കോഴിക്കോട്: സ്കൂൾ സമയമാറ്റം, സർക്കാരുമായുള്ള ചർച്ചയിൽ പ്രായോഗിക നിർദ്ദേശങ്ങൾ സമർപ്പിക്കാനും അനുകൂലമായ നടപടി ഉണ്ടാവുന്നില്ലെങ്കിൽ സമരം ശക്തമാക്കാനും കോഴിക്കോട് ചേർന്ന സമസ്തയുടെയും പോഷക സംഘടനകളുടെയും സംയുക്ത ഏകോപന സമിതി യോഗം തീരുമാനിച്ചു. സ്കൂൾ സമയം രാവിലെയും വൈകുന്നേരവുമായി അരമണിക്കൂർ വർദ്ധിപ്പിക്കുന്നത് മദ്റസ പഠനത്തെ പ്രതികൂലമായി ബാധിക്കുന്നതിനാൽ സമയ മാറ്റം പുനഃപരിശോധിക്കണമെന്ന് സമസ്ത മുഖ്യമന്ത്രിക്ക് നിവേദനം സമർപ്പിച്ചിരുന്നു. ഇത് സംബന്ധമായി സർക്കാർ ചർച്ചക്ക് വിളിക്കുകയോ നിവേദനത്തിന് അനുകൂല തീരുമാനമുണ്ടാവുകയോ ചെയ്തിട്ടില്ല. ഈ സാഹചര്യത്തിലാണ് സമസ്തയുടെ പോഷക ഘടകമായ സമസ്ത കേരള മദ്റസ മാനേജ്മെന്റ് അസോസിയേഷൻ സമര പ്രഖ്യാപനം നടത്തിയത്.

വിദ്യാഭ്യാസ മന്ത്രി സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങളെ ഇന്ന് ഫോണിൽ വിളിച്ച് സമസ്തയുമായി ചർച്ച ചെയ്യാമെന്ന് അറിയിച്ചിട്ടുണ്ട്. ചർച്ചയിൽ പ്രായോഗിക നിർദ്ദേശങ്ങൾ സമർപ്പിക്കും. അനുകൂല തീരുമാനമുണ്ടാവുന്നില്ലെങ്കിൽ സമസ്തയുടെ എല്ലാ ഘടകങ്ങളും ഒന്നിച്ച് സമരം കൂടുതൽ ശക്തമാക്കാനും യോഗം തീരുമാനിച്ചു.

ALSO READ: നിമിഷ പ്രിയയുടെ വധശിക്ഷ നടപ്പാക്കുന്നത് നീട്ടി; യമനില്‍ ചര്‍ച്ച തുടരും  

സമസ്ത കേരള ഇസ്ലാം മത വിദ്യാഭ്യസ ബോർഡ് ജനറൽ സെക്രട്ടറി എം.ടി അബ്ദുല്ല മുസ്ലിയാർ അദ്ധ്യക്ഷനായി. മാനേജർ കെ മോയിൻ കുട്ടി മാസ്റ്റർ സ്വാഗതം പറഞ്ഞു. എസ്.വൈ.എസ് സംസ്ഥാന ജനറൽ സെക്രട്ടറി സയ്യിദ് മുഹമ്മദ് കോയ തങ്ങൾ ജമലുല്ലൈലി ഉദ്ഘാടനം ചെയ്തു. സമസ്ത സെക്രട്ടറി കെ ഉമർ ഫൈസി മുക്കം, കേന്ദ്ര മുശാവറ അംഗങ്ങളായ ഡോ. ബഹാഉദ്ദീൻ മുഹമ്മദ് നദ്വി കൂരിയാട്, എസ്.കെ.ഐ.എം.വി.ബി സെക്രട്ടറി ഡോ. എൻ.എ.എം അബ്ദുൽഖാദിർ, എസ്.വൈ.എസ് സംസ്ഥാന വർക്കിംഗ് സെക്രട്ടറി അബ്ദദുൽ ഹമീദ് ഫൈസി അമ്പലക്കടവ്, എസ്.എം.എഫ് വർക്കിംഗ് സെക്രട്ടറി അബ്ദുസ്സമദ് പൂക്കോട്ടൂർ, എസ്.കെ.എം.എം.എ വൈസ് പ്രസിഡന്റ് കൊട്ടപ്പുറം അബ്ദുല്ല മാസ്റ്റർ, എസ്.കെ.ജെ.എം.സി.സി ജനറൽ സെക്രട്ടറി കൊടക് അബ്ദുറഹിമാൻ മുസ്ലിയാർ, എസ്.കെ.ജെ.ക്യു ജനറൽ സെക്രട്ടറി നാസർ ഫൈസി കൂടത്തായി, എസ്.കെ.എസ്.എസ്.എഫ് സംസ്ഥാന ജനറൽ സെക്രട്ടറി ഒ.പി.എം അഷ്റഫ് മൗലവി, സത്താർ പന്തല്ലൂർ, എസ്.ഇ.എ ജനറൽ സെക്രട്ടറി ഡോ. ബഷീർ മാസ്റ്റർ പനങ്ങാങ്ങര, കെ.എ റശീദ് ഫൈസി വെള്ളായിക്കോട്, ജംഇയ്യത്തുൽ മുഫത്തിശീൻ സെക്രട്ടറി കെ.എച്ച്. കോട്ടപ്പുഴ എന്നിവർ സംസാരിച്ചു.

samastha press meet on School timing