ന്യൂഡല്‍ഹി: ജീവനാംശത്തിനും, വിവാഹമോചനത്തിനും വേണ്ടി മുന്‍ ഭര്‍ത്താവിനെയും, ഭര്‍തൃപിതാവിനെയും കള്ളക്കേസില്‍ കുടുക്കി ജയിലിലാക്കിയ ഐപിഎസ് ഉദ്യോഗസ്ഥ പരസ്യമായി മാപ്പ് പറയണമെന്ന് സുപ്രീം കോടതി. ഭര്‍ത്താവിനും കുടുംബത്തിനുമെതിരെ ഫയല്‍ ചെയ്ത കേസുകളെല്ലാം റദ്ദാക്കിയ കോടതി മാപ്പപേക്ഷ പത്രമാധ്യമങ്ങളില്‍ പ്രസിദ്ധീകരിക്കാനും യുവതിയോട് നിര്‍ദേശിച്ചു. വ്യാജ പരാതിയുടെ പേരില്‍ നൂറിലധികം ദിവസമാണ് യുവാവും അച്ഛനും ജയിലില്‍ കിടന്നത്. 

2018 മുതല്‍ വേര്‍പിരിഞ്ഞ് താമസിക്കുകയാണ് ദമ്പതികള്‍. ഭാര്യയുടെ പരാതിയില്‍ മുന്‍ ഭര്‍ത്താവിന് 109 ദിവസവും, പിതാവിന് 103 ദിവസവുമാണ് ജയില്‍ ശിക്ഷ ലഭിച്ചത്. ഇരുവരുടെയും വിവാഹ മോചനം അംഗീകരിച്ച കോടതി വ്യാജ കേസില്‍ ഭര്‍തൃവീട്ടുകാര്‍ക്ക് നേരിടേണ്ടി വന്ന ശാരീരികവും മാനസികവുമായ പീഡനത്തിന് നിരുപാധികം മാപ്പപേക്ഷിക്കാനാണ് ഉത്തരവിട്ടത്. മാപ്പപേക്ഷ കോടതി നിര്‍ദേശിക്കുന്ന തരത്തിലായിരിക്കണം. മാത്രമല്ല ക്ഷമാപണം ഫേസ്ബുക്ക്, ഇന്‍സ്റ്റഗ്രാം, യൂട്യൂബ്, മറ്റ് സമൂഹ മാധ്യമങ്ങളിലും, ഇംഗ്ലീഷ്-ഹിന്ദി പത്രങ്ങളുടെ ദേശീയ പതിപ്പിലും പ്രസിദ്ധീകരിക്കണമെന്നും കോടതി ഉത്തരവില്‍ വ്യക്തമാക്കി. 

ALSO READ: വെറ്ററിനറി യൂണിവേഴ്‌സിറ്റിയില്‍ ക്ലര്‍ക്ക്; ഡിഗ്രിയാണ് യോഗ്യത; വേറെയുമുണ്ട് ഒഴിവുകള്‍; പരീക്ഷയില്ലാതെ ജോലി നേടാം

ഇരുവരുടെയും മകള്‍ക്ക് അമ്മയോടൊപ്പം താമസിക്കാം. എന്നാല്‍ ഭര്‍ത്താവിനും കുടുംബാംഗങ്ങള്‍ക്കും മകളെ കാണാന്‍ അവസരമൊരുക്കാനും ചീഫ് ജസ്റ്റിസ് ബിആര്‍ ഗവായ്, ജസ്റ്റിസ് എജി മാസിഹ് എന്നിവരടങ്ങിയ ബെഞ്ച് നിര്‍ദേശിച്ചു. ഐപിഎസ് ഉദ്യോഗസ്ഥ തന്റെ ഔദ്യോഗിക പദവി ഉപയോഗിച്ച് ഭര്‍ത്താവിനും കുടുംബത്തിനുമെതിരെ പ്രതികാര നടപടി എടുക്കാന്‍ പാടില്ലെന്ന് കോടതി മുന്നറിയിപ്പ് നല്‍കിയിട്ടുണ്ട്. സമാനമായി ഭാര്യയുടെ മാപ്പപേക്ഷ ഭര്‍ത്താവോ കുടുംബമോ മറ്റെവിടെയെങ്കിലും ഉപയോഗിക്കാനോ, വെല്ലുവിളിക്കാനോ പാടില്ലെന്നും കോടതി ഉത്തരവിട്ടു.