പത്തനംതിട്ട: എഡിജിപി എംആര്‍ അജിത്കുമാര്‍ ശബരിമലയിലേക്ക് ട്രാക്ടറില്‍ സഞ്ചരിച്ച കേസില്‍ ഡ്രൈവര്‍ക്കെതിരെ കുറ്റം ചുമത്തി പൊലിസ്. പമ്പ പൊലിസാണ് ട്രാക്ടര്‍ ഡ്രൈവര്‍ക്കെതിരെ കേസ് രജിസ്റ്റര്‍ ചെയ്തത്.

ALSO READ: തൃശൂര്‍ പൂരം കലക്കല്‍: അജിത് കുമാറിനെതിരെ നടപടി വേണമെന്ന് ആഭ്യന്തര സെക്രട്ടറി;  ഡി.ജി.പി സമര്‍പ്പിച്ച റിപ്പോര്‍ട്ട് ശരിവച്ചു

എഡിജിപി എംആര്‍ അജിത്കുമാര്‍ ട്രാക്ടറില്‍ യാത്ര ചെയ്ത സംഭവത്തില്‍ ഹൈക്കോടതി ഇന്ന് രൂക്ഷവിമര്‍ശനം നടത്തിയിരുന്നു. എഡിജിപിയുടെ യാത്ര മനഃപൂര്‍വമാണെന്നും ഇത് ഹൈക്കോടതി വിധിയുടെ ലംഘനമാണെന്നും പറഞ്ഞ കോടതി ആരോഗ്യ പ്രശ്‌നം ഉണ്ടെങ്കില്‍ ആംബുലന്‍സ് ഉപയോഗിക്കണമെന്നും പറഞ്ഞു.

മോട്ടോര്‍ വാഹന ആക്ട് പ്രകാരമാണ് നിലവില്‍ ട്രാക്ടര്‍ ഡ്രൈവര്‍ക്കെതിരെ കേസ് എടുത്തിട്ടുള്ളത്. മനുഷ്യ ജീവന് അപകടകരമാകും വിധം വാഹനമോടിച്ചതിനും രാത്രി ഒമ്പത് മണിക്ക് ശേഷം നിയമവിരുദ്ധമായി മൂന്നു പേരെ ട്രാക്ടറില്‍ കയറ്റി എന്നുമാണ് കേസ്. സ്വാമി അയ്യപ്പന്‍ റോഡിലൂടെ ചരക്ക് നീക്കത്തിന് മാത്രമേ ട്രാക്ടര്‍ ഉപയോഗിക്കാന്‍ അനുമതിയുള്ളൂ എന്ന് നേരത്തേ ഹൈക്കോടതി ഉത്തരവിട്ടിരുന്നു. ക്യാമറകള്‍ ഇല്ലാത്ത ഇടത്തു വെച്ചാണ് കഴിഞ്ഞ ശനിയാഴ്ച എഡിജിപി വാഹനത്തില്‍ കയറിയത്. ട്രാക്ടര്‍ യാത്ര വിവാദമായതോടെ പമ്പയില്‍ നിന്ന് സന്നിധാനത്തേക്കുള്ള ട്രാക്ടറുകളില്‍ പൊലിസ് സുരക്ഷാ പരിശോധന കര്‍ശനമാക്കിയിട്ടുണ്ട്. സാധാരണ സാധനങ്ങള്‍ വയ്ക്കുന്ന ഭാഗം ടാര്‍പോളിന്‍ ഉപയോഗിച്ച് മറയ്ക്കാറുണ്ട്. ഇതുള്‍പ്പെടെ പരിശോധന നടത്തുന്നുണ്ട്.

ALSO READ: നീതി നടപ്പാകണമെന്ന ആവശ്യവുമായി തലാലിന്റെ കുടുംബം; നിമിഷപ്രിയയുടെ മോചന ശ്രമങ്ങൾക്ക് വെല്ലുവിളി തുടരുന്നു

ഹൈക്കോടതി വിമര്‍ശനത്തിനു പിന്നാലെ മന്ത്രി കെ. രാജന്‍ എഡിജിപിയെ പരിഹസിച്ചു. മലയാളത്തില്‍ വകതിരിവ് എന്നൊരു വാക്ക് ഉണ്ടെന്നും അതുണ്ടാക്കി എടുക്കേണ്ടതാണെന്നും ട്യൂടോറിയല്‍ കോളേജില്‍ പോയാല്‍ ലഭിക്കില്ലെന്നും മന്ത്രി പറഞ്ഞു.