ദുബൈ: യു.എ.ഇയിലെ നികുതി നിയമങ്ങളിലെ പുതിയ ഭേദഗതി പ്രകാരം, രാജ്യത്തെ പാനീയങ്ങള്‍ക്ക് 100 മില്ലിയില്‍ അടങ്ങിയിരിക്കുന്ന പഞ്ചസാരയുടെ അളവ് അനുസരിച്ച് വില നിശ്ചയിക്കുന്ന രീതി ഉടന്‍. 2026ന്റെ തുടക്കം മുതല്‍ പുതിയ വിലനിര്‍ണയ സംവിധാനം പ്രാബല്യത്തില്‍ വരുമെന്ന് യു.എ.ഇ ധനകാര്യ മന്ത്രാലയവും ഫെഡറല്‍ ടാക്‌സ് അതോറിറ്റിയും (എഫ്.ടി.എ) സ്ഥിരീകരിച്ചു.

പാനീയങ്ങളില്‍ പഞ്ചസാരയുടെ അളവ് കൂടുന്തോറും നികുതി ചെലവ് കൂടും. ഇത് നിലവിലെ ഫ്‌ലാറ്റ് ഫീസില്‍ നിന്ന് മാറുന്നതിന്റെ സൂചനയാണെന്നും ഇതുസംബന്ധിച്ച ദേശീയ മാധ്യമ റിപ്പോര്‍ട്ടില്‍ വ്യക്തമാക്കി. 'പൊതുജനാരോഗ്യം സംരക്ഷിക്കാനും ഉയര്‍ന്ന പഞ്ചസാര അടങ്ങിയ ഉല്‍പന്നങ്ങളുടെ ഉപഭോഗം കുറയ്ക്കാനും പാനീയങ്ങളിലെ പഞ്ചസാരയുടെ അളവ് കുറയ്ക്കാന്‍ നിര്‍മാതാക്കളെ പ്രോത്സാഹിപ്പിക്കാനുമുള്ള യു.എ.ഇയുടെ വിശാലമായ ശ്രമങ്ങളുടെ ഭാഗമാണ് ഭേദഗതി' മന്ത്രാലയം പുറത്തിറക്കിയ പ്രസ്താവനയില്‍ പറഞ്ഞു.

ഉല്‍പന്ന വര്‍ഗീകരണത്തെ അടിസ്ഥാനമാക്കിയുള്ള മുന്‍ മോഡലില്‍നിന്ന് വ്യത്യസ്തമായി, പുതിയ സംവിധാനം നികുതി നിരക്കിനെ പഞ്ചസാരയുടെ അളവുമായി നേരിട്ട് ബന്ധിപ്പിക്കുന്നു. കൂടാതെ, അതുമായി ബന്ധപ്പെട്ട ആരോഗ്യ പ്രത്യാഘാതങ്ങളുമായും ചേര്‍ക്കുന്നു. ഈ സമീപനം പഞ്ചസാരയുടെ അളവ് കുറയ്ക്കാന്‍ നിര്‍മാതാക്കളെ പ്രോത്സാഹിപ്പിക്കുകയും, കൂടുതല്‍ അറിവുള്ള ഭക്ഷണ തെരഞ്ഞെടുപ്പുകള്‍ നടത്താന്‍ ഉപഭോക്താക്കളെ പ്രാപ്തരാക്കുകയും ചെയ്യുന്നുവെന്നും അധികൃതര്‍ അഭിപ്രായപ്പെട്ടു. യു.എ.ഇ പഞ്ചസാരയടങ്ങിയ സോഫ്റ്റ് ഡ്രിങ്കുകള്‍ക്ക് 2017ലാണ് അധിക നികുതി ഏര്‍പ്പെടുത്തിയത്. ഈ നീക്കം വലിയ വിജയമായിരുന്നു.

പ്രതിവര്‍ഷം 2.2 ദശലക്ഷം ടൈപ്2 പ്രമേഹ കേസുകള്‍, 1.2 ദശലക്ഷം ഹൃദ്രോഗങ്ങളും
ഈ വര്‍ഷം പുറത്തിറങ്ങിയ ഒരു യു.എസ് പഠനത്തില്‍ പഞ്ചസാര അടങ്ങിയ പാനീയങ്ങള്‍ കാരണം ആഗോള തലത്തില്‍ ഓരോ വര്‍ഷവും 2.2 ദശലക്ഷം പുതിയ ടൈപ്2 പ്രമേഹ കേസുകളും 1.2 ദശലക്ഷം ഹൃദയ സംബന്ധമായ പുതിയ അസുഖങ്ങളും ഉണ്ടാകുന്നുണ്ടെന്ന് വെളിപ്പെടുത്തിയിരുന്നു. മിഡില്‍ ഈസ്റ്റില്‍ ഏകദേശം 15 ശതമാനം പ്രമേഹ കേസുകളിലും അവ നേരിട്ട് സംഭാവനയായി വര്‍ത്തിച്ചതായി ടഫ്റ്റ്‌സ് യൂനിവേഴ്‌സിറ്റിയിലെ ജെറാള്‍ഡ് ജെ, ഡൊറോത്തി ആര്‍ ഫ്രീഡ്മാന്‍ സ്‌കൂള്‍ ഓഫ് ന്യൂട്രീഷന്‍ സയന്‍സ് ആന്‍ഡ് പോളിസിയിലെ ഗവേഷകര്‍ നടത്തിയ പഠനത്തില്‍ കണ്ടെത്തി. ഈ പഠനം നേച്ചര്‍ മെഡിസിനില്‍ പിന്നീട് പ്രസിദ്ധീകരിച്ചു.

നികുതി തന്ത്രം പാനീയ നിര്‍മാതാക്കളെ അവരുടെ ഉല്‍പന്നങ്ങളിലെ പഞ്ചസാരയുടെ അളവ് കുറയ്ക്കാന്‍ പ്രോത്സാഹിപ്പിക്കുകയും, പ്രമേഹ നിരക്ക് കുറയ്ക്കുന്നതിനുള്ള രാജ്യ വ്യാപക ശ്രമങ്ങളെ പിന്തുണയ്ക്കുകയും ചെയ്യുമെന്ന് വിദഗ്ധര്‍ ചൂണ്ടിക്കാട്ടുന്നു. ഇത് പ്രശംസനീയമായ ഒരു പൊതുജനാരോഗ്യ നയമാണ്. മധുര പാനീയങ്ങളിലെ പഞ്ചസാരയുടെ അളവുമായി നേരിട്ട് നികുതി ബന്ധിപ്പിക്കുന്നതിലൂടെ, പഞ്ചസാരയുടെ അളവ് കുറവുള്ള ഉല്‍പന്നങ്ങള്‍ പരിഷ്‌കരിക്കാന്‍ നിര്‍മാതാക്കളെ പ്രോത്സാഹിപ്പിക്കുകയാണെന്നും വിദഗ്ധര്‍ വിലയിരുത്തുന്നു.

വര്‍ധിച്ചു വരുന്ന പൊണ്ണത്തടി, മെറ്റബോളിക് സിന്‍ഡ്രോം, ടൈപ്2 പ്രമേഹം എന്നിവയ്‌ക്കെതിരായ പോരാട്ടത്തില്‍ ഇത് വളരെ പ്രധാനമാണ്. ദൈനംദിന ഉപഭോഗത്തിലെ പഞ്ചസാരയുടെ അളവ് കുറയ്ക്കുന്നത് വിട്ടുമാറാത്ത ശാരീരിക അവസ്ഥകളെ തടയുന്നതില്‍ ദീര്‍ഘ കാലാടിസ്ഥാനത്തില്‍ കാര്യമായ സ്വാധീനം ചെലുത്തും.

2017ല്‍ യു.എ.ഇയും സഊദി അറേബ്യയും പഞ്ചസാര നികുതി ഏര്‍പ്പെടുത്തിയ ശേഷം, ഒമാന്‍, ബഹ്‌റൈന്‍, കുവൈത്ത്, ഖത്തര്‍ എന്നിവയും ഇത് പിന്തുടര്‍ന്നു. മേഖലയിലെ ഉയര്‍ന്ന പൊണ്ണത്തടി, പ്രമേഹ നിരക്കുകളാണ് ഈ നീക്കത്തിന് പ്രചോദനമായത്.

അതിനുശേഷം ബഹ്‌റൈനില്‍ പ്രമേഹത്തില്‍ ഏറ്റവും വലിയ കുറവ് റിപ്പോര്‍ട്ട് ചെയ്തിട്ടുണ്ട്. 2011ല്‍ ജനസംഖ്യയുടെ 19.5 ശതമാനത്തില്‍ നിന്ന് 2021ല്‍ 11.3 ശതമാനമായി. എന്നാല്‍, ആ വിജയം മറ്റ് ഗള്‍ഫ് രാജ്യങ്ങളില്‍ ഇതു വരെ ആവര്‍ത്തിക്കപ്പെട്ടിട്ടില്ല.

ഒമാന്‍ പ്രമേഹ നിരക്കില്‍ 10.5 ശതമാനത്തില്‍ നിന്ന് 13.8 ശതമാനമായി വര്‍ധന റിപ്പോര്‍ട്ട് ചെയ്തു. കുവൈത്തില്‍, ഇപ്പോള്‍ 24.9 ശതമാനം ആളുകള്‍ പ്രമേഹ രോഗബാധിതരാണ്. ഒരു ദശാബ്ദം മുമ്പ് ഇത് 20.7 ശതമാനമായിരുന്നു.

ALSO READ: ജനിച്ചത് രണ്ട് തലയും ഉടലുമായി, അരഭാഗത്തിന് താഴെ ഒട്ടിച്ചേര്‍ന്ന നിലയില്‍; ഏഴുമാസം പ്രായമായ സയാമീസ് ഇരട്ടകളെ വേര്‍പ്പെടുത്തി സഊദി; വേണ്ടിവന്നത് 12 മണിക്കൂര്‍ നീണ്ടുനിന്ന ശസ്ത്രക്രിയ

UAE Ministry of Finance and the Federal Tax Authority (FTA) have announced an amendment to the excise tax mechanism applied to sugar sweetened beverages (SSB’s), introducing a tiered volumetric model that links the tax value on each litre of a sugar sweetened beverage to its sugar content per 100ml.