ഗസ്സയിൽ 35 ദിവസം മാത്രം പ്രായമുള്ള കുട്ടി പട്ടിണികിടന്ന് മരിച്ചു. ഗസ്സ സിറ്റിയിലെ അൽ-ഷിഫ ആശുപത്രിയിൽ പോഷകാഹാരക്കുറവ് മൂലം 35 ദിവസം പ്രായമുള്ള കുഞ്ഞ് മരിച്ചതായി ഡയറക്ടർ മുഹമ്മദ് അബു സാൽമിയ വെളിപ്പെടുത്തി. ശനിയാഴ്ച ആശുപത്രിയിൽ പട്ടിണി കിടന്ന് മരിച്ച രണ്ട് പേരിൽ ഒരാളാണ് പേര് വെളിപ്പെടുത്താത്ത ഈ കുഞ്ഞ്. ഗസ്സയിൽ ഇസ്‌റാഈൽ അനുവദിച്ച അമേരിക്കൻ പിന്തുണയുള്ള സഹായ കേന്ദ്രങ്ങളിൽ നിന്ന് ഭക്ഷണം വാങ്ങുന്നവരെ വെടിവെച്ച് കൊല്ലുന്ന കിരാത നടപടിക്ക് പിന്നാലെ ഫലസ്തീനിൽ പട്ടിണി അതിരൂക്ഷമായി തുടരുകയാണ്. 

ഗസ്സയിലെ ആരോഗ്യ മന്ത്രാലയം ആശുപത്രി അടിയന്തര വാർഡുകളിൽ പട്ടിണി കിടക്കുന്ന ആളുകളുടെ എണ്ണം കൂടുതലാണെന്ന് മുന്നറിയിപ്പ് നൽകിയതിനു പിന്നാലെയാണ് മരണങ്ങൾ സംഭവിച്ചത്. ഗസ്സയിൽ 17,000 കുട്ടികൾ കടുത്ത പോഷകാഹാരക്കുറവ് അനുഭവിക്കുന്നുണ്ടെന്ന് ഉദ്യോഗസ്ഥർ പറയുന്നു. 

അതേസമയം, ഇസ്‌റാഈൽ സൈന്യം ഗസ്സയിൽ ആക്രമണം തുടരുകയാണ്. കഴിഞ്ഞ ദിവസം കുറഞ്ഞത് 116 പേർ കൊല്ലപ്പെട്ടതായി മെഡിക്കൽ വൃത്തങ്ങൾ റിപ്പോർട്ട് ചെയ്തു. യുഎസ് പിന്തുണയുള്ള ഗസ്സ ഹ്യുമാനിറ്റേറിയൻ ഫൗണ്ടേഷൻ (ജിഎച്ച്എഫ്) നടത്തുന്ന സഹായ കേന്ദ്രങ്ങളിൽ നിന്ന് ഭക്ഷണം തേടുന്നതിനിടെ വെടിയേറ്റ് മരിച്ച 38 പേർ ഇതിൽ ഉൾപ്പെടുന്നു.

ALSO READ: ബോംബ് വീഴുന്നതിനിടെ ഓണ്‍ലൈനില്‍ പരീക്ഷയെഴുതി ഗസ്സയിലെ കുട്ടികള്‍; ആക്രമണം തുടങ്ങിയ ശേഷം ഇതാദ്യം

ഖാൻ യൂനിസിന് തെക്ക് പടിഞ്ഞാറുള്ള ഒരു സ്ഥലത്തിനും റാഫയ്ക്ക് വടക്ക് പടിഞ്ഞാറുള്ള മറ്റൊരു കേന്ദ്രത്തിനും സമീപമാണ് മരണങ്ങൾ സംഭവിച്ചതെന്ന് സിവിൽ ഡിഫൻസ് ഏജൻസി വക്താവ് മഹ്മൂദ് ബസ്സാൽ പറഞ്ഞു. ഇവ രണ്ടും തെക്കൻ ഗസ്സയിലാണ്, മരണങ്ങൾക്ക് കാരണം ഇസ്‌റാഈൽ വെടിവയ്പ്പാണ് എന്ന് അദ്ദേഹം പറഞ്ഞു.

മെയ് അവസാനത്തോടെ ഫൗണ്ടേഷൻ സഹായം വിതരണം ചെയ്യാൻ തുടങ്ങിയതിനുശേഷം, അപകടകരമായ ജിഎച്ച്എഫ് സൈറ്റുകൾക്ക് സമീപം ഇസ്‌റാഈലി സേനയും സ്വകാര്യ സൈനിക കരാറുകാരും ഏകദേശം 900 ഫലസ്തീനികളെ കൊലപ്പെടുത്തിയിട്ടുണ്ടെന്ന് ആരോഗ്യ മന്ത്രാലയം പറയുന്നു. ഐക്യരാഷ്ട്രസഭയുടെ ഏജൻസികളും ചാരിറ്റികളും നടത്തുന്ന ഏകദേശം 400 കേന്ദ്രങ്ങൾക്ക് പകരമായി നാല് കേന്ദ്രങ്ങൾ മാത്രമാണ് ഇസ്‌റാഈൽ തുറന്നു നൽകിയത്. ഇവിടെ എത്തുന്നവരെയാണ് ഇസ്‌റാഈൽ തന്നെ വെടിവെച്ച് കൊല്ലുന്നതും.