മഴക്കാലമായാല്‍ പിന്നെ അടുക്കളയിലെ പല സാധനങ്ങളും കേടാവരാനും പൂപ്പല്‍ വരാനും തുടങ്ങും. വായുവില്‍ തങ്ങി നില്‍ക്കുന്ന ഈര്‍പ്പം കൊണ്ടാണ് സാധനങ്ങള്‍ ഇങ്ങനെ കേടുവരാന്‍ കാരണമാകുന്നത്. അതിലൊന്നാണ് അടുക്കളയില്‍ ഒഴിച്ച് കൂടാന്‍ കഴിയാത്ത പുളി. എല്ലാവരും ഒട്ടുമിക്ക കറികളിലും പുളി ഉപയോഗിക്കാറുമുണ്ട്. എന്നാല്‍ മഴക്കാലത്ത് ശരിയായ രീതിയില്‍ പുളി സൂക്ഷിച്ചില്ലെങ്കില്‍ കേടുവരാനുള്ള സാധ്യതയും കൂടുതലാണ്. എന്താണ് പുളി കേടുവരാതിരിക്കാന്‍ ചെയ്യേണ്ടത്. നോക്കാം!

വായു കടക്കാത്ത പാത്രത്തിലാണ് പുളി ഇട്ടു വയ്‌ക്കേണ്ടത്

വായുവില്‍ തങ്ങിനില്‍ക്കുന്ന ഈര്‍പ്പം കൊണ്ടാണ് മഴക്കാലത്ത് ഭക്ഷണ സാധനങ്ങള്‍ കേടുവരുന്നത്. വായു കടക്കാത്ത പാത്രത്തിലാക്കി അടച്ചുവച്ചു പുളി സൂക്ഷിക്കാവുന്നതാണ്. ഇത് ഈര്‍പ്പം തടയുകയും പുളി കേടാവാതിരിക്കാനും സഹായിക്കുന്നു.

ചില്ലു പാത്രം

പുളി കൂടുതല്‍ നാള്‍ കേടുവരാതിരിക്കണമെങ്കില്‍ ഗ്ലാസ് പാത്രങ്ങളിലാക്കി സൂക്ഷിക്കുന്നതാണ് നല്ലത്. പ്ലാസ്റ്റിക് പാത്രമോ  സ്റ്റീല്‍ പാത്രമോ പോലെ ഗ്ലാസ് പാത്രത്തിലും പ്രതിപ്രവര്‍ത്തനം ഉണ്ടാകാറില്ല. കൂടാതെ ഈര്‍പ്പം ഉണ്ടാകുന്നത് ഒഴിവാക്കാനും സാധിക്കുന്നു. അതുകൊണ്ടു തന്നെ വൃത്തിയുള്ള ഗ്ലാസ് പാത്രത്തില്‍ പുളി സൂക്ഷിക്കുന്നതാണ് നല്ലത്.

ALSO READ: മുഖത്ത് ഐസ് വയ്ക്കുന്നത് സുരക്ഷിതമോ..?  ഉപയോഗിക്കും മുമ്പ് ഇക്കാര്യങ്ങള്‍ കൂടെ അറിഞ്ഞിരിക്കൂ

ഫ്രിഡ്ജില്‍

ദീര്‍ഘകാലം പുളി കേടുവരാതിരിക്കാന്‍ ഫ്രിഡ്ജിലും സൂക്ഷിക്കാവുന്നതാണ്. ഒരു സിപ് ലോക്ക് ബാഗിലാക്കി നന്നായി അടച്ച് പച്ചക്കറികള്‍ വയ്ക്കുന്ന ഭാഗത്ത് സൂക്ഷിച്ചാല്‍ മതിയാവും. പുളിയുടെ രുചി മാറാതെ തന്നെ എത്ര ദിവസം വരെയും കേടുവരാതിരിക്കുകയും ചെയ്യും. ഉപയോഗിക്കുന്നതിന് അരമണിക്കൂര്‍ മുമ്പ് പുറത്തെടുത്തു വച്ചാല്‍ മതി. 

ഈര്‍പ്പം

പുളി കേടുവരാനുള്ള പ്രധാന കാരണങ്ങളില്‍ ഒന്ന് ഈര്‍പ്പമാണ്. തണുപ്പുള്ള ഈര്‍പ്പമില്ലാത്ത സ്ഥലങ്ങളിലാണ് പുളി സൂക്ഷിക്കേണ്ടത്. അതേസമയം നനവുള്ള സ്പൂണ്‍, കൈകള്‍ ഉപയോഗിച്ച് പുളി എടുക്കുകയും ചെയ്യരുത്. ഇത് പൂപ്പലും ഫങ്കസും ഉണ്ടാവാന്‍ കാരണമാകുന്നു.

അരച്ച് സൂക്ഷിക്കാം

കുഴമ്പു രൂപത്തിലാക്കി അരച്ച് സൂക്ഷിച്ചു വയ്ക്കുന്നതും ദിവസങ്ങളോളം പുളി കേടുവരാതിരിക്കാന്‍ സഹായിക്കുന്നതാണ്. ചെറുചൂട് വെള്ളത്തില്‍ പുളി കുതിര്‍ക്കാന്‍ വയ്ക്കാവുന്നതാണ്. ശേഷം കുരു കളഞ്ഞ് പള്‍പ് മാത്രമായി വേര്‍തിരിച്ചെടുക്കണം. ഇത് ഗ്ലാസ് പാത്രത്തിലാക്കി ഫ്രിഡ്ജില്‍ സൂക്ഷിച്ചാല്‍ കുറച്ചുകാലം പുളി കേടുവരാതിരിക്കും.

ആരോഗ്യത്തിന്റെ കാര്യത്തിലും മുന്‍പന്തിയിലാണ് പുളി. ഇന്‍സുലിന്‍ ക്രമപ്പെടുത്താനും സന്ധിവേദനയ്ക്കും വായുടെ ആരോഗ്യത്തിനും സൗന്ദര്യത്തിനും ഹൃദ്രോഗത്തിനുമൊക്കെ ബെസ്റ്റാണ് പുളി. രക്തത്തിലെ കൊളസ്‌ട്രോള്‍ ക്രമപ്പെടുത്താനും രക്തസമ്മര്‍ദ്ദം ഉയരാതെ നോക്കാനും പുളിയ്ക്കു സാധിക്കും.