്‍ഡ് ഓഫ് ഡയറക്ടേഴ്സിന്റെ യോഗത്തില്‍ വില വര്‍ധന സംബന്ധിച്ച് തീരുമാനമെടുക്കും.  മില്‍മ ഫെഡറേഷന്റെ തിരുവനന്തപുരത്തെ പട്ടത്തെ ഹെഡ് ഓഫിസില്‍ ഇന്ന് പതിനൊന്ന് മണിക്കാണ് യോഗം. മൂന്ന് മേഖല യൂണിയനുകളിലെ ചെയര്‍മാന്‍മാര്‍, എംഡിമാര്‍ തുടങ്ങിയവര്‍ പങ്കെടുക്കും.  സര്‍ക്കാര്‍ അനുമതിയോടെയാണ് സാധാണ വില കൂട്ടല്‍ നടപ്പാക്കാറ്. 

മില്‍മ തിരുവന്തപുരം, എറണാകുളം യൂണിയനുകള്‍ വര്‍ധനക്ക് അനുകൂലമായി തീരുമാനം എടുത്തിരുന്നു. അതേ സമയം മലബാര്‍ യൂണിയന്‍ വില കൂട്ടേണ്ടതില്ല എന്ന നിലപാടിലാണെന്നാണ് സൂചന. ലിറ്ററിന് പത്ത് രൂപ വര്‍ധനയാണ് എറണാകുളം യൂണിയന്‍ ശിപാര്‍ശ ചെയ്തതെന്നും റിപ്പോര്‍ട്ടുകള്‍ സൂചിപ്പിക്കുന്നു. അതേസമയം, ഉത്പാദന ചെലവിന് ആനുപാതികമായ വര്‍ധന എന്നാണ് തിരുവനന്തപുരം യൂണിയന്റെ നിലപാട്. 

ALSO READ: ഗസ്സയില്‍ സൈന്യം വാണിജ്യ ഡ്രോണുകള്‍ ഉപയോഗിച്ച് കുട്ടികളെ കൊന്നൊടുക്കുന്നു: വെളിപ്പെടുത്തിയത് ഇസ്‌റാഈല്‍ മാധ്യമം

2019 സെപ്തംബറില്‍ ലിറ്ററിന് നാല് രൂപയും 2022 ഡിസംബറില്‍ ലിറ്ററിന് ആറ് രൂപയും മില്‍മ കൂട്ടിയിരുന്നു. നിലവില്‍ മില്‍മ പാല്‍ വില (ടോണ്‍ഡ് മില്‍ക്ക്) ലിറ്ററിന് 52 രുപയാണ്. പ്രതിദിനം 17ലക്ഷം ലിറ്റര്‍ പാലാണ് കേരളത്തില്‍ മില്‍മ വില്‍ക്കുന്നത്. പാലിന്റെ ഗുണനിലവാരമനുസരിച്ച് 42 മുതല്‍ 48 രൂപവരെ കര്‍ഷകന് ലഭിക്കും. 

പാലിന് വില കൂട്ടിയാല്‍ മില്‍മയുടെ എല്ലാ പാലുല്‍പ്പന്നങ്ങള്‍ക്കും ആനൂപാതികമായി വില വര്‍ധിക്കും. സ്വകാര്യ ഉല്‍പാദകരും വില കൂട്ടും. നിലവില്‍ മറ്റ് സംസ്ഥാനങ്ങളിലേക്കാള്‍ കേരളത്തില്‍ പാല്‍ വില കൂടുതലാണ്. ഒരുദിവസം ശരാശരി 12.6 ലക്ഷം ലിറ്റര്‍ പാലാണ് മില്‍മ കേരളത്തില്‍നിന്ന് സംഭരിക്കുന്നത്. ശരാശരി 17 ലക്ഷം ലിറ്റര്‍ വില്‍ക്കുന്നുണ്ട്.

അധികമായി വേണ്ട പാല്‍ കര്‍ണാടക, മഹാരാഷ്ട്ര സംസ്ഥാനങ്ങളുടെ സഹകരണമേഖലയില്‍നിന്നാണ് വാങ്ങുകയാണ് ചെയ്യുക.

Milma is considering a price hike of ₹3 to ₹4 per litre of milk, with a final decision expected at the board meeting today in Thiruvananthapuram.