കോട്ടയം: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശന്റെ വർഗീയ പരാമർശത്തിൽ പൊലിസിൽ പരാതി. എസ്‍എൻഡിപി സംരക്ഷണ സമിതിയാണ് പൊലിസിൽ പരാതി നൽകിയത്. പരാതിയിൽ നടപടിയുണ്ടായില്ലെങ്കിൽ കോടതിയെ സമീപിക്കാനാണ് എസ്‍എൻഡിപി സംരക്ഷണ സമിതിയുടെ തീരുമാനം.

കോട്ടയം വെസ്റ്റ് പൊലിസ് സ്റ്റേഷനിലാണ് പരാതി നൽകിയത്. എൽഡിഎഫും യുഡിഎഫും മുസ്‌ലിം സമുദായത്തിന് മുൻഗണന നൽകുന്നുവെന്നും കേരളം ഉടൻ മുസ്‌ലിം ഭൂരിപക്ഷ പ്രദേശമാകുമെന്നും ഉൾപ്പെടെയുള്ള വർഗീയ പരാമർശങ്ങളാണ് വെള്ളാപ്പള്ളി നടേശൻ നടത്തിയത്. കോട്ടയത്ത് നടന്ന എസ്എൻഡിപി യോഗത്തിന്റെ നേതൃസമ്മേളനത്തിൽ നടത്തിയ പ്രസംഗത്തിലാണ് അദ്ദേഹത്തിന്റെ വിവാദ പരാമർശങ്ങൾ.

ALSO READ: മുംബൈ ട്രെയിൻ സ്ഫോടന പരമ്പര: 12 പ്രതികളെയും വെറുതെ വിട്ടു, വധശിക്ഷയും ജീവപര്യന്തവും റദ്ദാക്കി

'കാന്തപുരം പറയുന്നത് മാത്രം കേട്ട് കേരളാ സർക്കാർ ഭരിച്ചാൽ മതി എന്ന സ്ഥിതിയാണുള്ളത്. മുസ്‌ലിം ലീഗ് ആണ് കേരളത്തിൽ ഏറ്റവും കൂടുതൽ സീറ്റുകളിൽ മത്സരിക്കുന്നത്. അടുത്ത തെരഞ്ഞെടുപ്പിൽ അവർ കൂടുതൽ സീറ്റുകൾ ആവശ്യപ്പെടും. മലബാറിന് പുറത്ത് തിരുകൊച്ചിയിലും അവർ സീറ്റ് ചോദിക്കും. അവരുടെ ലക്ഷ്യം മുഖ്യമന്ത്രി പദവിയാണ്. ഇങ്ങനെ പോയാൽ, അച്യുതാനന്ദൻ പറഞ്ഞതുപോലെ കേരളം മുസ്‌ലിം ഭൂരിപക്ഷ നാടാകും,' വെള്ളാപ്പള്ളി പറഞ്ഞു.

'മറ്റ് സമുദായങ്ങൾ ജാതി പറഞ്ഞ് എല്ലാം നേടുന്നു. എന്നാൽ, ഈഴവർ ജാതി പറഞ്ഞാൽ വിമർശനമാണ്. ഈഴവർക്ക് കേരളത്തിൽ പ്രാധാന്യം ലഭിക്കുന്നത് തൊഴിലുറപ്പ് പദ്ധതിയിൽ മാത്രമാണ്. ഈഴവർ ഒന്നിച്ചാൽ കേരളം ആര് ഭരിക്കണമെന്ന് തീരുമാനിക്കാൻ കഴിയും,' വെള്ളാപ്പള്ളി കൂട്ടിച്ചേർത്തു. എസ്എൻഡിപി യോഗം ഒരു രാഷ്ട്രീയ ശക്തിയായി മാറണമെന്നും അംഗങ്ങൾ അവരവരുടെ രാഷ്ട്രീയ പാർട്ടികളിൽ നിന്ന് അവകാശങ്ങൾ നേടിയെടുക്കണമെന്നും വെള്ളാപ്പള്ളി പറഞ്ഞു.