ദുബൈ: എസിയില്ലാത്ത വിമാനത്തില്‍ നരകയാതന അനുഭവിച്ച യാത്രക്കാരുടെ ദുരിതം ഇരട്ടിയാക്കി സര്‍വിസ് റദ്ദാക്കലും. വെള്ളിയാഴ്ച രാവിലെ കോഴിക്കോട്ടേക്ക് പോകേണ്ട എയര്‍ ഇന്ത്യ എക്‌സ്പ്രസ് (ഐ.എക്‌സ് 346) വിമാനമാണ് എ.സി സംവിധാനത്തിലെ തകരാര്‍ മൂലം റദ്ദാക്കിയത്. പ്രശ്‌നം പരിഹരിച്ച് ഇന്ന് പുലര്‍ച്ചെ മൂന്നോടെ വിമാനം ദുബൈയില്‍നിന്ന് യാത്ര തിരിക്കുമെന്ന് അധികൃതര്‍ അറിയിച്ചു.

ഇന്നലെ രാവിലെ ഒമ്പതിന് പുറപ്പെടേണ്ടിയിരുന്ന വിമാനത്തില്‍ 8.15ഓടെ ബോര്‍ഡിങ് ആരംഭിച്ചു. എന്നാല്‍, എ.സി തകരാറിനെത്തുടര്‍ന്ന് വിമാനത്തിന്റെ യാത്ര അനിശ്ചിത്വത്തിലായി. ഇതോടെ സ്ത്രീകളും കുട്ടികളും ഉള്‍പ്പടെയുള്ള യാത്രക്കാര്‍ കനത്ത ചൂടില്‍ അനുഭവിച്ചത് നാലു മണിക്കൂര്‍ നേരത്തെ കഠിനമായ ദുരിതമായിരുന്നു. ഒരു മണിയോടെയാണ് സര്‍വിസ് റദ്ദാക്കിയ കാര്യം യാത്രക്കാരെ അറിയിക്കുന്നത്. അടിയന്തര ആവശ്യങ്ങള്‍ക്ക് പോകേണ്ടവര്‍ മറ്റു വിമാനങ്ങളില്‍ യാത്ര ചെയ്യാനുള്ള ശ്രമങ്ങള്‍ നടത്തി. മണിക്കൂറുകള്‍ക്ക് ശേഷമാണ് ഇന്ന് പുലര്‍ച്ചെ മൂന്നോടെ വിമാനം യാത്ര തിരിക്കുമെന്ന് അധികൃതര്‍ അറിയിച്ചത്. യാത്രക്കാര്‍ക്ക് ഹോട്ടല്‍ താമസം, സൗജന്യ സര്‍വിസ് റീഷെഡ്യൂളിങ് എന്നിവ സജ്ജമാക്കിയിട്ടുണ്ടെന്ന് എയര്‍ ഇന്ത്യ വക്താവ് പറഞ്ഞു. റദ്ദാക്കിയ ടിക്കറ്റുകളുടെ മുഴുവന്‍ തുകയും റീഫണ്ട് ചെയ്യുമെന്നും യാത്രക്കാര്‍ക്കുണ്ടായ അസൗകര്യത്തില്‍ ഖേദിക്കുന്നതായും വക്താവ് കൂട്ടിച്ചേര്‍ത്തു.

അതിനിടെ, ഇന്നലെ തിരുവനന്തപുരത്തുനിന്ന് അബൂദബിയിലേക്കുള്ള എയര്‍ ഇന്ത്യ എക്‌സ്പ്രസ് വിമാനം (ഐ.എക്‌സ് 523) സര്‍വിസ് 1.5 മണിക്കൂറോളെ വൈകി. ഉച്ചക്ക് 1.15ന് (ഇന്ത്യന്‍ സമയം) പറന്നുയരേണ്ട വിമാനം, ഉച്ച തിരിഞ്ഞ് 2.40 നാണ് പുറപ്പെട്ടത്.

ALSO READ: യുഎഇയിലെ പാനീയങ്ങളുടെ വില ഇനി അതിലെ പഞ്ചസാരയെ ആശ്രയിച്ച്; പഞ്ചസാരയുടെ അളവ് കൂടുന്തോറും നികുതി കൂടും

 cancellation of the Air India Express service doubled the suffering of passengers who experienced hell on a flight without AC