തിരുവനന്തപുരം: തേവലക്കര സ്‌കൂളില്‍ വിദ്യാര്‍ഥി ഷോക്കേറ്റ് മരിച്ച സംഭവത്തില്‍ നടപടിയുമായി സര്‍ക്കാര്‍. പ്രധാനാധ്യാപികയെ സസ്‌പെന്‍ഡ് ചെയ്യാന്‍ നിര്‍ദ്ദേശിച്ചു. മാനേജ്‌മെന്റ് ആണ് നടപടിയെടുക്കേണ്ടത്. മാനേജ്‌മെന്റ് ചെയ്തില്ലെങ്കില്‍ സര്‍ക്കാര്‍ ചെയ്യുമെന്നും വിദ്യാഭ്യാസ മന്ത്രി വി. ശിവന്‍ കുട്ടി വാര്‍ത്താ സമ്മേളനത്തില്‍ അറിയിച്ചു. കൊല്ലം എ.ഇഒയോട് വിശദീകരണം തേടും. മാനേജ്‌മെന്റിന് കാരണം കാണിക്കല്‍ നോട്ടിസ് അയക്കുമെന്നും മന്ത്രി വ്യക്തമാക്കി. മിഥുന്റെ അനുജന്റെ പഠനം സര്‍ക്കാര്‍ ഏറ്റെടുക്കും. അടിയന്തിര ധനസഹായമായി മൂന്ന് ലക്ഷം രൂപ കൈമാറും. സ്‌കൂള്‍ പി.ടി.എ പുനഃസംഘടിപ്പിക്കുമെന്നും മന്ത്രി വ്യക്തമാക്കി.

ALSO READ: 'സ്‌കൂളിനും പ്രധാനാധ്യാപികക്കും വീഴ്ച പറ്റി'  വിദ്യാര്‍ഥി ഷോക്കേറ്റ് മരിച്ച സംഭവത്തില്‍ പൊതുവിദ്യാഭ്യാസ ഡയറക്ടറുടെ റിപ്പോര്‍ട്ട്
സംഭവത്തില്‍ സ്‌കൂള്‍ അധികൃതര്‍ മുതല്‍ ഫിറ്റ്‌നസ് സര്‍ട്ടിഫിക്കറ്റ് നല്‍കിയ ഉദ്യോഗസ്ഥര്‍ക്ക് വരെ വീഴ്ച പറ്റിയെന്ന് വ്യക്തമാക്കുന്നതാണ് പൊതുവിദ്യാഭ്യാസ ഡയറക്ടറുടെ റിപ്പോര്‍ട്ട്. സുരക്ഷ ഉറപ്പാക്കുന്നതില്‍ വീഴ്ച പറ്റിയെന്നും പ്രോട്ടോകോള്‍ പാലിച്ചില്ലെന്നും റിപ്പോര്‍ട്ട് ചൂണ്ടിക്കാട്ടുന്നു. 
പ്രധാന അധ്യാപികയ്ക്ക് വീഴ്ച പറ്റിയെന്നും റിപ്പോര്‍ട്ടിലുണ്ട്. വൈദ്യുതലൈന്‍ വര്‍ഷങ്ങളായി അപകടാവസ്ഥയിലാണെന്നും റിപ്പോര്‍ട്ട് പരാമര്‍ശിക്കുന്നു. ഫിറ്റ്നസ് സര്‍ട്ടിഫിക്കറ്റ് നല്‍കുന്നതിന് മുമ്പ് സുരക്ഷാ പരിശോധന കാര്യക്ഷമമാക്കിയില്ലെന്നും ഇതില്‍ ഉദ്യോഗസ്ഥര്‍ക്കും വീഴ്ച പറ്റിയെന്നും ഇതില്‍ വ്യക്തമാക്കുന്നു. 

2025 മെയ് മാസം 13 ന് വിശദമായ ഒരു സര്‍ക്കുലര്‍ പൊതുവിദ്യാഭ്യാസ ഡയറക്ടര്‍ പുറപ്പെടുവിച്ചിരുന്നുവെന്ന് വാര്‍ത്താ സമ്മേളനത്തിനിടെ മന്ത്രി ചൂണ്ടിക്കാട്ടി. 2025-26 അധ്യയന വര്‍ഷം സ്‌കൂള്‍ തുറക്കുന്നതുമായി ബന്ധപ്പെട്ട് സ്വീകരിക്കേണ്ട മുന്നൊരുക്കങ്ങള്‍ സംബന്ധിച്ച നിര്‍ദ്ദേശങ്ങള്‍ ആയിരുന്നു ആ സര്‍ക്കുലറില്‍ ഉണ്ടായിരുന്നുവെന്നും അദ്ദേഹം വ്യക്തമാക്കി. 

ഇതില്‍ ഒന്നാം തലക്കെട്ട് സ്‌കൂള്‍ സുരക്ഷ എന്ന ഒന്നാം തലക്കെട്ടിലെ ഒമ്പതാമത്തെ നിര്‍ദ്ദേശം മന്ത്രി വായിച്ചു.  സ്‌കൂളിലേക്കുള്ള വഴി, സ്‌കൂള്‍ പരിസരം, കോമ്പൗണ്ട് എന്നിവിടങ്ങളില്‍ ഉള്ള വൈദ്യുത പോസ്റ്റ്, ഇലക്ട്രിക് ലൈന്‍, സ്റ്റേവയര്‍, സുരക്ഷാ വേലികള്‍ ഇല്ലാതെയുള്ള ട്രാന്‍സ്ഫോര്‍മറുകള്‍മുതലായവ അപകടകരമാംവിധം കാണുകയാണെങ്കില്‍ ആയത് ബന്ധപ്പെട്ട കെ.എസ്.ഇ.ബി അധികൃതരെ അറിയിക്കേണ്ടതും കുട്ടികളുടെ സുരക്ഷിതത്വം ഉറപ്പാക്കുന്നതിനുള്ള നടപടികള്‍ സ്വീകരിക്കേണ്ടതുമാണെന്നാണ് അതില്‍ പറയുന്നത്.

ഈ സര്‍ക്കുലര്‍ എല്ലാ വിദ്യാഭ്യാസ ഉപഡയറക്ടര്‍മാരെയും ഡയറ്റ് പ്രിന്‍സിപ്പല്‍മാരെയും ആര്‍.ഡി.ഡി. മാരെയും എ.ഡി. മാരെയും ജില്ലാ ഉപവിദ്യാഭ്യാസ ഓഫിസര്‍മാരെയും  എസ്.എസ്.കെ. ജില്ലാ പ്രോജക്ട് കോര്‍ഡിനേറ്റര്‍മാരെയും ജില്ലാ പ്രോജക്ട്  ഓഫിസര്‍മാരെയും കൈറ്റ് ജില്ലാ കോര്‍ഡിനേറ്റര്‍മാരെയും വിദ്യാകിരണം ജില്ലാ കോര്‍ഡിനേറ്റര്‍മാരെയും എല്ലാ പ്രധാന അധ്യാപകരെയും എല്ലാ പ്രിന്‍സിപ്പല്‍മാരെയും അഭിസംബോധന ചെയ്തു കൊണ്ടുള്ളതായിരുന്നുവെന്നും മന്ത്രി വ്യക്തമാക്കി. സ്‌കൂള്‍ തുറക്കുന്നതുമായി ബന്ധപ്പെട്ട മുന്നൊരുക്ക പ്രവര്‍ത്തങ്ങള്‍ക്ക് പൊതു വിദ്യാഭ്യാസ വകുപ്പ് നല്‍കിയ പ്രാധാന്യം ഈ സര്‍ക്കുലര്‍ വ്യക്തമാക്കുന്നുവെന്നും അദ്ദേഹം കൂട്ടിച്ചേര്‍ത്തു. 

Following the tragic electrocution death of a student at Thevalakkara school, the Kerala government has ordered the suspension of the headmistress and sought an explanation from the Kollam AEO. Financial aid and educational support announced for the victim’s family.